-
අද (19) සිට ඉන්ධන නිකුත් කිරීමේදී වාහන අංක තහඩුවේ අවසන් අංකය මත පදනම් වූ ඔත්තේ ඉරට්ටේ ක්රමවේදය ක්රියාත්මකයි…
මීට පෙර වෙනත් පාර්ශවයන් සතු හෝ දැනට භාවිතයේ නොමැති දුරකථන අංක යටතේ ලියාපදිංචි කර තිබූ වාහන සඳහා, නිවැරදි හිමිකරුට තම ඉන්ධන QR කේතය බාධාවකින් තොරව ලබාගැනීමට හැකි වන පරිදි නව ක්රමවේදයක් අද (19) සිට හඳුන්වා දී තිබේ.
2026 මාර්තු 14 දිනට පෙර ලියාපදිංචි කරන ලද වාහනයක QR කේතය නැවත ලබාගැනීමේදී, එම ලියාපදිංචිය සිදුකළ දුරකථන අංකය අහිමි වීම හෝ වෙනත් අයෙකු සතුවීම නිසා ජනතාව මුහුණ දුන් අපහසුතා මඟහරවා ගැනීම සඳහා ඩිජිටල් ආර්ථික අමාත්යාංශය මෙම පියවර ගෙන ඇත.
නව ක්රමවේදය ක්රියාත්මක වන ආකාරය:
- වාහනයේ අනන්යතාව තහවුරු කිරීම සඳහා වාහන අංකය සහ චැසි අංකය නිවැරදිව ඇතුළත් කිරීමෙන් පමණක් මෙම නව පහසුකම භාවිත කළ හැකිය.
- වාහනය දැනටමත් වෙනත් අංකයක් යටතේ ලියාපදිංචි වී තිබුණද, ඔබ සතු නිවැරදි තොරතුරු ඇතුළත් කර පවතින ලියාපදිංචිය අවලංගු කර (Override) ඔබගේ නව දුරකථන අංකය යටතේ ලියාපදිංචි විය හැකිය.
- මෙහිදී ‘Override’ විකල්පය තෝරාගත් විට, එම වාහනයට සම්බන්ධ පැරණි ගිණුම දත්ත පද්ධතියෙන් ඉවත් වී ඔබගේ තොරතුරු සහිත නව ගිණුමක් වහාම ක්රියාත්මක වෙයි.
- මෙම ක්රියාවලියේදී පවතින ඉන්ධන QR ලියාපදිංචිය අවලංගු වන බැවින්, පෙර පරිශීලකයාට එම වාහනය වෙනුවෙන් ලැබුණු වරප්රසාද සහ ප්රවේශය අහිමි වේ.
- තමාට නීත්යානුකූල අයිතියක් නොමැති, වෙනත් පුද්ගලයෙකු සතු වාහනයක දත්ත මෙලෙස ඉවත් කිරීම දඬුවම් ලැබිය හැකි වරදක් බව ඩිජිටල් ආර්ථික අමාත්යාංශය අවධාරණය කරයි.
නව ලියාපදිංචිය සඳහා: https://fuelpass.gov.lk/
මේ අතර, අද (19) සිට ඉන්ධන නිකුත් කිරීමේදී වාහන අංක තහඩුවේ අවසන් අංකය මත පදනම් වූ නව ක්රමවේදයක් ක්රියාත්මක කරන බව ලංකා ඛනිජ තෙල් නීතිගත සංස්ථාව පවසයි.
ඒ අනුව අංක තහඩුවේ අවසන් ඉලක්කම ඔත්තේ සංඛ්යාවක් (1, 3, 5, 7, 9) වන වාහන සඳහා ඔත්තේ දිනවලදී ද, අවසන් ඉලක්කම බිංදුව හෝ ඉරට්ටේ සංඛ්යාවක් වන වාහන සඳහා ඉරට්ටේ දිනවලදී ද ඉන්ධන නිකුත් කෙරේ. කෙසේ වෙතත්, මෙතෙක් QR කේතය හරහා ඉන්ධන ලබා නොගත් පිරිස් සඳහා අද දිනයේ මෙම ක්රමයෙන් බැහැරව ඉන්ධන ලබාගැනීමට අවස්ථාව පවතින බව සංස්ථාවේ සභාපති ඩී.ජේ. රාජකරුණා සඳහන් කළේය.
වාහන අංක තහඩු සම්බන්ධයෙන් පවතින ගැටලු හේතුවෙන්, අනන්යතාව තහවුරු කරගැනීම සඳහා ආදායම් බලපත්රය, ලියාපදිංචි සහතිකය හෝ රක්ෂණ සහතිකය වැනි ලේඛනයක් ළඟ තබාගන්නා ලෙස මෝටර් රථ ප්රවාහන දෙපාර්තමේන්තුව දැනුම් දෙයි. තවද, නීතිවිරෝධී ලෙස ඉන්ධන නිකුත් කරන පිරවුම්හල් පිළිබඳ තොරතුරු 0112 106 767 හෝ 0117 296 130 යන අංකවලට දැනුම් දිය හැකි බව රජයේ ප්රවෘත්ති දෙපාර්තමේන්තුව වැඩිදුරටත් සඳහන් කරයි.
