ඉඳුනිල් කහටපිටිය –
ලෝකයට සාමය සංහිඳියාව, මනුෂ්යත්වය සහ හික්මීම දර්ශනය කරන මහා අධ්යාත්මික චාරිකාවක් සටහන් කරමින් ලෝකය ඉදිරියේ ඉමහත් ගෞරවයට ලක් වූ පූජ්ය පඤ්ඤාකර හිමි පානන් ඇතුළු වියට්නාම් භික්ෂුන්වහන්සේ ලංකාවේ දියත් කර ඇති පා ගමනේ තෙවන දිනය වූ අද (04) එම භික්ෂූන්වහන්සේ ඉදිරියේ පොලිසියේ නිල ඇඳුම් ධාරී පුද්ගලයෙක් තවත් අයෙක් මහා හඬන් අශිෂ්ඨ ලෙස බහින්බස් වන ආකාරය පිළිබඳ වීඩියෝවක් සමාජ මාධ්ය තුළ දැන් දක්නට ලැබේ.
මේ ගමනේ අර්ථයම සද් භාවයෙන් යුතුව මනුෂ්ය සන්තානය තුළ සාමය පිළිබඳ අධිෂ්ඨානය ඇතිකරවීමය. ඒ වෙනුවෙන් කෙරෙන පා ගමන දැකීමට ශ්රී ලාංකික ජනතාව මග දෙපස පෙළ ගැසී සිටිති. මේ වීඩියෝව පුරා දකින්නේ ශ්රද්ධාවන්ත බැතිමතුන් මෙහෙයවන සංයමයකින් යුතු පොලිස් නිලධාරී කණ්ඩායම් නොව, නිල ඇඳුම් සහිතව ඝෝෂා කරමින් ට්රැෆික් හසුරුවන්නාක් සේ හිමිවරුන් ඉදිරියේ මිනිසුන්ට බැන වදින ඝෝෂා කරන විකල් ගොබ්බයන් පිරිසකි.
ඒ අතර ඔවුන් අවට සිටින පිරිස් සමග බැණ අඬගසා ගනිති. කෑ ගසති. මේ වඩින්නේ සාමයේ පා ගමනක යෙදෙන ගෞරවනීය සිල්වත් භික්ෂූන් පිරිසක් බවත්, මග දෙපස රැඳී සිටින්නේ ශ්රද්ධාවත් මනුෂ්යයින් පිරිසක් බවත් වූ මූලික අවබෝධයකින් තොරව පොලිසිය මේ සාම පාගමන මෙහෙයවන්නේ තිරික්කල් රේස් එකක් හසුරුවන ආකාරයටය.
මෙය ලෝක අවධානය ලක් වූ ඉසව්වකි. පසුගිය දින දෙක තුළ මේ ගමනට ආරක්ෂාව සැපයූවේ සුදු ඇඳුමින් සැරසුන ආරක්ෂක නිලධාරීන් පිරිසකි. එම මෙහෙයවීම තුළ යම් ගෞරවනීය ස්වරූපයක් තිබිණි. නමුත් අද දිනයේ තමන්ට පැවරී ඇති රාජකාරියේ වගකීම පිළිබඳ හැඟීමක් මේ කාකි සූට් කාරයින්ට නොතිබීම සම්බන්ධව කණගාටුව ප්රකාශ කරන අතර එක් කාරණාවක් පිළිබඳ පමණක් සතුටු වෙමු. එනම් මේ සාම පා ගමනේ යෙදෙන භික්ෂූන් වහන්සේට සිංහල බැරි වීමය.
උන්වහන්සේලා අපේ භාෂාව ගැන යම් අවබෝධයක් තිබුනා නම් මේ සාම පා ගමන අද නිමා කරන්නේ මහනුවර සිට කෑගල්ල බෙලිගම්මන රජ මහා විහාරයට වඩින ගමන අතරතුරය. තමන්වහන්සේ ලබා දෙන්නට උත්සාහ කරන පණිවිඩයේ අර්ථය වටහාගත නොහැකි කණ්ඩායමක් වෙනුවෙන් කරන ගමන හුදු පාගමනක් පමණක්මවන බව උන්වහන්සේලා මේ ගමනට පෙර පෙන්වා දී සිටියහ.
මේ ඉසව්වේ අර්ථය කුමක් දැයි තේරුම් ගන්නට, රාජ්ය අනුග්රහය සහිතව මේ වැඩසටහන ක්රියාත්මක කිරීමේ දී ඉදිරියට එය විය යුතු ආකාරය සම්බන්ධව තීරණය කරන්නට රජය අපොහොසත් වුවහොත් අවසානයේ අත්වන ප්රතිඵලය යහපත් නොවනු ඇතැයි විශ්වාස කරමු. කරුණාකර මේ වීඩියෝව බලන්න.
