සූරියවැව නුවන් ජයසේකර –
තණමල්විල අධ්යපන කලාපයට අයත් ප්රධාන පාසලක සිසුවෙකුගෙන් ලද තොරතුරක් මත තීරුබදු රහිතව රටට ගෙන්වා විදෙස් දුම්වැටි අලෙවි කළ සුරියවැව ප්රදේශයේ ව්යාපාරිකයෙකු තණමල්විල පොලිසිය මගින් අත්අඩංගුවට ගෙන වැඩිදුර විමර්ශන කටයුතු සදහා ඊයේ (17 ) රාත්රි සූරියවැව පොලිස් ස්ථානයට බාර දි තිබේ.
සිද්ධිය පෙළ ගැසෙන්නේ මෙසේය.
තණමල්විල පිහිටි එක්තරා ප්රධාන පාසලක 11 වසරේ ඉගෙනුම ලබන දරුවෙකු ඉතා සුක්ෂම ලෙස ඇපල් ,බනානා, ස්ටෝබෙරි වැනි විවිධ රස ගන්වන ලද විදෙස් දුම් වැටි පාසලේ 09 වසරේ ඉගෙනුම ලබන සිසුන් කිහිප දෙනෙකු වෙත අලෙවි කර තිබේ.
මේ පිළිබදව තවත් සිසුවෙකු විසින් විදුහල්පතිවරයාට සිදුකල දැනුම් දීමකට අනුව විදුහල්පති වරයා විසින් අදාල සිසුන් ගෙන්වා පරීක්ෂා කර ඇත. එහිදී එක් සිසුවෙකු සන්තකයේ තිබී මෙම විදෙස් දුම්වැටි දෙකක් සොයාගෙන තිබේ.
පසුව විදුහල්පතිවරයා විසින් මේ පිළිබදව තණමල්විල මුලස්ථාන පොලිස් පරික්ෂක වරයා දැනුවත් කර ඇත. ඒ අනුව ක්රියාත්මක වු තණමල්විල මුලස්ථාන පොලිස් පරික්ෂකවරයා එම අවස්ථාවේදීම පොලිස් කණ්ඩායමක් පොලිස් ස්ථානයට පිටත් කර යවා විදුහල්පති වරයාගෙන් මෙන්න ළමුන් තිදෙනෙකුගෙන්ද ප්රකාශ සටහන් කරගෙන තිබේ.
එහිදී එක් සිසුවෙකු පවසා ඇත්තේ තමන් උපකාරක පන්තියක් සඳහා සූරියවැවට යන බවත් එහිදි සුරියවැව නගරයේ බස් නැවතුම පිටුපස ඇති සිල්ලර කඩයකින් මෙම දුම්වැටි මිළදි ගන්නා බවත්ය. ඒ අනුව ඌව පළාතාභාර උසස් පොලිස් නිලධාරින් මේ පිළිබදව දැනුවත් කිරිමෙන් පසු ඔවුන්ගේ උපදෙස් පරිදි සිසුවාද සමග තණමල්විල පොලිස් නිළධාරීන් කණ්ඩායමක් සූරියවැව ප්රදේශයේ පිහිටි අදාල වෙළදසැල වටලා තිබේ.
එම අවස්ථාවේදී සූරියවැව පිහිටි වෙළදසැලේ තිබී විදෙස් දුම්වැටි 690ක් හා දුම් වැටි අලෙවියෙන් උපයාගෙන තිබූ රුපියල් තුන් ලක්ෂ අසූ අටදහස් පන්සිය අනුවක මුදලක්ද පොලිසිය විසින් අත්අඩංගුවට ගෙන තිබේ.
මුදල් හා දුම්වැටි සමග සූරියවැව නව නගරයේ පදිංචි 38 හැවිරිදි වෙළද සැලේ හිමිකරුද තීරුබදු රහිත විදෙස් දුම් වැටි අලෙවි කිරීමේ චෝදනා මත අත්අඩංගුවට ගෙන තිබේ. සැකකරු සම්බනධයෙන් සිදුකල මුලික විමර්ශන වලදි අනාවරණය වි ඇත්තේ මිට පෙරද අවස්ථා කිහිපයකදිම මෙවැනි නිති විරෝධී දුම්වැටි අලෙවිය සම්බන්ධයෙන් අත්අඩංගුවට පත්ව ඇති බවයි.
සැකකාර පුද්ගලයා මෙම විවිධ රසකාරක සහිත දුම් වැටියක් රුපියල් 100ක මුදලකට අලෙවි කර ඇති අතර අදාල සිසුවා එක් දුම් වැටියක් රුපියල් 200 බැගින් පාසල තුළ අලෙවි කර ඇත.
අත්අඩංගුවට පත් සැකකරු වැඩිදුර විමර්ශන කටයුතු සඳහා හම්බන්තොට මහේස්ත්රාත් අධිකරණයට ඉදිරිපත් කිරිමට තණමල්විල පොලිසිය විසින් සූරියවැව පොලිසියට බාර දි තිබේ.
ඌව පළාතබාර ජ්යෙෂ්ඨ නියෝජ්ය පොලිස්පති මහේසෂ් සේනාරත්න, මොණරාගල කොට්ඨාසභාර ජ්යෙෂ්ඨ පොලිස් අධිකාරී කමල් එම්.ගුණවර්ධන ,තණමල්විල මුලස්ථාන ප්රධාන පොලිස් පරික්ෂක ඩී.එම්.පී.බණ්ඩාරගේ උපදෙස් පරිදි තණ්මල්විල පොලිස් ස්ථානයේ දූෂණ මර්ධන අංශයේ ස්ථානාධිපති පොලිස් පරික්ෂක තිළින, පොලිස් සැරයන් වරුන් වන (40156)තුමාරරත්න,(104486) භවන්ත,(5250)පද්මසිරි,පොලිස් කොස්තාපල් වරුන් වන (19556) ලක්ෂාන් ඇතුළු නිළධාරීන් කණ්ඩායමක් විසින් වැටලිම සිදුකර සැකකරු අත්අඩංගුවට ගෙන තිබේ.
