ශ්රී ලංකාවේ ජාත්යන්තර මට්ටමේ නව පාපන්දු ක්රීඩාංගණයක් ඉදිකිරීම සඳහා මූල්ය ආධාර සැපයීමට ජාත්යන්තර පාපන්දු සම්මේලනය (FIFA) එකඟතාව පළ කර ඇති බව විදේශ කටයුතු අමාත්ය විජිත හේරත් පවසයි.
පසුගිය වසරේ FIFA උප සභාපතිවරයා මෙරට සිදුකළ සංචාරයකදී ඇති කරගත් අවබෝධතාවයකට අනුව මීගමුව, කඩොල්කැලේ ප්රදේශයේ පිහිටි ආයෝජන මණ්ඩලයට (BOI) අයත් ඉඩමක මෙම යෝජිත ක්රීඩාංගණය ඉදිකිරීමට නියමිතය. මෙම ව්යාපෘතියට අදාළ මූලික නෛතික කටයුතු මේ වන විටත් ආරම්භ කර ඇති අතර, එය දිගු කලක් තිස්සේ බලාපොරොත්තු වූ ක්රීඩාංගණ සිහිනය සැබෑ කරගැනීමේ ස්ථාවර පියවරක් වනු ඇත.
මෙම ක්රීඩාංගණයේ ඉදිකිරීම් අවසන් වූ පසු ශ්රී ලංකාවට ජාත්යන්තර පාපන්දු තරගාවලි සත්කාරකත්වය දැරීමට අවස්ථාව ලැබෙන අතර, එමඟින් ශ්රී ලංකාව ගෝලීය පාපන්දු සිතියමට එක් කිරීමට ද අපේක්ෂා කෙරේ.
කොළඹ, යෝර්ක් වීදියේ දී ඊයේ (ජූනි 11) ආරම්භ කෙරුණු ‘FIFA ලෝක කුසලාන ප්රේක්ෂක කලාපය’ (FIFA World Cup Fan Zone 2026) නිල වශයෙන් විවෘත කිරීමේ උත්සවයේදී විදේශ කටයුතු අමාත්යවරයා මේ බව අනාවරණය කළේය. මෙම ප්රේක්ෂක කලාපය නිර්මාණය කර ඇත්තේ දේශීය පාපන්දු ලෝලීන්ට සජීවී ලෝක කුසලාන තරග විකාශන නැරඹීමට අවස්ථාව සලසා දෙමිනි.
විදේශ කටයුතු අමාත්යවරයාගේ ප්රධානත්වයෙන් පැවැති මෙම සමාරම්භක උත්සවයේදී, ක්රීඩාංගණ ව්යාපෘතිය පිළිබඳව පමණක් නොව ශ්රී ලංකාවේ පාපන්දු ක්රීඩාව සහ ක්රීඩා සංචාරක ව්යාපාරය (Sports Tourism) ශක්තිමත් කිරීමේ පුළුල් දැක්ම පිළිබඳව ද අවධාරණය කෙරිණි.
එහිදී අදහස් දැක්වූ අමාත්යවරයා කියා සිටියේ FIFA අනුග්රහය ලබන මෙම ක්රීඩාංගණය මෙරට ක්රීඩකයන්ට නව අවස්ථා රැසක් උදාකර දෙන අතරම ශ්රී ලංකාව වෙත ජාත්යන්තර අවධානය දිනා ගැනීමට ද සමත් වන බවෙ. මෙරට ක්රීඩා ක්ෂේත්රය තුළ සාම්ප්රදායිකව ක්රිකට් ක්රීඩාව කැපී පෙනුණ ද, පාපන්දු ක්රීඩාව සතුව ද විශාල නොදියුණු විභවයක් පවතින බවත්, ජාත්යන්තර පාපන්දු ක්ෂේත්රය තුළ ශ්රී ලංකාවේ නාමය වේගයෙන් ඔසවා තැබීමට සහ ක්රීඩා ඉසව් හරහා සංචාරකයන් ආකර්ෂණය කර ගැනීමට හැකියාව පවතින බවත් ඔහු පෙන්වා දුන්නේය.
සංචාරක ක්ෂේත්රයේ ප්රකෘතිමත් වීම පිළිබඳව ද අදහස් දැක්වූ අමාත්යවරයා, පවතින අභියෝගාත්මක ගෝලීය තත්ත්වයන් මධ්යයේ වුවද, මේ වසරේ මැයි 31 වන විට ශ්රී ලංකාවට පැමිණි සංචාරකයින් සංඛ්යාව මිලියනය ඉක්මවා ගොස් ඇති බවත්, එය ශ්රී ලංකාව කෙරෙහි ඇති ජාත්යන්තර විශ්වාසය නැවත තහවුරු කරන්නක් බවත් වැඩිදුරටත් සඳහන් කළේය.
