නැගී එන ආසියානු විස්සයි 20 ශූරයෝ ඇෆ්ගනිස්ථානය ය. ශ්රී ලංකාව අවසන් මහා තරගයෙන් බිහිසුණු ලෙස පරාදය. බොහෝ දේ අහිමි වූ මිනිස්සු අප්රතිහත ධෛර්යයෙන් ජයග්රහණය සොයා ගන්න ආකාරය දකින්නට මදක් නැවතී ඇෆ්ගන් ක්රිකට් ක්රීඩකයන් දෙස බැලිය යුතු බවට යෝජනා කරමු.
සෑම අතින්ම තමන් ශූරයින් බව ඇෆ්ගන් කණ්ඩායම ලෝකයට කියා දුන්නේය. ඉන්දියාවට ගසා අවසන් මහා තරගයට පැමිණි ඇෆ්ගනිස්ථාන ඒ කණ්ඩායම අද අවසන් මහා තරගයේ දී වඩාගෙන ගැහුවේය.
කාසියේ වාසිය දිනුවේ ශ්රී ලංකා A කණ්ඩායමය. පිතිකරණය මොනතරම් අපූරුද කියනවා නම් මුල් පෙළ පිතිකරුවන් 4 දෙනාම ලබා ගන්නේ ලකුණු 14ක පමණි.
පවන් රත්නායක ලකුණු 20ක්, නිමේෂ් විමුක්ති ලකුණු 23ක් ලැබුවේය. ශ්රී ලංකා ඉනිම තනි අතින් ගොඩ දැම්මේ සහන් ආරච්චිගේ ය. සහන් පන්දු 47ක දී හතරේ පහර 6ක් සමග නොදැවී ලකුණු 64ක් ලැබුවේය.
ශ්රී ලංකා කණඩායමත් නියෝජනය කර පුරුද්ද සහිත රමේෂ් මෙන්ඩිස් පළමු පන්දුවේදීම දැවී යන්නේය. පන්දු 6කට මුහුණ දී දුෂාන් හේමන්ත ලබා ගන්නේත් ලකුණු 06ක් පමණි.
මේ වනවිට ශ්රි ලංකා A කණ්ඩායමේ වැඩිම තරග ප්රමාණයක් නායකත්වය දරා වාර්තාව තබා ඇත්තේ නුවනිඳු ප්රනාන්දුය. ඔහු ශ්රී ලංකා විස්සයි විස්ස කණ්ඩායම එක් වරක් නියෝජනය කර තිබේ. සහන් ආරච්චිගේ, රමේෂ් මෙන්ඩිස්, දුෂාන් හේමන්ත, ලහිරු උදාර ශ්රි ලංකා විස්සයි20 කණඩායම වෙනුවෙන් එක් වරක් හෝ ක්රීඩා කළ ක්රීඩකයින්ය. එහෙත් කඩුළු 07ක් දැවී ඔවුහු ලකුණු 133කට සීමා වූහ.
ලකුණු 133ක් යනු මොන මට්ටමක හෝ විස්සයි විස්ස අවසන් මහා තරගයකට ප්රමාණවත් වන ලකුණු සංඛ්යවක් නොවේ. එය සටන්කාමී ඇෆ්ගන් ක්රීඩකයෝ පෙන්වා දුන්හ. තමන්ගේ රටටවත් ක්රීඩා පිටියක් නැතිව ක්රිකට් ගසා ආසියානු ශූරයින් වූ දෙවැනි පෙළ ඇෆ්ගන් කණ්ඩායම තමන්ගේ ඊලඟ පරම්පරාවේ තරම සහතික කර පෙන්වූහ.
බිලාල් සමී පන්දු ඕවර 4ම යවා ලකුණු 22කට කඩුළු 3ක්, ඒ.එම්. ගසන්ෆා පන්දු ඕවර 4ම යවා ලකුණු 14කට කඩුළු 02ක් ලැබුවේය. ශ්රී ලංකා කණ්ඩායමේ කණ්ඩායමේ දුවද්දී දැවී යෑම් දෙකකි. පන්දු ඕවර 20 තුළ දි කඩුළු 7කට ලකුණු 133කි.
ලකුණු 134ක ජයග්රාහී ඉලක්කයක් හඹා යෑමට පැමිණි ඇෆ්ගන් කණ්ඩායමේ ආරම්භක පිතිකරු සුබයිඩ් අක්බාරි සහන් ආරච්චිගේ යැවූ ඉනිමේ ආරම්භක පන්දු ඕවරයේ පළමු පන්දුවටම දැවී ගිය ද අංක 2 පිතිකරු සෙඩික්උල්ලා අටල් වගකීම සිය අතට ගත්තේය.
ඔහු පන්දු 55ක දී නොදැවී ලකුණු 55ක් ලැබුවේය. ඒ හතරේ පහර 3ක් සහ හයේ පහරක් සමගිනි. නායක දර්විෂ් රසූලි පන්දු 20ක දී ලකුණු 24ක්, කරීම් ජැනට් පන්දු 27ක දී හයේ පහර 3ක් සමග ලකුණු 33ක්, මොහොමඩ් ඉෂාක් පන්දු 6ක දී නොදැවි ලකුණු 16ක් ලබා ගත්තේය.
අවසානයේ දී පන්දු 11ක් ඉතිරිව තිබෙද්දී කඩුළු 07ක විශිෂ්ට ජයග්රහණයක් ඇෆ්ගන් තරුණයෝ ලැබූහ.
සහන් ආරච්චිගේ ලකුණු 8කට කඩුල්ලක්, දුෂාන් හේමන්ත ලකුණු 26කට කඩුල්ලක්, ඉෂාන් මාලින්ග ලකුණු 20කට කඩුල්ලක් ලැබුවේය.
දැන් දෙවැනි පෙළ ආසියානු ශූරයින් ඇෆ්ගනිස්ථානය ය. ජීවිතයේ අන්ත කටුක අත්දැකීම් සහිතව, විටෙක අවතැන් කඳවුරු වල හැදෙමින් ජීවිතය සීතල කටුක යවුල් බඳුව ඇනෙමින් රිදුම් දෙද්දී අත් නොහැර සටන් වදිමින් ලෝකයේ ආලෝකය සොයා යන්නට උත්සාහ කරන ඇෆ්ගන් තරුණයින් ගෞරවයට පාත්ර විය යුතු බව සිතමු.
