කපිල කේ හීනටියන –
මැදපෙරදිග කලාපයේ පවතින දරුණු යුදමය වාතාවරණය අවසන් කිරීම සඳහා වන මූලික සාම ගිවිසුමකට අද (ඉරිදා) දිනයේදී අත්සන් තැබීමට නියමිත බව ඇමෙරිකානු ජනාධිපති ඩොනල්ඩ් ට්රම්ප් සහ මෙම සාකච්ඡා සඳහා මැදිහත්කරු ලෙස කටයුතු කරන පාකිස්තානය ප්රකාශ කර සිටී. කෙසේ වෙතත්, ඉරානය පවසන්නේ මෙතරම් ඉක්මනින් එවැනි ගිවිසුමකට අත්සන් තැබීමක් සිදු නොවන බවයි.
පාකිස්තාන අග්රාමාත්ය ෂෙහ්බාස් ෂරීෆ් ප්රකාශ කළේ දෙපාර්ශවයම සාම ගිවිසුමක මූලික රාමුවකට එකඟ වී ඇති බවත්, අද දිනයේ විද්යුත් ක්රමවේදයක් ඔස්සේ (electronic signing) ඊට අත්සන් තැබීමට ඉස්ලාමාබාද් අගනුවර සූදානමින් සිටින බවත්ය. ඉන් අනතුරුව ලබන සතියේදී තාක්ෂණික මට්ටමේ සාකච්ඡා පැවැත්වීමට නියමිතව තිබේ.
ඇමෙරිකානු ජනාධිපති ඩොනල්ඩ් ට්රම්ප් ද සමාජ මාධ්ය සටහනක් තබමින් සනාථ කර සිටියේ ඉරානය සමඟ වන මෙම ගිවිසුම අද දින අත්සන් කිරීමට නියමිතව ඇති බවයි. එමෙන්ම, ගිවිසුම අත්සන් කිරීමෙන් පසු ලෝකයේ තෙල් සැපයුම සඳහා අතිශය වැදගත් සන්ධිස්ථානයක් වන, දැනට ඉරානය විසින් අවහිර කර ඇති ‘හෝමුස් සමුද්ර සන්ධිය’ (Strait of Hormuz) වහාම සැමට විවෘත වන බවද ඔහු වැඩිදුරටත් සඳහන් කර තිබේ.
කෙසේ වෙතත්, ඊයේ (සෙනසුරාදා) අදහස් දැක්වූ ඉරාන විදේශ අමාත්යාංශයේ ප්රකාශක එස්මයිල් බගායි, ගිවිසුම අත්සන් කරන දිනය පිළිබඳව අදහස් දැක්වීමේදී ප්රවේශම් විය යුතු බව අවධාරණය කළේය. අවබෝධතා ගිවිසුම අත්සන් කරන නිශ්චිත දිනය පිළිබඳව බලා සිටීමට සිදු වන බවත්, එය අනිවාර්යයෙන්ම හෙට (අද) සිදු නොවන බවත් ඉරාන රාජ්ය මාධ්ය ඔස්සේ ඔහු පවසා තිබේ. එහිදී ඔහු වැඩිදුරටත් පවසා ඇත්තේ ඉදිරි දිනවලදී මෙවැනි දෙයක් සිදුවීමේ හැකියාව බැහැර කළ නොහැකි වුවද, අනෙක් පාර්ශවයේ පවතින දෙගිඩියාව හේතුවෙන් මේ පිළිබඳව අදහස් දැක්වීමේදී ප්රවේශම් විය යුතු බවයි.
මේ සම්බන්ධයෙන් මාධ්ය වෙත අදහස් දැක්වූ ඇමෙරිකානු නිලධාරියෙකු නිශ්චිත දිනයක් ප්රකාශ කිරීම ප්රතික්ෂේප කළද, මෙය ඉතා ශක්තිමත් සහ විශිෂ්ට ගිවිසුමක් වනු ඇති බව ප්රකාශ කර ඇත.
පසුගිය පෙබරවාරි 28 වැනිදා ඇමෙරිකාව සහ ඊශ්රායලය එක්ව ඉරානයට එල්ල කළ ඒකාබද්ධ ප්රහාරත් සමඟින් මෙම මැදපෙරදිග යුද වාතාවරණය ආරම්භ විය. දෙපාර්ශවයම මූලික එකඟතාවයකට පැමිණීමට මෙතරම් සමීප වූ ප්රථම අවස්ථාව මෙය නොවන අතර, පාකිස්තාන අග්රාමාත්ය ෂරීෆ් සිය X ගිණුමේ සටහනක් තබමින් කියා සිටියේ, “අපි වෙන කවරදාකටත් වඩා සාම ගිවිසුමකට ඉතා සමීපව සිටිනවා” යනුවෙනි.
