තමන්ට එරෙහිව ගොනු කර තිබෙන නඩුවේ “කුමන්ත්රණය” යන චෝදනාව පවත්වාගෙන යාමට නොහැකි බවට තීන්දුවක් ලබා දෙන ලෙස ඉල්ලා යෝෂිත රාජපක්ෂ ගොනු කළ ප්රතිශෝධන පෙත්සම අභියාචනාධිකරණය අද (ජූලි 03) නිෂ්ප්රභ කළේය.
එම පෙත්සම විභාගයට ගත් අනතුරුව අමල් රණරාජා සහ ආචාර්ය සුමුදු ප්රේමචන්ද්ර යන විනිසුරු මඩුල්ල විසින් මෙම තීන්දුව ප්රකාශයට පත් කරන ලදී.
නඩුවේ පසුබිම – මෙම නඩුවට අදාළව 2012 සහ 2015 අතර කාලයේදී රුපියල් කෝටි 08කට අධික මුදලක් විශුද්ධිකරණය කරමින් රත්මලාන සහ දෙහිවල ප්රදේශවල දේපළ මිලදී ගත් බවට යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට් යන අයට එරෙහිව නීතිපතිවරයා විසින් චෝදනා ගොනු කර තිබේ.
පසුකාලීනව ඩේසි ෆොරස්ට් පසුවූ මානසික තත්ත්වය හේතුවෙන් නඩු විභාගයට මුහුණ දීමට නොහැකි බවට ඉදිරිපත් වූ වෛද්ය වාර්තා පදනම් කරගෙන ඇයව නඩුවෙන් නිදහස් කර තිබේ. එහෙත් යෝෂිත රාජපක්ෂට එරෙහි නඩුව ඉදිරියට ගෙන යාමට මහාධිකරණය තීන්දු කළේය.
මෙම නඩුවේ තවත් ප්රධාන අංගයක් වන්නේ කාල්ටන් ස්පෝර්ට්ස් නෙට්වර්ක් (CSN) රූපවාහිනී නාලිකාව සම්බන්ධ මුදල් විශුද්ධිකරණ චෝදනාවන්ය. රුපියල් මිලියන 59.6කට අධික මුදල් බැංකු ගිණුම්වල තැන්පත් කිරීම සහ ඒවායේ නීත්යානුකූල මූලාශ්රය නොදැක්වීම ඇතුළු චෝදනා රැසක් මෙහි අඩංගු වේ.
අධිකරණ ක්රියාවලිය කොළඹ මහාධිකරණය යෝෂිත රාජපක්ෂ ඉදිරිපත් කළ මූලික විරෝධතාව ප්රතික්ෂේප කිරීමෙන් අනතුරුව ඔහු මෙම ප්රතිශෝධන පෙත්සම අභියාචනාධිකරණයට යොමු කළේය. ජූනි මාසයේදී එම පෙත්සම විභාගයට ගත් අභියාචනාධිකරණය ජූලි 03 වැනිදා තීන්දුව ලබා දීමට නියම කර තිබුණි.
අභියාචනාධිකරණයේ මෙම තීන්දුවත් සමග අදාළ නඩුව කොළඹ මහාධිකරණය ඉදිරියේ බාධාවකින් තොරව ඉදිරියටම කරගෙන යාමට මාර්ගය විවෘත වී ඇත.
