ගිනිකොණ දිග බෙංගාල බොක්ක මුහුදු ප්රදේශයේ පැවැති අඩු පීඩන කලාපය අද (25) උදෑසන 05.30ට පමණ පීඩන අවපාතයක් දක්වා වර්ධනය වීමත් සමග අධික වර්ෂා තත්ත්වයක් ඇති වන බවත්, ලබන 28 දා තෙක් එම වර්ෂා තත්ත්වය පවතින බවත් කාලගුණ විද්යා දෙපාර්තමේන්තුව පුරෝකථනය කරයි.
මඩකලපුවේ සිට කිලෝමීටර් 900ක් පමණ ඊසාන දෙසින් උතුරු අක්ෂාංශ 10.9ත්, නැගෙනහිර දේශාංශ 89.0ත් ආශ්රිතව ස්ථාන ගතව පැවතුණු මෙම අඩුපීඩන කලාපය බටහිරට බරව වයඹ දිශාවට ගමන් කරමින් මේ වනවිට ගිනිකොන දිග බෙංගාලබොක්කේ පවතින අඩු පීඩන කලාපය හෙට (26) දින ගැඹුරු පීඩන අවපාතයක් සහ 27 වැනි දින සුළිකුණාටුවක් දක්වා තව දුරටත් වර්ධනය වන බවය.
අඩුපීඩන කලාපය හේතුවෙන් බස්නාහිර, සබරගමුව, මධ්යම, වයඹ, උතුරු සහ උතුරු මැද පළාත්වලටත්, ගාල්ල සහ මාතර දිස්ත්රික්කවලටත්, ත්රී කුණාලමය දිස්ත්රික්කයටත් මිලි මීටර 100ක පමණ තද වැසි ඇති විය හැකි බව කාලගුණ විද්යා දෙපාර්තමේන්තුව කියන්නේය.
මේ හේතුවෙන් උතුරු අක්ෂාංශ 05ත් 15ක් සහ නැගෙනහිර දේශාංශ 80-95ත් අතරට වැටෙන බෙංගාල බොක්ක සහ නැගෙනහිර මුහුදු ප්රදේශවල නැවත දැනුම්දෙනතුරු ධීවර සහ නාවික කටයුතුවලින් වැළකී සිටින ලෙස කාලගුණ විද්යා දෙපාර්තමේන්තුව අදාළ පාර්ශ්වයන්ගෙන් ඉල්ලීමක් කර තිබේ. විශේෂයෙන්ම මෙම ගැඹුුරු මුහුදු කලාපයේ ධීවර කටයුතුවල යෙදෙන බහුදින ධීවර යාත්රාවලට වහාම එම කලාපයෙන් ඉවත් වන ලෙස දැනුම් දීමක් කර තිබේ.
පසුගිය පැය 24 තුළ වැඩිම වර්ෂාපතනය කළුතර නෑබඩ ප්රදේශයෙන් වාර්තා වී ඇත. එය මිලි මීටර 121කි.
මේ වනවිට කළු ගඟේ සහ නිල්වලා ගඟේ ජල මට්ට්ම සුළු ගංවතුර මට්ටමක් ඇතිවීමේ අවදානමක් ඇති වී තිබේ. මේ වනවිට කළු ගඟේ අංගම්මන කුඩාවැව, බුලත්සිංහල අවට පහත් බිම් ප්රදේශ වෙත සුළු ගංවතුර මට්ටමක් පිළිබඳ අවදානම් නිවේදන නිකුත් කළ බව වාරිමාර්ග දෙපාර්තමේන්තුවේ ජලවිද්යා හා ආපදා කළමනාකරණ අංශ ප්රධානී එල්.එස් සූරිය බණ්ඩාර පවසයි.
කැලණි ගඟ සහ අත්තනගලු ගංගා ආශ්රිත පහත් බිම්වල ජනතාවට අවධානයෙන් පසුවන ලෙසද වාරිමාර්ග දෙපාර්තමේන්තුව පවසයි.
