2019 වසරේ සිට වසර හතකට ආසන්න කාලයක් ශ්රී ලංකා ක්රිකට් ආයතනයේ සභාපති ෂම්මි සිල්වා අද (28) සිය ධූරයෙන් ඉල්ලා අස්වී තිබේ.
ශ්රී ලංකා ක්රිකට් විධායක කමිටුවේ විශේෂ රැස්වීමකදී ඔහු මෙම තීරණය නිවේදනය කර ඇත. ඔහු සමඟ සමස්ත විධායක කමිටුවම ඉල්ලා අස්වීමට නියමිත බව වාර්තා වේ.
2025 වසරේ මාර්තු මාසයේදී යළිත් වරක් සභාපති ලෙස තේරී පත්වූ ෂම්මි සිල්වාගේ නිල කාලය 2027 මැයි දක්වා පැවැත්වීමට නියමිතව තිබුණ ද, එල්ල වූ දැඩි පීඩනය හමුවේ ඔහුට මෙලෙස ධූරය අතහැරීමට සිදුව ඇත.
ඉල්ලා අස්වීමට බලපෑ හේතු
ජනාධිපති අනුර කුමාර දිසානායක ලබාදුන් දැඩි උපදෙස් සහ පාලන අධිකාරියෙන් එල්ල වූ බලපෑම මෙම ඉල්ලා අස්වීමට ප්රධානතම හේතුව වී තිබේ. මීට අමතරව පසුගියදා පැවැති විස්සයි-20 ලෝක කුසලාන තරගාවලියේදී ශ්රී ලංකා කණ්ඩායම දැක්වූ දුර්වල දස්කම් සහ මූලික වටයෙන්ම ඉවතට විසිවීම සම්බන්ධයෙන් ක්රීඩා ලෝලීන් තුළ දැඩි නොසන්සුන්තාවක් හටගෙන තිබුණි.
දීර්ඝ කාලයක සිට ක්රිකට් පරිපාලනයට එරෙහිව එල්ල වූ දූෂණ චෝදනා, මූල්ය අවභාවිතය සහ අකාර්යක්ෂම පරිපාලනය සම්බන්ධයෙන් මහා සංඝරත්නය, සිවිල් සංවිධාන සහ ක්රීඩා ලෝලීන් පාරට බැස විරෝධතා දැක්වීම ද මෙම තීරණයට හේතු විය.
ලංකාසරට වාර්තා වන පරිදි, ශ්රී ලංකා ක්රිකට් පාලනය සඳහා රජය විසින් අතුරු කමිටුවක් පත් කිරීමට සූදානම් වේ. එහි අතුරු සභාපති ලෙස හිටපු පාර්ලිමේන්තු මන්ත්රීවරයෙකු, දක්ෂ පරිපාලකයෙකු මෙන්ම රාජකීය විද්යාලීය හිටපු ක්රිකට් ක්රීඩකයෙකු ද වන එරාන් වික්රමරත්න පත් කිරීමට වැඩි ඉඩක් පවතී.
කඩිනමින් නව නිලවරණයක් පවත්වා නව පාලක මණ්ඩලයක් තෝරා පත් කර ගැනීම රජයේ අරමුණයි.
ජාත්යන්තර ක්රිකට් කවුන්සිලයේ ස්ථාවරය
මීට පෙර 2023 වසරේදී රජය ක්රිකට් පාලනයට මැදිහත් වීම හේතුවෙන් ජාත්යන්තර ක්රිකට් කවුන්සිලය (ICC) විසින් ශ්රී ලංකාවේ සාමාජිකත්වය තාවකාලිකව අත්හිටුවීමට පියවර ගත්තේය. කෙසේ වෙතත්, වත්මන් තත්ත්වය පිළිබඳව ජාත්යන්තර ක්රිකට් කවුන්සිලය දැනුවත් කර ඇති බවත්, කඩිනමින් නිලවරණයක් පවත්වන්නේ නම් මෙම ක්රියාවලියට ඔවුන්ගේ එකඟතාව හිමිවනු ඇති බවත් වාර්තා වේ.
ෂම්මි සිල්වාගේ පාලන කාලය තුළ 2026 විස්සයි-20 ලෝක කුසලානය වැනි දැවැන්ත තරගාවලි මෙරට පැවැත්වීමට හැකි වුව ද, පරිපාලන දුර්වලතා සහ ජාතික කණ්ඩායමේ පසුබෑම හේතුවෙන් ඔහු නිරන්තර විවේචනයට ලක්වූ චරිතයක් බවට පත්ව සිටියේය.
