විදේශ රැකියා ලබා දෙන බව පවසමින් රුපියල් කෝටි ගණනක මුදල් වංචා කළ පුද්ගලයෙකු තළාතුඔය පොලීසියේ නිලධාරීන් කණ්ඩායමක් විසින් සැකපිට අත්අඩංගුවට ගෙන ඇත
ඉතාලියේ හා රුමේනියාවේ රැකියා ලබාදෙන බව පවසමින් දිවයිනේ ප්රදේශ රැසක තරුණ තරුණියන් රවටා සැකකරු විසින් රුපියල් ලක්ෂ ගණනින් තම ගිණුමට මුදල් ගෙන්වා ගන්නා බවට චෝදනා එල්ල වීමෙන් පසු තළාතුඔය පොලිසිය කළ විමර්ශනයක ප්රතිඵලයක් ලෙස මේ ජාවාරම්කරුවා පෙරේදා (21) කොටුකරගෙන තිබේ.
රාජ්ය බැංකුවක ඔහුගේ නමින් ඇති ගිනුමකට අතාර්කික ලෙස මුදල් ගලා ඒමත් මාස 06ක් වැනි කෙටි කාලයක් තුළ රුපියල් ලක්ෂ 90ක් ගිනුම වෙත ගලා ඒමත් මුල් කරගෙන මෙම විමර්ශනය ඇරඹී තිබිණි. එහිදී පෙනී ගොස් ඇත්තේ මෙම පුද්ගලයා විවිධ නම්වලින් පෙනී සිටිමින් කාලයක් තිස්සේ මෙම ජාවාරම සිදුකර ඇති බවය.
විමර්ශනය ආරම්භ කරමින් සැකකරු පදිංචිව සිටි මයිලපිටිය හත්බෑය ප්රදේශයේ නිවස පරීක්ෂා කිරීමේ දී රුපියල් 346480ක මුදලක් පොලීසිය සොයාගෙන තිබේ. මෙයට අමතරව විදේශ රැකියා ලබාදෙන බවට කූඨ ලෙස සකස් කරන ලද ලේඛන, රබර් මුද්රා, විදේශ ගමන් බලපත්ර, ජංගම දුරකතන දෙකක් හා රියදුරු බලපත්රයක්, මෝටර් රථ ලියාපංදි කිරීමේ දෙපාර්තමේන්තුව යනුවෙන් සඳහන් ව්යාජ ලේඛනයක් පොලීසිය භාරයට ගෙන ඇත.
හලාවත, දියතලාව ආදි ප්රදේශ වල ද මොහු පදිංචිව සිට ඇති අතර විවිධ නම් වලින් පෙනී සිට ඇති බවට පොලීසියට තොරතුරු ලැබී ඇත.
සැකකරු කිසිදු මුදලක් ඔහු ගේ ගිණුම්වලට ගෙන්වාගෙන නොමැති අතර පැමිණිලිකරු මෙන්ම තවත් පුද්ගලයින් ගණනාවකගේ ගිණුම්වලට මොහු මුදල් ගෙන්වාගෙන ඇති බවට සැක කළහැකි තොරතුරු තිබෙන බව පොලීසිය පවසයි.
ලියාපදිංචි නොකර විදේශ රැකියා ආයතනයක් පවත්වාගෙන ගොස් තිබෙන සැකකරු සම්බන්ධයෙන් දිවයිනේ පොලිස් ස්ථාන ගණනාවකට පැමිණිලි ලැබී ඇති බව ද වාර්තා වේ.
මහනුවර කොට්ඨාස භාර ජ්යෙෂ්ඨ පොලිස් අධිකාරි අනුරුද්ධ බණ්ඩාරනායක, පොලිස් අධිකාරි ජානකීගේ උපදෙස් මත තළාතුඔය පොලීසියේ ස්ථානාධිපති ප්රධාන පොලිස් පරීක්ෂක නිශාන්ත අප්පුහාමි, උප පොලිස් පරීක්ෂකවරුන් වන උදයසිරි,ප්රියංකර, ප්රනාන්දු, පොලිස් සැරයන්වරුන් වන 26467 බණ්ඩාර, 33026 ජානක යන නිලධාරීන් වැටලීම සිදුකර තිබේ.
