මනම්පිටිය නිමල් ජයරත්න –
නිවුන් සොයුරන් දෙදෙනෙකු සම්බුද්ධ ශාසනයට ඇතුළත් වී සම්බුද්ධ ශාසනය සහ ප්රදේශයේ ගිහි දායකකාරකාදීන් වෙනුවෙන් අමිල සේවාවක් සිදුකර විහාරස්ථානයද සංවර්ධනය කර ගනිමින් තරුණයන්ට දහම් මඟ කියාදීමේ පුවතක් අරලගංවිල බමුණාකටුව බෞද්ධ විහාරස්ථානයෙන් අපට වාර්තා විය.
2011 වර්ෂයේ නොවැම්බර් මස 11 වෙනිදා ඓතිහාසික තිස්සමහාරාම රාජමහා විහාරස්ථානයේදී එකට පැවිදි වූ මෙම දෙනම අරලගංවිල බමුණාකොටුව බෞද්ධ විහාරයේ වැඩ වාසය කරති.
බදුල්ලේ රකිත ස්වාමීන් වහන්සේ සහ, හම්බන්තොට සුඛිත ස්වාමීන් වහන්සේ යන මෙම නිවුන් දෙනම විහාරස්ථානයේ වැඩ වාසය කරමින් දිවයිනේ බෞද්ධ කාරකකාදීන් මෙන්ම දානපතින්, සම්බන්ධ කරමින් විහාරස්ථානයේ අඩු පාඩුවක්ව පැවැති අභිනව ඉඳිවුන බෝධි ප්රාකාරය රන්වැට හා සමාධි බුද්ධ ප්රතිමා නිරාවරණය කිරීම පසුගිය 10 වෙනිදා උත්කර්ෂවත් අන්දමින්, ගරුතර මහා සංඝරත්නය ආශිර්වාදයෙන් යුද හමුදාව, සහ ශ්රී ලංකා පොලිසිය, ව්යාපාරික ප්රජාවගේ හා දායක කාරකාදීන්ගේ, සහභාගිත්වයෙන් සිදුකෙරිණි.
මීට සමගාමීව ශ්රී රඛිත දහම්පාසලේ ශිෂ්ය නායකයින් සඳහා නිල ලාංඡනය පැළඳවීම සහ වසරේ වැඩිම පැමිණීම වෙනුවෙන් ත්යාග සහතික ලබාදීමද මෙහිදී සිදුවූහ.
විහාරාධිපති පූජ්ය බදුල්ලෙ රඛිත ස්වාමින් වහන්සේගේ අනුශාසකත්වයෙන් සිදු වූ මෙම උත්සවය සඳහා ඓතිහාසික දකුණුලක තිස්සමහාරාම රාජමහා විහාරාධිපති මල්වතු පාර්ශවයේ මාතර හම්බන්තොට දෙපලාතේ ප්රධාන සංඝ නායක දේවාලේගම ධම්මසේනාභිධාන නාහිමියන්, දකුණුලක ඓතිහාසික මාතර වෙහෙරහේනෙ රාජමහා විහාරාධිපති දක්ෂිණ ලංකාවේ ප්රධාන සංඝනායක අතිපූජනීය කෑගල්ලෙ රතනසාරභිධාන නාහිමියන් වැඩම කර සිටියහ.
මෙම අවස්ථාවට නිවාස ඉදිකිරීම් සංවර්ධන හා සම්පාදන නියෝජ්ය අමාත්ය ටී.බී සරත්, දිඹුලාගල ප්රාදේශීය සභාවේ සභාපති ගයාන් චතුරංග යුද්ධ හමුදාවේ මේජර් ජෙනරාල් නිලන්ත ප්රේමරත්න, පොළොන්නරුව ජ්යෙෂ්ඨ පොලිස් අධිකාරි බුද්ධික මනතුංග, සම්පත් බැංකුවේ ප්රධාන කළමනාකරු විරන්ද රන්දෙණිය, මහාචාර්ය නාමලී හඳගම ඇතුළු පිරිසක් එක් වී සිටියහ.
