මනම්පිටිය නිමල් ජයරත්න –
සාමණේර භික්ෂූන් වහන්සේලා ඇතුළු ගිලන්ව සිටින භික්ෂූන් වහන්සේලා දෙසීයකට ආසන්න සංඛ්යාවක් වැඩවෙසෙන ඓතිහාසික දිඹුලාගල ආරණ්ය සේනාසනයේ විදුලිය අද ( 24 ) සවස දෙවන වරටත් විසන්ධි කිරීමෙන් එහි වැඩවාසය කරන භික්ෂූන් වහන්සේලා දැඩි අසීරුතාවට පත්ව සිටින බව දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියන් පැවසූහ,
1954 අවධියේ සිට එවකට හිටපු ජනාධිපතිවරුන් විසින් දිඹුලාගල ආරණ්ය සේනාසනයේ විදුලිබිල ගෙවීමකින් තොරව නිදහස් කර ඇති නමුත් මේ වසරේ දෙවැනි වරටත් මෙම විදුලිය විසන්ධි කිරීම හේතුවෙන් අලි, කොටි, වලසුන් මැද වැඩවාසය කරන තම ආරණ්ය සේනාසනයේ භික්ෂූන් වහන්සේලාගේ ජීවිත අනාරක්ෂිත තත්ත්වයට පත්ව ඇති බවද රාහුලාලංකාර නාහිමියෝ වැඩිදුරටත් පෙන්වා දුන්හ.
රුපියල් ලක්ෂ 57කට ආසන්න මුදලක් ගෙවීමට තිබෙන මෙම විදුලි බිල දිඹුලාගල ආරණ්ය සේනාසනයට කිසිසේත්ම ගෙවීමට තරම් වත්කමක් නැති බවත්, මෙම තත්ත්වය සැලකිල්ලට ගෙන දිඹුලාගල ආරණ්ය සේනාසනයේ විදුලි බිල නිදහස් කර දෙන ලෙසද උන්වහන්සේ ජනාධිපතිවරයාගෙන් සහ අගමැතිවරයාගෙන් මෙන්ම විදුලි බල අමාත්යවරයාගෙන් ඉල්ලීමක් කළහ. මේ අසරණ තත්ත්වයෙන් නිදහස් වීම සඳහා මැදිහත්වන ලෙස විපක්ෂ නායකවරයාගෙන් ද උන්වහන්සේ ඉල්ලූහ.
විදුලි ගාස්තු වැඩිවීමට පෙර දිඹුලාගල ආරණ්ය සේනාසනයට මාසික විදුලි බිල ලක්ෂයක පමණ මුදලක්, පැමිණියද විදුලි ගාස්තු වැඩිමත් සමග මාසිකව රුපියල් ලක්ෂ හතරහමාරක, පහක විදුලි බිලක් ලැබීම දරා ගැනීමට නොහැකි බවත් උන්වහන්සේ කීහ.
දිවා මෙන්ම රාත්රී කාලයේ වනසතුන්, අලිඇතුන්, ගැවසෙන දිඹුලාගල ආරණ්ය සේනාසනයේ භික්ෂූන් වහන්සේලා, සාමනේර භික්ෂූන් වහන්සේලා දැඩි අනාරක්ෂිත තත්ත්වයට පත්ව ඇති බව ද උන්වහන්සේ පෙන්වා දුන්හ.
වෙනත් විහාරස්ථාන සහ ආරණ්ය සේනාසනවලට මෙන් දිඹුලාගල ආරණ්ය සේනාසනයට ආධාර මුදල් පරිත්යාගයන් නොලැබෙන බවත්, මෙම ආරණ්ය සේනාසනය පිහිටා තිබෙන්නේ දුෂ්කර ජීවිතයක් ගෙවන ගොවි ජනතාවක් ජීවත්වෙන ප්රදේශයක නිසා, මාසිකව විදුලි බිලක් ගෙවීමට තරම් දිඹුලාගල ආරණ්ය සේනාසනය ආර්ථිකයෙන් පොහොසත් නොවන දිඹුලාගල බුද්ධ ශ්රාවක සංඝ සභාව සඳහන් කළේය.
මේ සම්බන්ධව අදහස් දක්වන විදුලිබල මණ්ඩලයේ නිලධාරීන් සඳහන් කරන්නේ දිඹුලාගල ආරණ්ය සේනාසනයෙහි විදුලි බිල ශ්රී ලංකා විදුලිබල මණ්ඩලය විසින් වසර තිහකට ආසන්න කාලයක් ගෙවූ බවය.,
මේ වනවිට ගෙන ඇති ප්රතිපත්තිමය තීරණය මත සෑම විදුලි පාරිභෝගිකයෙකුටම විදුලිබිල ගෙවීම අනිවාර්ය කර ඇති බැවින් දිඹුලාගල ආරණ්ය සේනාසනයේ ද විදුලි බිල ගෙවීම අනිවාර්ය බවය.
