ලෝක සාමය සහ සහජීවනය තේමා කරගනිමින් දඹුල්ලෙන් ආරම්භ වූ “ඒහි පස්සිකෝ” (Ehi Passiko) ජාත්යන්තර සාම පාද යාත්රාව අද (28) සිය අවසන් දිනයට එළැඹෙයි. දින කිහිපයක් පුරා දිවයිනේ ප්රධාන නගර පසුකරමින් පැමිණි මෙම පා ගමනේ අවසන් අදියර අද දහවල් 12ට කැලණිය රජමහා විහාරස්ථානයෙන් ආරම්භ වීමට නියමිතය.
රාජ්ය උත්සවය සහ ජනපති සහභාගීත්වය
කැලණියෙන් ආරම්භ වන පා ගමන කොළඹ නිදහස් චතුරස්රය දක්වා ගමන් කිරීමට නියමිත අතර, පස්වරු 4ට එහිදී විශේෂ රාජ්ය උත්සවයක් පැවැත්වේ. මෙම අවස්ථාව සඳහා ජනාධිපති අනුර කුමාර දිසානායක සහභාගී වන අතර, එහිදී විශේෂ සංකේතාත්මක වැඩසටහනක් ලෙස පූජ්ය පඤ්ඤාකර හිමියන් ඇතුළු ජාත්යන්තර නියෝජිත පිරිස වෙත ශ්රී මහා බෝධීන් වහන්සේගේ අංකුර පැළයක් නිල වශයෙන් භාර දීම ජනාධිපතිවරයා අතින් සිදු කෙරේ. මෙය ලක්වැසි බෞද්ධ ජනතාවගෙන් ලෝකයා වෙත පිරිනැමෙන සාමයේ පණිවිඩයක් ලෙස සැලකේ.
ගමන් මඟ සහ සමාප්තිය
පසුගිය 22 වන දින දඹුල්ලෙන් ආරම්භ වූ මෙම පාද යාත්රාව ඊයේ (27) දිනයේ යක්කල සිට කැලණිය දක්වා පැමිණි අතර, අද පස්වරුවේ නිදහස් චතුරස්රයේ සිට යළි ආරම්භ වී කොළඹ ගංගාරාම විහාරස්ථානයෙන් නිමාවට පත් වීමට නියමිතය. විවිධ ආගමික නායකයින්, විදේශීය නියෝජිතයින් සහ දහස් සංඛ්යාත සැදැහැවතුන් පිරිසක් මෙම ඓතිහාසික සාම චාරිකාවට එක්ව සිටිති.
කොළඹ විශේෂ රථ වාහන සැලැස්මක්
පාද යාත්රාව හේතුවෙන් අද පෙරවරු 11 සිට කොළඹ නගරයේ මාර්ග කිහිපයක විශේෂ රථ වාහන සැලැස්මක් ක්රියාත්මක වන බව පොලිසිය දැනුම් දෙයි. ඒ අනුව බණ්ඩාරනායක වටරවුමේ සිට බේස්ලයින් මාර්ගය හරහා බොරැල්ල හංදිය දක්වාත්, ගංගාරාම විහාරස්ථානය අවට මාර්ගවලත් අවස්ථානුකූලව වාහන ගමනාගමනය සීමා කෙරෙනු ඇත. විකල්ප මාර්ග භාවිත කරන ලෙස පොලිසිය රියදුරන්ගෙන් ඉල්ලා සිටී.
