අද (15) උදේ උතුරු ඉන්දියාවේ උත්තරාකන්ඩ් ප්රාන්තයේ කේදර්ඝාටි කලාපයේ දී පුද්ගලයින් හත් දෙනෙකු රැගත් හෙලිකොප්ටරයක් කඩා වැටුණු බව ඉන්දීය මාධ්ය වාර්තා කළේය.
අනතුරුට ලක් වී තිබුණේ කේදර්නාත් සිට ගුප්ත්කාෂි දක්වා ගමන් කරමින් තිබූ ආර්යන් ඒවියේෂන් පුද්ගලික සමාගමට අයත් හෙලිකොප්ටරයකි. යානය උදෑසන 5:30 ට පමණ ගුවන්ගත වීමෙන් ටික වේලාවකට පසු කඩා වැටී තිබිණි. යානය කඩා වැටුන උත්තරාකන්ඩ් ප්රාන්තයේ කේදර්ඝාටි හි ගෞරිකුන්ඩ් සහ ත්රිජුගිනාරායන් කලාපය දුර්ගවලින් පිරි ප්රදේශයකි. ආර්යන් ඒවියේෂන් පුද්ගලික සමාගමට අයත් හෙලිකොප්ටරය ගිනිගෙන දැවී යන්නේ ඒ ප්රදේශයේ දී ය.
උත්තර්කන්ඩ් සිවිල් ගුවන් සේවා සංවර්ධන අධිකාරිය උපුටා දක්වමින් ඉන්දාය ටුඩේ පවසන්නේ හෙලිකොප්ටරය කේදර්නාත් සිට ගුප්ත්කාෂි බලා උදෑසන 5.30 ට පමණ ගුවන් ගත වූ නමුත් ගුවන් ගත වී ටික වේලාවකට පසු කඩා වැටුණ බවය.
රුද්රප්රයාග් දිස්ත්රික් ආපදා කළමනාකරණ නිලධාරී නන්දන් සිං රාජ්වර් මාධ්යයට පවසා ඇත්තේ අයහපත් කාලගුණය හේතුවෙන් ඇති වූ දුර්වල දෘශ්යතාව මධ්යයේ ගෞරිකුන්ඩ් වනාන්තරයට ඉහළින් අනතුර සිදු වූ බවයි.
ගාර්වාල් කලාපයේ ප්රධාන පොලිස් නිලධාරී රජීව් ස්වරූප් අනතුර තහවුරු කළ අතර අනතුර සිදුවූ ස්ථානය ඉතා දුර බැහැර ප්රදේශයක් බව පැවසීය. පොලිස් සහ රාජ්ය ආපදා ප්රතිචාර බලකායේ කණ්ඩායම් එම ස්ථානයට යවා ඇති බව ඔහු තවදුරටත් කීවේය.
උත්තර්කන්ඩ් ප්රධාන අමාත්ය පුෂ්කර් සිං ධාමි ‘X’ සමාජ මාධ්ය වේදිකාවේ සිද්ධියට ප්රතිචාර දක්වමින් මෙසේ කීවේය. “රුද්රප්රයාග් දිස්ත්රික්කයේ හෙලිකොප්ටර් අනතුරක් පිළිබඳව ඉතා කණගාටුදායක පුවතක් ලැබී තිබේ. ප්රාදේශීය පරිපාලනය සහ අනෙකුත් ගලවා ගැනීමේ කණ්ඩායම් සහන සහ ගලවා ගැනීමේ මෙහෙයුම්වල නිරත වේ. සියලුම සංචාරකයින්ගේ ආරක්ෂාව සඳහා මම බාබා කේදාර්ට යාඥා කරමි.”
මීට පෙර, මැයි 8 වන දින, ගංගෝත්රි ධාම් වෙත යන අතරතුර හෙලිකොප්ටරයක් උත්තර්කාෂි දිස්ත්රික්කයේ දී කඩා වැටී පුද්ගලයින් හය දෙනෙකු මිය ගියේය. වඩාත් මෑතකදී, ජුනි 7 වන දින, කේදර්නාත් බලා ගමන් කරමින් සිටි තවත් හෙලිකොප්ටරයක් ගුවන්ගත වීමෙන් ටික වේලාවකට පසු තාක්ෂණික දෝෂයක් හේතුවෙන් මාර්ගයකට හදිසි ගොඩබෑමක් සිදු කිරීමට සිදුවිය. නියමුවා තුවාල ලැබූ අතර, යානයේ සිටි මගීන් පස් දෙනාම ආරක්ෂිතව බේරා ගන්නා ලදී.
