අසේල කුරුළුවංශ –
මහනුවර, නත්තරම්පොත ප්රදේශයේ කුලී නිවසක සඟවා තිබූ දිග කඩුවක් සහ ජීව අත්බෝම්බ තුනක් මහනුවර පොලිසියේ විශේෂ අපරාධ විමර්ශන අංශය මගින් අද උදේ (18) සොයාගෙන තිබේ.
මෙම නිවස දැනට කන්කසන්තුරේ ප්රදේශයේ රාජකාරි කරනු ලබන සහකාර පොලිස් අධිකාරීවරයෙකුට අයත් එකක් බව පොලිසිය පවසයි.
අදාළ සහකාර පොලිස් අධිකාරීවරයාගේ බිරිඳ විසින් මහනුවර කොට්ඨාසභාර ජ්යෙෂ්ඨ පොලිස් අධිකාරීවරයා වෙත ලබාදුන් රහසිගත තොරතුරකට අනුව මෙම සෝදිසි කිරීම සිදුකර ඇත.
පොලිස් පරීක්ෂණ මගින් අනාවරණය වී ඇත්තේ තිදරු පියෙකු වන මෙම සහකාර පොලිස් අධිකාරීවරයා සහ ඔහුගේ බිරිඳ අතර වසර 09 ක පමණ කාලයක සිට දැඩි පවුල් ආරවුල් පවතින බවයි.
ඔහුගේ ඇඳුම් පැළඳුම් තිබූ අල්මාරියක් තුළ සඟවා තිබියදී මෙම අත්බෝම්බ සහ කඩුව සොයාගෙන ඇති අතර, ඒවා වැඩිදුර විමර්ශන කටයුතු සඳහා පල්ලේකැලේ පොලීසිය වෙත ඉදිරිපත් කර තිබේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
සිද්ධිය සම්බන්ධයෙන් සහකාර පොලිස් අධිකාරීවරයාගෙන් ප්රකාශයක් ලබා ගැනීමට නියමිත අතර මහනුවර විශේෂ අපරාධ විමර්ශන ඒකකය සහ පල්ලේකැලේ පොලීසිය ඒකාබද්ධව පුළුල් පරීක්ෂණ පවත්වයි.
