දිනසේන රතුගමගේ –
මන්නාරමේ ජනතා විරෝධය නොතකා සුළං බල විදුලි බලාගාරයක් ඉදි කිරීමට රජය ගෙන යන වැඩ පිළිවෙළට එරෙහිව මන්නාරමේ දිස්ත්රික් පුරවැසි කමිටුව විසින් දියත් කරණ ලද විරෝධතාවයට යාපනය ඇතුලු උතුරේ තවත් ප්රදේශ කීපයක ජනතා සංවිධානවල සහය මේ වන විට ලැබී තිබේ.
මෙම සංවිධාන අතරට දකුණේ සිංහල සංවිධාන කීපයක්ද එක්ව සිටින අතර ඔවුන් සියලු දෙනා සටන් පාඨ කියමින් මන්නාරම නගරය පුරා මේ වනවිට පෙළපාලි යාමට පටන් ගෙන තිබේ.
මෙම විරෝධතාවයට මීට දින කීපයකට ඉහතදී පොලීසිය ප්රහාර එල්ල කිරීමට විරෝධය පලකරමින් ඊයේ (29 ) මන්නාරම නගරයේ වෙළද සැල් වසා දමා තිබූ අතර පෞද්ගලික අංශයේ ගමනාගමන කටයුතුද නවතා දමා තිබුණි.
මන්නාරමේ සුළං බල විදුලි බලාගාරයක් ඉදි කිරීමට එරෙහිව විරෝධයක් දියත් කළ අවස්ථාවේදී ජනාධිපතිවරයා එය අතහැර දමන බව ප්රකාශ කළ අතර මන්නාරම දිස්ත්රික් පුරවැසි කමිටුව විසින් ගොනු කරණ ලද නඩුවකදී මාසයක කාලයකට එම සංවර්ධන කටයුත්ත නවතා දමන ලෙස අධිකරණ තීන්දුවක් ලැබුණු බවද මන්නාරමේ ස්වේච්ඡා සංවිධාන නියෝජිතයෝ කියා සිටිති.
නමුත් හදිසියේම යළිත් වරක් මන්නාරමේ එම ඉදි කිරීම් කටයුතු සඳහා යන්ත්ර ප්රවාහනය කිරීමේ ආරම්භ වී ඇති බව පෙන්වා දෙන මන්නාරමේ වැසියෝ ඊට එරෙහිව තම ජීවිත පරදුවට තබා කටයුතු කරණ බවද ප්රකාශ කොට සිටිති.
මන්නාරමේ ජනතාව එසේ කරන්නේ එම පළාත්වල ප්රධාන ජීවනෝපාය මාර්ග දෙකක් වන ධීවර කර්මාන්තයට හා කෘෂිකර්මාන්තයට මෙම සුළංබල විදුලි බලාගාර නිසා විශාල හානියක් සිදුවන නිසා බවද පෙන්වා දෙයි.
සුළංබල ටර්බයින් යන්ත්ර ක්රියාත්මක වීමේදී ඒවායෙහි තටු වලින් නැගෙන හඩ නිසාත් අයහපත් තරංග නිසාත් මුහුදේ මසුන් වෙනත් මුහුදු කලාප වෙත යන බව මන්නාරමේ ධීවර සංගම් ප්රකාශ කරයි.
දැනට මන්නාරමේ පුනරීන් ප්රදේශයේ ස්ථාපිත කොට ඇති එම ටර්බයින් යන්ත්රවලින් ඒ බව මනාව සනාථ වී ඇති බව පෙන්වා දෙන ඔවුන් එම ටර්බයින් නිසා භූගත ජල මට්ටම පහළ යාම හේතුවෙන් කෘෂිකාර්මික කටයුතු වලට බාධාවක් එල්ල වී ඇති බවද සඳහන් කරයි.
‘’මන්නාරම බේරා ගනිමු’’ යන තේමාව යටතේ කොළඹ ජනාධිපති ලේකම් කාර්යාලය ඉදිරිපිටදී විරෝධතාවයක් දියත් කිරීමට ගිය අවස්ථාවේදී ජනාධිපතිවරයාගේ නියෝජිතයෙකු පැමිණ මන්නාරමේ එම බලාගාරය ඉදි කිරිම නවතා දමන නිසා විරෝධතාවය අත් හරින ලෙස කළ ඉල්ලිමක් මත පදනම්ව එම විරෝධතා සියල්ල මන්නාරමට පමණක් සීමා කොට අඛණ්ඩ විරෝධතාවයක් ලෙස පවත්වා ගෙන ගිය බවද මන්නාරමේ පුරවැසි කමිටුව කියා සිටියි.
