කටුනායක ගුවන් තොටුපොළේදී විෂ මත්ද්රව්ය සමඟ භික්ෂූන් පිරිසක් අත්අඩංගුවට පත්වීමේ සිද්ධිය සහ ඉන් අනතුරුව මතු වී ඇති තත්ත්වය පිළිබඳව ත්රෛනිකායික මහා සංඝරත්නය සහ ජනාධිපති අනුර කුමාර දිසානායක අතර විශේෂ සාකච්ඡාවක් අද (28) පස්වරුවේ ජනාධිපති කාර්යාලයේදී පැවැත්විණි.
මෙහිදී අදහස් දැක්වූ ජනාධිපතිවරයා පෙන්වා දුන්නේ විෂ මත්ද්රව්ය උවදුර මේ වන විට ජාතික ව්යසනයක් බවට පත්ව ඇති බව මෙම සිදුවීමෙන් මනාව තහවුරු වන බවය. එබැවින් මත්ද්රව්ය මර්දනය සඳහා රජය ගෙන යන වැඩපිළිවෙළ සමඟ සියලු දෙනා එක්වීමේ අවශ්යතාව ඔහු අවධාරණය කළේය. රටේ නව පරිවර්තනීය ගමනේදී සම්බුද්ධ ශාසනය සහ ඒ හා බැඳුණු හර පද්ධතීන් ආරක්ෂා කර ගැනීමට රජය ප්රමුඛතාව ලබා දෙන බවද ජනාධිපතිවරයා වැඩිදුරටත් පැවසීය.
සමාජය දැඩි කම්පනයට පත් කළ මෙම සිදුවීමට අදාළ විමර්ශනවල ප්රගතිය පිළිබඳව පොලිස්පතිවරයා මෙහිදී කරුණු පැහැදිලි කළේය.
සාකච්ඡාවට වැඩම කළ මහා සංඝරත්නය සඳහන් කළේ, මෙම සිදුවීම සම්බන්ධයෙන් මහානායක හිමිවරුන් දැනටමත් නිකුත් කර ඇති නිවේදනය සමස්ත සංඝ සමාජයේම මතය ලෙස සලකා කටයුතු කරන ලෙසයි. වත්මන් ප්රවණතා හමුවේ සංඝ සමාජය ආරක්ෂා කර ගැනීම සඳහා රජයේ සහාය අත්යවශ්ය බවත්, විහාර දේවාලගම් පනත ඇතුළු නෛතික ප්රතිපාදනවල සිදු කළ යුතු වෙනස්කම් පිළිබඳවත් මෙහිදී දීර්ඝ ලෙස සාකච්ඡා විය.
මෙම අවස්ථාවට මල්වතු සහ අස්ගිරි පාර්ශ්වයන්හි අනුනායක හිමිවරුන් ප්රමුඛ ත්රෛනිකායික මහා සංඝරත්නය මෙන්ම විෂය භාර අමාත්යවරුන්, ජනාධිපති ලේකම්, නීතිපති සහ ආරක්ෂක අංශ ප්රධානීන් පිරිසක් සහභාගී වූහ.
