ඉඳුනිල් කහටපිටිය –
පාස්කු ප්රහාරය සම්බන්ධව උදය ගම්මන්පිල විසින් ලියූ පොතට සජිත් ප්රේමදාස විපක්ෂ නායකවරයාට සහභාගී විය නොහැකි බවත්, ඒ අවස්ථාවට සජිත් ප්රේමදා AI හරහා එක් කර ඇතැයි තමන් විශ්වාස කරන බවත් සමගි ජන බලවේගයේ පාර්ලිමේන්තු මන්ත්රි නලීන් බණ්ඩාර අද මාධ්ය හමුවක් අමතමින් ප්රකාශ කළේය.
පාස්කු දඩයම කරේ තියාගෙන ගොස් බලයට පත් වූ පිරිස දැන් නැවත මහ මොළකරුවෙක් නම්කරමින් ජාති වාදය ඇවිස්සීමට කටයුතු කරන අවස්ථාවට විපක්ෂ නායක සජිත් ප්රේමදාස සහභාගී වන්නේ කෙසේ දැයි ඔහු ප්රශ්න කළේය.
නලීන් බණ්ඩා මන්ත්රීවරයා එම මාධ්ය හමුව අමතමින් කල ප්රකාශය මෙසේය.
“පාස්කු ප්රහාරයේ දඩයම කරේ තියාගෙන ගිය කට්ටිය තමයි ඔය කට්ටිය. ඒ දවස්වල ජාතික ආරක්ෂාව, ජාතික ආරක්ෂාව කියලා රටට දේශනා පවත්වලා ඒ දේශනා පිට දාලා බලය ලබා ගත්තු කට්ටිය. “
“මම දැක්කා එතන මහ මොළකරුවා කෙසේ වෙතත් පාස්කු ප්රහාරයට වගකියන්න ඕන මිනිස්සු පාස්කු ප්රහාරයේ පොඩි මොළකාරයෝ එතන හිටියා. බොහොම පැහැදිලියි මේ ජාතිවාදී ලයින් එක ආයෙ ගන්න යන්නේ එදා අර ජාතික ආරක්ෂාව ගැන කියලා බලයට ඇවිත් අනිතිමට ජනතාව එළවලා දාපු කට්ටිය තමයි. ඒ ගොල්ලන් කවදාවත් පාස්කු ප්රහාරය සහරාන් පිට දාලා බේරෙන්න බෑ. සහරාන්ට එහා දැවැන්ත බලවේගයක් මේ පිටිපස්සේ තිබුණා.”
“මොකද මම දන්නවා. මම නීතිය හා සාමය නියෝජ්ය ඇමතිවරයා විදිහට හිටියා. නාලක සිල්වා මහත්තයා ත්රස්ත මර්ධන කොට්ඨාසයේ වැඩකටයුතු කරමින් හිටියා. ඔහුව අන්තිමට හිරේ දැම්මා සිරිසේන මහත්තයා. ඔහුව හිරේ දැම්මේ කාගේ උවමනාවට ද කියලා අපි දන්නවා. අන්තිම දවස් දෙකේ කුමන්ත්රණයක් සිද්ධ වුනා. අපි නීතිය හා සාමය අමාත්යාංශයෙන් අපිව එළියට දැම්මා. ඊට පස්සේ නීතිය හා සාමය අමාත්යාංශය භාරගත්තේ සිරිසේන මහත්තයා. දවස් 52න් පස්සේ සිරිසේන මහත්තයා අපට ඒ තනතුරු දුන්නේ නෑ. “
“අදටත් අපි කණගාටු වෙනවා. නාලක සිල්වා මහත්තයා එක්ක අපි ඉතාම ලඟින් කටයුතු කළා. අපි හිටියා නම් සමහර විට මේ ප්රහාරය වැලකෙන්න තිබුණා. අපි දැක්කා බුද්ධි අංශ නිලධාරීන් ප්රකාශ කරනවා බුද්ධි අංශ නිලධාරීන් තමයි සොනික් සොනික් සහ අබු හින් කියන්නෙ කියලා. ඒ බුද්ධි අංශ නිලධාරීන් නම් ඒ කියන පුද්ගලයින්ට ප්රහාරය වළක්වා ගන්න බැරිව ගියේ.”
“මේ ගොල්ල ප්රහාරය කළ අයට සුදු හුණු ගාලා සේරම එකවුන්ට් එක සහරාන්ට දාලා බේරෙන්න හදන්නේ. එහෙම බේරෙන්න බෑ. අපි මේ ගැන දිගින් දිගටම කතා කළ මිනිස්සු. “
“ඔය සලේ පිට දාලා දැන් කිඹුල් කඳුළු හෙලුවට ඔය කට්ටියගේ මහ මොළ කරු අපි දන්නේ නෑ. නමුත් මහමොළකරුවෙක් ඉන්නවා. මේකට වග කිව යුත්තො තවම ජීවතුන් අතර ඉන්නවා. ඔය සලේ මහත්තයා මටත් කෝටි ගාණක් වන්දි ඉල්ලලා නඩුවක් දාලා තියනවා අපි කතා කරපුවට. “
“ඉතින් ඒ නිසා අපිට කියන්න බෑ මහ මොළකරුවා කවුද කියලා. මහ මොළකරුවා හඳුනා ගැනීම ආණ්ඩුවේ යුතුකමක්. “
“එතකොට මේ ගොල්ල ඇඟිල්ල දික් කරනවා ශානි මහත්තයටයි. රවී මහත්තයටයි. මේ දෙපැත්තේ දේශපාලන ෆුට් බෝල් ගැහිල්ලක් නේ සිද්ධ වෙන්නේ. ආණ්ඩුව සලෙයි පිට දාන්න හදනවා. මේ ගොල්ල ශානියි රවියි පිට දාන්න හදනවා. අපි මේකට එකඟ නෑ. නලීන් බණ්ඩාර කොහොමවත් එකඟ නෑ. අපි දන්නවා මේව පිටිපස්සේ දැවැන්ත බලවේග තිබුණා කියලා. කිසිසේත්ම මහ මොළකරු මිය ගිය සහරාන් නොවන බව පැහැදිලියි.”
“ඒ නිසා අපේ ගම්මන්පිල මහත්තයො. ඔයා ක්ෂර්ලොකොම්ස් නෙමෙයි. පරීක්ෂණ පවත්වන්න දැනුමක් හැකියාවක් ඔයාට නෑ. අපි ජාත්යාන්තර පරික්ෂණයක් ඕන කියලා කිව්වේ. මේ ජාතිවාදී නඩය ආයෙ හදන්නේ සහරාන්ගේ ප්රහාරයෙන් පස්සේ දඩයම කරේ තියන් ගියා වගේ ආයේ ජාතිවාදී දඩයමක් කරේ තියාගෙන ගිහින් බලය ලබා ගන්න. ඒකට කිසිසේත්ම මම එකඟ නෑ.”
නලීන් බණ්ඩාර මේ ප්රකාශය කරන අතර මාධ්යවේදියෙක් ඔහුගෙන් හරස් ප්රශ්නයක් විමසුවේය.
මාධ්යය – ඔබතුමා මේ විදිහට කියද්දි විපක්ෂ නායක තුමා ගම්මන්පිලගේ පොත එළිදැක්වීමට යනවා. එහෙම වෙන්න බෑනේ. එතුමා ගියා ද?
නලීන් බණ්ඩාර – ඒක එතුමාගෙන් තමයි අහන්න වෙන්නේ. මම හිතන්නේ එතුමා නෙමෙයි ගියේ. මම හිතන්නෙ ඒ.අයි වලින් එතුමාව දාලද කොහෙද… මොකද එතුමාට යන්න බෑ එතෙන්ට.
මාධ්යය – ඒ කියන්නෙ ඔබතුමා විශ්වාස කරන්නේ නැද්ද එතුමා ගියා කියලා
නලීන් බණ්ඩාර – මම විශ්වාස කරන්නේ නෑ එතුමා ගියා කියලා. වෙන්න බෑනේ එතුමා කොහොමද එතෙන්ට යන්නේ.
