ඉඳුනිල් කහටපිටිය –
දීර්ඝ කාලයක් ශ්රී ලංකා ක්රිකට් ආයතනයේ සභාපති ධුරය හෙබවූ ශම්මි සිල්වා හෙට (28) දිනයේදී සිය ධුරයෙන් ඉල්ලා අස්වනු ඇතැයි අපේක්ෂා කෙරේ.
ඒ අනුව වසර හතක කාලයක් පුරා එම ඉහළ තනතුරේ ඔහු නතු කරගෙන සිටි බලය අවසන් වීමට නියමිතය.
මේ කියැවෙන්නේ මේ රටේ ක්රිකට්වලට ආදරය කරන සියලු දෙනාගේම මේ මොහොතේ ප්රාර්ථනාවය. බුකිකාර සුමතිපාලලා ක්රිකට් පරිපාලනය පැවති ගෞරවණීය තත්ත්වයෙන් කුණු කානු පල්ලට ඇද දැමූ පසු එම පාදඩකරණයේ වත්මන් ප්රකාශනය වූයේ ෂම්මි සිල්වා ප්රමුඛ ඔහුගේ කල්ලිය ය. ලංකාදීප පුවත්පත ඇතුළු දේශීය මාධ්ය වාර්තාවලට අනුව, රජයෙන් කරන ලද ඉල්ලීමකට අනුව ඔහු මෙලෙස ධුරයෙන් ඉල්ලා අස්වීමට සූදානම් වන බව සඳහන් වේ. බොහෝ ආරංචි මාර්ග පෙන්වා දෙන්නේ රාජකීය විද්යාලයේ හිටපු ක්රිකට් ක්රීඩකයෙකු මෙන්ම ප්රකට ආයෝජන බැංකුකරුවෙකු වන හිටපු පාර්ලිමේන්තු මන්ත්රී සහ රාජ්ය අමාත්ය එරාන් වික්රමරත්න, ක්රිකට් පරිපාලනය සඳහා පිහිටුවීමට නියමිත අතුරු කමිටුවේ ප්රධානියා ලෙස කටයුතු කරනු ඇති බවය.
මේ වර්ධනයට හේතුව කුමක් ද?
සති කිහිපයක සිට පැවති දැඩි කතාබහකින් පසුව මෙම වර්ධනය සිදුවී තිබේ. ක්රීඩකයන්, ප්රේක්ෂකයන් සහ දූෂණ විරෝධී සංවිධානවලින් එල්ල වන දැඩි බලපෑම හේතුවෙන් ශම්මි සිල්වාට ඉල්ලා අස්වන ලෙස ජනාධිපති අනුර කුමාර දිසානායක දැනුම් දී ඇති බව ඩේලි මිරර් පුවත්පත මුලින්ම වාර්තා කළේය.
2019 වසරේ පෙබරවාරි මාසයේදී ප්රථම වරට තේරී පත් වූ සිල්වා, ඉන් අනතුරුව පැවති ඡන්ද කිහිපයකින්ම ජයග්රහණය කළ අතර ඔහුගේ වත්මන් නිල කාලය 2027 වසර දක්වා ක්රියාත්මක වීමට නියමිතව තිබුණි. කෙසේ වෙතත්, ඔහුගේ පාලන කාලය පුරාම ඔහුට දැඩි විවේචන එල්ල විය.
ශ්රී ලංකා ක්රිකට් ආයතනය මෙරට පවතින ධනවත්ම ක්රීඩා ආයතනය වුවද, දූෂණය, මූල්ය අවභාවිතය, නෑදෑ හිතවත්කම් සැලකීම සහ දුර්වල පාලනය සම්බන්ධයෙන් දිගින් දිගටම චෝදනාවලට ලක්විය. බොහෝ පිරිස් පෙන්වා දෙන්නේ මෙම ආයතනය මහජනතාවට සහ ක්රීඩාවට සේවය කරන ආයතනයකට වඩා “පෞද්ගලික ආයතනයක්” ලෙස ක්රියා කරන බවය. විශ්රාමික ශ්රේෂ්ඨාධිකරණ විනිසුරුවරුන්, විගණකාධිපතිවරයා සහ කැබිනට් අනුකමිටුවක් විසින් නිකුත් කරන ලද පරීක්ෂණ වාර්තා මගින්ද එහි පවතින බරපතල ගැටලු පෙන්වා දී ඇත.
විශේෂයෙන්ම ශ්රී ලංකාව සම සත්කාරකත්වය දැරූ පන්දුවාර විස්සයි විස්ස ලෝක කුසලාන තරඟාවලියෙන් ශ්රී ලංකා කණ්ඩායම මුල් වටයේදීම ඉවත් වීම ඇතුළු ජාතික කණ්ඩායමේ දුර්වල ක්රීඩාවිලාශය මෙම විවේචන තවත් දැඩි කිරීමට හේතු විය. මේ නිසා ක්රීඩා ලෝලීන් සහ ක්රීඩකයන් එක්ව විරෝධතා සංවිධානය කළ අතර සමාජ මාධ්ය හරහාද පාලන වෙනසක් සඳහා ප්රබල ප්රචාරණ දියත් කළහ.
තත්ත්වය අපැහැදිලියි
එසේ වුවද, වත්මන් තත්ත්වය තවමත් අපැහැදිලි ස්වභාවයක් ගනී. ශ්රී ලංකා ක්රිකට් ආයතනයේ ප්රධාන විධායක නිලධාරී ඈෂ්ලි ද සිල්වා ප්රකාශ කළේ ඉල්ලා අස්වන ලෙස රජයෙන් නිල වශයෙන් කළ කිසිදු ඉල්ලීමක් පිළිබඳව තම ආයතනය දැනුවත් නැති බවත්, ඒ පිළිබඳව තොරතුරු ලැබුණේ මාධ්ය වාර්තා හරහා පමණක් බවත්ය.
කැබිනට් ප්රකාශක වෛද්ය නලින්ද ජයතිස්ස ද තහවුරු කළේ මේ පිළිබඳව කැබිනට් මණ්ඩලයේ සාකච්ඡා නොවූ බවත් ජනාධිපතිවරයා එවැනි ඉල්ලීමක් කර නොමැති බවත්ය. ඕනෑම වෙනසක් සිදුකිරීමේදී ජාත්යන්තර ක්රිකට් කවුන්සිලයේ (ICC) නීතිරීතිවලට ගරු කරමින් නිසි ක්රියා පටිපාටිය අනුගමනය කළ යුතු බව රජය අවධාරණය කර ඇත. එසේ නොවුණහොත් ශ්රී ලංකා ක්රිකට් වෙත ජාත්යන්තර තහනමක් පැනවීමේ අවදානමක් පවතින බව රජයේ මතයයි.
මෙම ප්රතික්ෂේප කිරීම් මධ්යයේ වුවද, ජනාධිපති දිසානායක සහ ශම්මි සිල්වා අතර හමුවක් සිදුවූ බවට හෝ සිදුවීමට නියමිත බවට වාර්තා පළවන අතර මැයි 1 වනදා පමණ වන විට යම් වෙනසක් සිදුවනු ඇතැයි අපේක්ෂා කෙරේ. ප්රධාන ආයතන තුළ පිරිසිදු පාලනයක් ස්ථාපිත කරන බවට පොරොන්දු වූ නව රජය යටතේ මෙම වෙනස පොදු ජනතාව අපේක්ෂා කරන බැවින් මෙවැනි තීන්දු ගැනීමට ප්රමාද වීම හරහා මහ ජන වාරෝධය ද රජය වෙත එල්ලවන පසුබිමක් නිර්මාණය වෙමින් තිබේ.
එරාන් සහ ෂම්මි
එරාන් වික්රමරත්න පොදුවේ දේශපාලකයෙක් වශයෙන් ද ගෞරවයට පාත්ර වූ චරිතයක් මෙන්ම ශ්රී ලංකා ක්රිකට් වැනි ආයතනයක් කළමනාකරණය කිරිමට සුදුසුම පුද්ගලයෙක් බවට රජයේ තක්සේරුව සම්බන්ධව ද ප්රසාදයක් ජනතාව තුළ ඇති වී තිබේ.
පසුගිය වකවානුව තුළ තිබුණේ ශ්රී ලංකාවේ ක්රිකට් නොව ෂම්මිගේ ක්රිකට්ය. ඒ තත්ත්වය තුළ ක්රීඩා ලෝලීන් ක්රිකට් ක්රීඩාවෙන් ඉවත් වීමේ අවදානමක් ද මතුවිය. තරග නැරඹීම වර්ජනය කිරීම සඳහා වූ සැලසුම් සමාජ මාධ්ය ඔස්සේ ක්රියාත්මක වන අයුරු දුටුවෙමු. ප්රේක්ෂාගාර වෙත ක්රීඩා ලෝලීන් ඇතුළු කිරීමේ දී කොල කැබැල්ලක් හෝ පෑනක් රැගෙන ඒමට නොහැකි සේ ඔවුන්ව පරීක්ෂා කිරීමට ආරක්ෂකයින් යොදවන්නට ක්රිකට් ආයතනයට සිදුවුනේය. ක්රීඩා ලෝලීන් ෂම්මිට එරෙහි විරෝධතා පාඨ ජාත්යාන්තර මාධ්ය ඉදිරියේ ප්රදර්ශනය කරනු ඇතැයි ක්රිකට් පරිපාලනය බිය විය. මහජන විරෝධය කොතැනකින් හෝ පුපුරා යනු ඇතැයි වූ බිය මත ක්රිකට් පරිපාලනය ක්රිකට් පවත්වාගෙන ගියේ ප්රේක්ෂකයින් මත මර්ධනයක් පටවමිනි.
පරිපාලන ව්යුහයේ වෙනසක් සමග එන නව අතුරු පාලනයක් හරහා වඩාත් විනිවිදභාවයකින් යුත් පාලනයක්, කණ්ඩායමේ දස්කම් වර්ධනය වීමක් සහ ශ්රී ලංකා ක්රිකට් ක්රීඩාවට නව ආරම්භයක් ලැබෙනු ඇතැයි බොහෝ ක්රිකට් ලෝලීහු බලාපොරොත්තු වන්නේ ඒ නිසාය.
මෙය තවමත් විකාශනය වෙමින් පවතින පුවතකි. ශ්රී ලංකා ක්රිකට් ආයතනයෙන් හෝ රජයෙන් නිල නිවේදනයක් නිකුත් කරන තෙක් මෙරට ක්රිකට් ලෝලීන් දැඩි විමසිල්ලෙන් පසුවෙති. මෙම වාර්තා වන වෙනස්කම් සිදුවුවහොත්, එය ශ්රී ලංකාවේ ජනප්රියම ක්රීඩාවේ එක් යුගයක අවසානය සහ නව යුගයක ආරම්භය සනිටුහන් කරනු ඇත. ඉදිරි දිනවලදී මේ පිළිබඳ අලුත්ම තොරතුරු ප්රධාන දේශීය මාධ්ය ඔස්සේ දැනගත හැකි වනු ඇත.
