මේ වනවිට ඇත්තේ ගැටුමකට වඩා අසරණ මිනිසුන්ට මරණ බිය උපදවන ගැඹුරු ව්යසනයකි. කවරදාටත් වඩා ගම් වදින වන අලි වියරු හැසිරීම් ප්රකට කරමින් සිටිති. ගල්ගමුව ,අඹන්පොල, මහව ප්රදේශවල වන අලින් ජන ජීවිතය භීතියෙන් මුසපත් කර ඇති අයුරු අත්විඳින මිනිසුන් දකිමු.
පෙරේදා මැඬියාව, නික වෙලයායේ පදිංචි මවකට සහ දියණියකට වන අලියෙකු පහර දීම නිසා ඒ දෙදෙනාම මියගියහ. ඔවුන්ගේ අවසන් කටයුතු සිදු කළේ අද හවස් වරුවේය.
අදත් (21) වන අලි ප්රහාරයකි. අද දහවල් මෙම සිදුවීම වාර්තා වන්නේ ගල්ගමුව මීගලෑවේ දී ය. එක් කාන්තාවක් මේ මොහොතේ මරණය සමග පොරබදමිනි. එහෙත් සිදුවන්නට ගිය ව්යසනය සිදුවූවා නම් අද රටම මළගෙයකි.
අද දහවල් එකයි තිස්පහට පමණ මීගලෑව බෝංගමුව පාසල නිම වීමෙන් අනතුරුව දරුවො නිවෙස් වෙත යෑමට සූදානම් වූහ. පාසලෙන් පිටවීමට ගේට්ටුව අසලට එන දරුවන් දුටුවේ කිළිපොළා යන දසුනකි. පාසලේ වැට අසල කර පටියක් සහිතව සැරි සරමින් සිටින වන අලියෙකි. වන අලියා නොසන්සුනව හැසිරෙන අයුරු පෙනේ.
දරුවන් වහාම යළි පන්ති කාමර වෙත යොමු කිරීමට විදුහල්පතිවරයා ප්රමුඛ ආචාර්ය මණ්ඩලය කටයුතු කළේය. ඒ වනවිට අසල වූ තවත් පාලසක් වන ගලපිටිය පාසල නිමා වූ දරුවෝ ද පාර දිගේ පෝළිමට එති. වහාම මැදිහත් වු බෝංගමුව පාසලේ ගුරුභවතුන් එම පාසලේ දරුවන්ගේ ගමන නවත්වා වහාම සිය පාසලට ඇතුළු කරගත්තේය.
එම වන අලියා මිනිත්තු කීපයක් තුළදී පාසල අසලින් ගියේය. යළිත් පාසලට අසලට පැමිණියේය. ඒ කාලය අතර පාසල පිටුපස ප්රදේශයේ සිටි කාන්තාවකට පන්නා පහර දී තිබිණි. ඇය දැඩි අසාධ්ය තත්ත්වයෙන් දැන් අනුරාධපුර රෝහලේය.
පාසල තුළ රැඳී සිටිමින් ප්රදේශවාසීන් හා දෙමව්පියන් මෙම අලියා එලවන්නට බොහෝ වේලාවක් තිස්සේ උත්සාහ කළ අයුරු දුටුවෙමු. පැය ගණක් කළ දැඩි උත්සාහයකින් පසුව මිනීමරු අලියා පැරැණි හමුදා කඳවුර භූමිය දෙසට යන්තමින් පන්නා දැමිනි. බඩගින්නෙ සිටි පොඩි උන් ගෙවල්වලට පිටත් කර යවන්නේ ඉන් අනතුරුවය.
මතුවී ඇති ප්රශ්නය වන අලි ගැන කොළඹට වී අලි ටෝක් දෙන සත්ත්ව ප්රේමී ප්රජාව දකිනවාට වඩා බරපතලය. මිනිසුන් ජීවත් වෙන්නේ මරණය සමගය. නොදරුවන් පාසල් යැවීම මරණයට යැවීම තරම්ම බිහිසුණු වී ඇත්තේය. අප දන්නා ඇතැම් ගම්මානවල පසුගිය වසර දෙක තුළ දී අලි ගසා දහ පහළොස් දෙනා මිය ගොස් ඇත. අද වනවිට තත්ත්වය වඩාත් සංකීර්ණය.
අලි ටෝක් නවත්වා පොළොවේ යථාර්ථය තේරුම් ගෙන වැඩේ කරන්නට මේ ආණ්ඩුවට බැරිනම් ආණ්ඩුවේ පැවැත්ම තීන්දු වෙනු ඇත.
