ශ්රී ලංකා රජයේ භාණ්ඩාගාර අරමුදල්වලින් සිදුව ඇති අතිවිශාල සයිබර් මූල්ය වංචාවක් සම්බන්ධයෙන් පුළුල් පරීක්ෂණ පැවැත්වීම සඳහා ඇමරිකාවේ ෆෙඩරල් විමර්ශන කාර්යාංශයේ (FBI) විශේෂ කණ්ඩායමක් දිවයිනට පැමිණ තිබේ.
දේශීය බලධාරීන්ට සහාය වීම සඳහා පැමිණි මෙම FBI නියෝජිතයන්, ශ්රී ලංකා පොලිසියේ අපරාධ පරීක්ෂණ දෙපාර්තමේන්තුවේ (CID) උසස් නිලධාරීන් සමඟ මේ වන විටත් කොළඹ පිහිටි ඇමරිකානු තානාපති කාර්යාල පරිශ්රයේදී විශේෂ සාකච්ඡා වට කිහිපයක් පවත්වා ඇති බව උසස් පොලිස් නිලධාරියෙකු උපුටා දක්වමින් Daily Mirror පුවත්පත වාර්තා කර ඇත.
සයිබර් කොල්ලයේ සුලමුල
මෙම මූල්ය මංකොල්ලය සිදුව ඇත්තේ විදේශ සම්පත් දෙපාර්තමේන්තුවේ (ERD) නිල විද්යුත් තැපැල් (Email) පද්ධතියට අනවසරයෙන් ඇතුළු වීමෙනි. ඕස්ට්රේලියාව වෙත ගෙවීමට තිබූ ඩොලර් මිලියන 22.9ක ද්විපාර්ශ්වික ණය පියවීමේ ක්රියාවලියට මැදිහත් වී ඇති සයිබර් අපරාධකරුවන්, එහි සන්නිවේදනයන් අවහිර කරමින් වංචනික ලෙස මුදල් වෙනත් ගිණුම් වෙත හරවා යවා ඇත.
ඕස්ට්රේලියානු බලධාරීන් වෙත ඉදිරිපත් කිරීමට සකස් කර තිබූ ගෙවීම් වවුචර හයෙන් හතරක්ම මෙලෙස හැකරුන් අතට පත්ව ඇති අතර, ඉන් එක් අවස්ථාවකදී ලංකා භාණ්ඩාගාරයෙන් ඇමරිකානු ඩොලර් මිලියන 2.5ක් ද, තවත් අවස්ථාවක ඇමරිකානු තැපැල් බලධාරීන්ට ගෙවිය යුතු මුදලක් ලෙස දක්වමින් ඩොලර් 625,000ක් ද ලෙස සමස්තයක් ලෙස ඩොලර් මිලියන 3කට අධික මුදලක් වංචා කර තිබේ.
විමර්ශන ඇමරිකාවට දිවෙයි
සොරකම් කරන ලද මුදල් ගලාගිය මාර්ග පිළිබඳව සිදුකළ මූලික ඩිජිටල් පරීක්ෂණවලදී හෙළි වී ඇත්තේ, මෙම මුදල් ඇමරිකා එක්සත් ජනපදයේ ප්රාන්ත දෙකක පිහිටි බැංකු ගිණුම් කිහිපයක් හරහා සංසරණය වී ඇති බවය.
හැකර්ලාගේ අනන්යතාවය සැඟවීම සඳහා “Biz Solutions” නමැති තෙවැනි පාර්ශවීය අන්තර්ජාල ව්යාපාර ලියාපදිංචි කිරීමේ සමාගමක් භාවිත කර ඇති බව විමර්ශකයෝ පවසති. මෙම සමාගම ව්යාපාර නීති ලිහිල් ප්රාන්තයක් වන ඇමරිකාවේ ඩෙලවෙයාර් (Delaware) හි ලියාපදිංචි කර තිබුණද, අවසන් මුදල් ගනුදෙනු සිදුවූ වවුචරයක් බැංකු රෙගුලාසි ඉතා දැඩි වෙනත් ඇමරිකානු ප්රාන්තයක බැංකු ගිණුමකට සම්බන්ධ බව ද අනාවරණය වී ඇත.
FBI සහ CID ඒකාබද්ධ මෙහෙයුමෙ
මෙම මහා පරිමාණ සයිබර් මංකොල්ලයේ ඩිජිටල් සලකුණු (Digital Footprint) ඔස්සේ හඹා යෑම සඳහා පැමිණි FBI කණ්ඩායම, මේ වන විට CID නිලධාරීන් සමඟ ක්ෂේත්රයේ සෘජුවම කටයුතු කරමින් සිටියි.
මේ සඳහා අවශ්ය නවීන තාක්ෂණික මෙවලම් සහ පූර්ණ සහයෝගය ලබා දීමට FBI ආයතනය එකඟ වී ඇත.
මෙම වංචාවට සම්බන්ධ සැකකරුවන් ඇමරිකා එක්සත් ජනපදය තුළ ජීවත් වන්නේ නම්, ඔවුන්ට එරෙහිව නීතිමය පියවර ගැනීමට එරට බලධාරීන් පූර්ණ එකඟතාව පළ කර තිබේ.
කෙසේ වෙතත්, මේ වන තෙක් මෙම සොරකම් කරන ලද මිලියන සංඛ්යාත මුදල් අවසාන වශයෙන් බැර වූයේ කාගේ ගිණුම්වලටද යන්න හෝ එම මුදල් ලබාගත් නිශ්චිත ක්රමවේදය මෙතෙක් ස්ථිරවම තහවුරු කර ගැනීමට විමර්ශන කණ්ඩායම් සමත්ව නැත.
