දිනසේන රතුගමගේ –
රටේ ජනවර්ග අතර සංහිඳියාව ගොඩ නැංවීමට නම් යුද්ධයෙන් මියගිය පිරිස සැමරීමේ මුලතිව් උත්සවයට මේ රටේ දෙමළ ජනතාව සමග සිංහල හා මුස්ලිම් ජනතාවද එක් විය යුතු බව දෙමළ ජාතික සන්ධානයේ වන්නි දිස්ත්රික් පාර්ලිමේන්තු මන්ත්රී සෙල්වම් අඩෙයිකලනාදන් අද 27 දා පැවසීය.
මාධ්යවේදීන්ට අදහස් දක්වමින් මේ බව කියා සිටි මන්ත්රීවරයා රටේම ජනතාව ජනවාර්ගික ප්රශ්නය සංහිදියාව සමානාත්මතාවය ගැන වේදිකාවල හා මහපාරේ කෑකෝ ගැසූවද එය ප්රායෝගික වශයෙන් සිදු කිරීමට එක් නොවන බවද කියා සිටියේය.
වසර තිහක්ම පැවති යුද්ධය නිසා මේ රටේ දෙමළ ජනතාව පමණක් නොව සිංහල හා මුස්ලිම් ජනතාවද මියගොස් ඇති නිසා ඒ මියගිය පිරිස සැමරීම සදහා මෙවර හෝ මුලතිව් ප්රදේශයට සිංහල හා මුස්ලිම් ජනතාවට පැමිණෙන ලෙස තමන් ආරාධනය කරණ බවද ප්රකාශ කළේය.
රජය වහාම ඉල්ලා අස්විය යුතු බව ප්රකාශ කිරීමට සිංහල දෙමළ හා මුස්ලිම් ජනතාව එක්ව ගාලු මුවදොරදී විශාල අරගලයක් පවත්වා ගෙන යාමට හැකියාව ඇත්නම් ඒ ජනතාවට මේ රටේ යුද්ධයෙන් මියගිය පිරිස ජාති භේදයකින් තොරව එකට සිටගෙන සැමරීමට හැකියාව තිබිය යුතු බව මන්ත්රීවරයාගේ අදහසයි.
මැයි මස 18 වෙනිදා මුලතිව් මුල්ලිවයික්කාල් ප්රදේශයේදී දෙමළ ජනතාව විසින් මියගිය එල්.ටී.ටී.ඊ. නායකයා ඇතුලු පිරිස සමරණ බවට සිංහල බෞද්ධ දේශපාලන නායකයින් විසින් ප්රචාරය කොට ඇති මතය මිත්යාවක් බව කී අඩෙයිකලනාදන් මන්ත්රීවරයා සැබෑ වශයෙන්ම යුද්ධයෙන් මියගිය පිරිස එදිනට සමරණ බවද පෙන්වා දුන්නේය.
මේ නිසා මෙවර එම උත්සවයට දකුණේ සිංහල ජනතාව හා මේ රටේ මුස්ලිම් ජනතාව පැමිණ දෙමළ ජනතාව සමග එක්වන ලෙස ආරාධනය කළ මන්ත්රීවරයා එසේ පැමිණෙන පිරිසට අවශ්ය පහසුකම් සලසා දීමට හැකි බවද කියා සිටියේය.
