බංග්ලාදේශයේ සේවය කරන ඉන්දීය නිලධාරීන්ගේ පවුල්වල සාමාජිකයින් රටෙන් ඉවත් කර ගැනීමට ඉන්දියාව අඟහරුවාදා තීරණය කළ බව නිල ආරංචි මාර්ග උපුටා දක්වමින් ඉන්දීය මාධ්ය වාර්තා කරයි.
නීතිය හා සාමය පිළිබඳ ඇති වී තිබෙන අස්ථාවර ස්වරූපයත් සමග බංග්ලාදේශයේ පැවැත්වීමට නියමිත පාර්ලිමේන්තු මැතිවරණයට සති කිහිපයකට පෙර ඉන්දීය රජය මෙම තීරණය ගෙන ඇත.
“ආරක්ෂක තත්ත්වය සැලකිල්ලට ගෙන, පූර්වාරක්ෂාව සඳහා පියවරක් ලෙස, මහ කොමසාරිස් කාර්යාලයේ සහ අනෙකුත් තනතුරුවල සිටින අපගේ නිලධාරීන්ගේ පවුල්වල සාමාජිකයින්ට නැවත ඉන්දියාවට පැමිණෙන ලෙස අපි උපදෙස් දී ඇත්තෙමු,” Press Trust of India පුවත් ඒජන්සියට පැවසීය.
පෙබරවාරි 12 වන දින රටේ මහ මැතිවරණයට සමගාමීව ජනමත විචාරණය පැවැත්වීමට නියමිත ය.
විශේෂයෙන් 2026 පෙබරවාරි 12 වන දින බංගලාදේශයේ පැවැත්වීමට නියමිත පාර්ලිමේන්තු මැතිවරණයට අදාලව දේශපාලන ප්රචාරක කටයුතු ආරම්භ වන 22 දා වන විට ප්රචණ්ඩත්වය තීව්ර වෙමින් පවතින බව නිරීක්ෂකයින් පුරෝකථනය කර තිබේ.
මෙතෙක් රට තුළ පැවති තත්ත්වය පැහැදිලි කරන බංග්ලාදේශ හින්දු බෞද්ධ ක්රිස්තියානි එක්සත් කවුන්සිලය (BHBCUC) වැනි සුළුතර අයිතිවාසිකම් සංවිධාන 2025 දෙසැම්බර් මාසයේදී අවම වශයෙන් ඉලක්කගත සිදුවීම් 51 ක් වාර්තා කර ඇති අතර, ඒවාට මිනීමැරුම්, ගිනි තැබීම් සහ පන්සල් කෙලෙසීම ඇතුළත් වේ.
2026 මුල් භාගයේදී හින්දු සුළුතරයට එරෙහි මාරාන්තික ප්රහාරවල නව වැඩිවීමක් මානව හිමිකම් කණ්ඩායම් සහ මාධ්ය වාර්තා කර ඇත. 2026 ජනවාරි මැද භාගය දක්වා දින 45 තුළ අවම වශයෙන් හින්දු භක්තිකයන් 15 දෙනෙකු ඝාතනය කර ඇති බව වාර්තා වේ. ජනවාරි මස මුලදී පමණක් දින 18 ක් තුළ ඝාතන 06 සිදුවිය. මෙම ප්රහාර සුළුතර ඡන්දදායකයින් බිය ගැන්වීමට සහ ඉදිරි මැතිවරණවලට ඔවුන්ගේ සහභාගීත්වය වැළැක්වීමට අදහස් කරන බව විචාරක අදහසය.
නැවත නැවත සිදුවන ප්රහාර රටාව පිළිබඳව ඉන්දීය රජය “දැඩි කනස්සල්ල” පළ කර තිබේ. ඉන්දියාව ස්වකීය රාජ්ය තාන්ත්රිකයින්ගේ පවුල්වල අය බංගලාදේශයෙන් පිට කරගන්නට හදන්නේ මේ පරිසරය තුළය. කෙසේ වෙතත් බංගලාදේශ රජය ප්රකාශ කර ඇත්තේ දැනට වාර්ගික ඝාතන ලෙස හඳුන්වා ඇති මෑත කාලීන ඝාතන ප්රචන්ඩත්වයේ ප්රකාශ වීමක් මිස ඉලක්ක ගත වාර්ගික ප්රචන්ඩත්වයක් මුදා හැරීමක් නොවන බවය.
