දිනසේන රතුගමගේ –
රන්භාණ්ඩ හොරුන්ගෙන් බේරී රාජකාරි කිරීමට අවකාශයක් නොමැති බවත්, මුළු මන්නාරමේම කාන්තාවන් මේ සංවිධානාත්මක කොල්ලකරුවන් නිසා අනාරක්ෂිත බවත් කියමින් මන්නාරමේ සෞඛ්ය සේවා නිලධාරිනියන් රැසක් ඊයේ ( 21) මන්නාරම නගරයේ විරෝධතාවයක් දියත් කළහ.
මෙම විරෝධතාවයට සහභාගී වූව සෞඛ්ය සේවා නිලධාරිනියන් පිරිස මන්නාරම දිස්ත්රික් සෞඛ්ය වෛද්ය නිලධාරී කාර්යාලය ඉදිරිපිටින් පෙළපාළියක් ආරම්භ කොට නගරය හරහා ගමන් කරමින් අවසානයේදී ජෙයෂ්ඨ පොලිස් අධිකාරීවරයා ඇතුලු මන්නාරමේ පොලිස් බලධාරීන්ට විශේෂ සන්දේශයක් බාර දෙනු ලැබීය.
සේවය අවසන් කොට නිවස බලා යමින් සිටි මන්නාරමේ පවුල් සෞඛ්ය සේවිකාවක් පැහැරගෙන ඇයව පාලු ස්ථානයකට රැගෙන ගොස් මරණීය තර්ජනය කොට බිය වද්දා ඇය සතුව තිබූ රුපියල් ලක්ෂ නවයක් පමණ වටිනා රන් භාණ්ඩ කොල්ල කා පලා යෑමට මෙම කොල්ලකරුවන් කටයුතු කර ඇත.
මීට පෙරද මන්නාරමේ සෞඛ්ය නිලධාරිනියන්ගේ හා වෙනත් කාන්තාවන්ගේ රන්භාණ්ඩ අවස්ථා හතරකදී කොල්ල කල්ලි විසින් කොල්ල කා ඇතත් පොලීසියට එම කොල්ලකරුවන් අත් අඩංගුවට ගැනීමට නොහැකි වූ බවට චෝදනා කරමින් මෙම විරෝධතාවය සංවිධානය කොට තිබුණි.
මෙම කොල්ල කල්ලිය සංවිධානාත්මකව කටයුතු කරණ බවත් ඔවුන් යතුරු පදි වලින් මුහුණු ආවරණය කරගෙන පැමිණ මෙම රන් භාණ්ඩ කොල්ලකා පලා යන බවත් පවසන මන්නාරමේ සෞඛ්ය සේවා නිලධාරිනියන් මේ දිනවල රන් පවුමක මිල ඉතා ඉහල මට්ටමකට යාම නිසා රන් භාණ්ඩ කොල්ලකෑමද වැඩි වී ඇති බව පෙන්වා දෙයි.
