ශ්රී ලංකාවේ විදුලිබල අංශය ශක්තිමත් කිරීම සඳහා තවදුරටත් සහාය වීමේ අභිලාෂය සහිතව ප්රතිපත්ති මත පදනම් වූ ඩොලර් මිලියන 100 ක ණය මුදලක් අනුමත කිරීමට ආසියානු සංවර්ධන බැංකුව (ADB) කටයුතු කර තිබේ.
මෙම මූල්යකරණය වඩාත් ස්ථාවර සහ මූල්යමය වශයෙන් තිරසාර විදුලිබල අංශයක් ස්ථාපිත කිරීම සඳහා පෙර මුලපිරීම් මත පදනම්ව ලබා දුන් ණය මුදලකි.
ආසියානු සංවර්ධන බැංකුවේ ණය ආධාර මත පදනම් වූ විදුලිබල අංශ ප්රතිසංස්කරණ සහ මූල්ය තිරසාර වැඩසටහනේ දෙවන උප වැඩසටහන වන මෙම වැඩසටහනින් 2024 විදුලිබල පනත සහ එහි 2025 සංශෝධනය මගින් නියම කර ඇති පරිදි, ලංකා විදුලිබල මණ්ඩලය ජනනය, සම්ප්රේෂණය, පද්ධති ක්රියාකාරිත්වය සහ බෙදා හැරීම සඳහා ස්වාධීන අනුප්රාප්තික සමාගම් බවට පත් කිරීම වේගවත් කරනු ඇත.
අදියර ප්රවේශය ව්යුහගත සංක්රාන්තියක් සහතික කරන අතර ප්රතිසංස්කරණ ක්රියාමාර්ගවල ප්රගතිය ද සහතික කර මූල්ය තිරසාරභාවයට ප්රමුඛත්වය දෙන බව මේ පිළිබඳව නිකුත් කර ඇති වාර්තාවේ දැක්වේ.
“ශ්රී ලංකාව තම ආර්ථිකය ස්ථාවර කිරීම සහ මූල්ය තත්ත්වය ශක්තිමත් කිරීම සඳහා වැදගත් ප්රගතියක් ලබා ගෙන තිබෙනවා. හොඳින් ක්රියාත්මක වන විදුලිබල අංශයක් රටේ අඛණ්ඩ පැවැත්මට සහ තිරසාර වර්ධනයට අත්යවශ්යයි…” ශ්රී ලංකාවේ ආසියානු සංවර්ධන බැංකු අධ්යක්ෂ ටකෆුමි කඩෝනෝ පැවසීය.
ශ්රී ලංකාවේ දිගුකාලීන සංවර්ධනයට සහ විදුලිබල අංශයේ ප්රධාන ප්රතිසංස්කරණ ඉදිරියට ගෙන යාමට ආසියානු සංවර්ධන බැංකුව කැප වි සිටින බව පවසන අධ්යක්ෂවරයා මෙම මුලපිරීමෙන් බලශක්ති අංශයේ පාලනය වැඩි දියුණු කිරීම, පෞද්ගලික අංශයේ සහභාගීත්වය පෝෂණය කිරීම සහ තිරසර භාවය සහතික කරමින් ඔරොත්තු දීමේ හැකියාව වැඩි කිරීම සඳහා පුනර්ජනනීය බලශක්ති සංවර්ධනය වේගවත් කිරීම ට අවස්ථාව සලසනු ඇතැයි ද ප්රකාශ කර තිබේ.
