ශ්රියානි විජේසිංහ –
පරිපූරක වෛද්ය සේවාවේ පුරප්පාඩු 1300 ට වඩා පැවතීම හේතුවෙන් රෝගී සත්කාර සේවාවන් නිසි පරිදි කර ගෙන යාමට නොහැකි තත්වයක් උදාවී ඇතැයි පරිපූරක වෛද්ය වෘත්තීයවේදීන්ගේ ඒකාබද්ධ බල මණ්ඩලය සඳහන් කරයි.
මේ හේතුවෙන් විකිරණ ප්රතිකාරයන්, එක්ස්කිරණ ප්රතිකාරයන්, කථන, ශ්රවණ හා භෞත චිකිත්සක ප්රතිකාරයන් පමණක් නොව ඖෂධ නිකුත් කිරීම් හා රසායනාගාර පරීක්ෂණයන් සිදුකිරීම බරපතල ලෙස ප්රමාද වන බව එම බලමණ්ඩලයේ ලේකම් චානක ධර්මවික්රම පවසා සිටියි.
රෝගයන් නිශ්චිතව හඳුනා ගැනීම සඳහා සිදුකරන රසායනාගාර පරීක්ෂණයන් හා විකිරණ පරික්ෂණයන් නිසිවෙලාවට සිදුනොවීම හේතුවෙන් රෝගීන්ට සිදුකළ යුතු ප්රතිකාර හා සැත්කම් කටයුතු දින නියමයක් නොමැතිව කල් දැමීමට සිදුව තිබෙන බව ඔහු පැවසුවේය.
රෝහල්වල නව ඒකක සහ වාට්ටු සංකීර්ණයන් ඉදි කළද ඒ සඳහා යෙදවිය යුතු මානව සම්පත ප්රමාණවත් පරිදි නොමැති වීම හේතුවෙන් රෝග ප්රතිකාර කටයුතු බොහෝ දුරට අඩාල වී ඇතැයි ද හෙතෙම පවසා සිටියි.
මේ පිළිබඳව සෞඛ්ය බලධාරීන් අවස්ථා ගණනාවකදීම දැනුවත් කර ඇතත් මේ වනතෙක් මේ සම්බන්ධව සාධනීය මැදිහත්වීමක් සිදු කර නොමැති බව ලේකම්වරයා අවධාරණය කරයි.
පසුගිය කාලය පුරා මෙම වෘත්තිකයන් විදෙස්ගත වීම සහ සේවයෙන් ඉවත්වීම හේතුවෙන් මෙම තත්ත්වය උග්ර වී ඇති අතරම උපාධිධාරීන්ගේ බඳවා ගැනීම් අඩාල වීමද තත්වයට තවත් දරුණු අතට පත්ව ඇති බව හෙතෙම පෙන්වාදේ.
විශේෂයෙන්ම මෙම සේවය අතහැර යන හෝ විදෙස් ගතවන නිලධාරීන් සේවාව තුළ රඳවා ගැනීම සඳහා ඔවුන්ට සුදුසු සේවා තත්ත්වයක් නිර්මාණය කිරීමේ වගකීම සෞඛ්ය අමාත්යාංශය සතු වූවත් ඒ සඳහා කිසිදු විධිමත් වැඩ පිළිවෙළක් සෞඛ්ය අමාත්යාංශය මේ වන තෙක් ක්රියාත්මක කොට නොමැති බව සංගමය චෝදනා කරයි.
මේ වන විට නැවතී ඇති නවක නිලධාරීන් බඳවා ගැනීම් කටයුත්ත කඩිනම් කළ යුතු අතරම දැනට සේවාවේ රැඳී සිටින නිලධාරීන් තවදුරටත් සේවාව තුළ රඳවා ගැනීම සඳහා විශේෂ වැඩ පිළිවෙළක් කඩිනමින් සකස් කල යුතු බව සෞඛ්ය බලධාරීන්ට මේ වන විටත් දැනුම් දී ඇතැයි සංගමයේ ලේකම්වරයා අවධාරණය කරයි.
