තවමත් ස්වාධීනව නැගී සිටීමට හැකියාවක් නැති ජාතියක් ලෙස අප විදෙස් රටවලින් උදවු උපකාර ලබා ගන්නා විට අතිශය කල්පනාකාරී විය යුතු බවත්, රජයේ හැසිරීම සම්බන්ධව මහ ජනතාව අතිශය සංවේදීව අවදියෙන් සිටින බව අවබෝධ කරගෙන තීන්දු තීරණ ගැනීම වැදගත් බවත් මල්වතු පාර්ශවයේ මහා නායක අති පූජ්ය තිබ්බටුවාවේ ශ්රී සිද්ධාර්ථ සුමංගල නාහිමියෝ පැවසූහ.
උන්වහන්සේ මේ ගැන අවධාරණයෙන් ප්රකාශ කළේ ජනාධිපතිවරයා සිය ධූරයට පත්ව මාස තුනක් ඉක්මන අවස්ථාවේ අස්ගිරි මල්වතු මහා නායක හිමිවරුන් බැහැ දැකීමට පැමිණි අවස්ථාවේදීය.
මල්වතු මහා විහාරයට පැමිණි ජනාධිපතිවරයා අමතා මල්වතු මහා නායක හිමියෝ මෙම වැදගත් උපදේශය ජනාධිපතිවරයාට ලබා දෙන විට ජනාධිපතිවරයා ඉන්දීය සංචාරයේ සංක්ෂිප්තය මෙන්ම එහිදී ඉන්දියාව වෙතින් ලබා ගත් ණය ආධාර ප්රදානයන් බවට පත් කරගැනීමට හැකි වූ ආකාරය සම්බන්ධව මහා නායක හිමියන්ට පැහැදිලි කළේය.
අනතුරුව මල්වතු මහා නා හිමිපාණන්වහන්සේ ප්රමුඛ සංඝරත්නය සෙත් පිරිත් සජ්ඣායනා කර ජනාධිපතිවරයා වෙත ආශිර්වාදය පළ කළහ.
ඉන් අනතුරුව අස්ගිරි මහා විහාරය වෙත පැමිණි ජනාධිපති අනුර කුමාර දිසානායක මහතා අස්ගිරි පාර්ශ්වයේ මහානායක අතිපූජ්ය වරකාගොඩ ශ්රී ඥානරතන නාහිමිපාණන් වහන්සේ බැහැදැක ආශිර්වාද ලබා ගත්තේය.
අස්ගිරි පාර්ශ්වයේ අනුනායක පූජ්ය ආනමඩුවේ ධම්මදස්සී, නියෝජ්ය ලේඛකාධිකාරී පූජ්ය නාරම්පනාවේ ආනන්ද, මුතියංගණ රජ මහා විහාරාධිකාරී පූජ්ය මුරුද්දෙණියේ ධම්මරතන යන ස්වාමින් වහන්සේලාද මෙම අවස්ථාවට වැඩම කර සිටි අතර උන්වහන්සේලා සෙත් පිරිත් සජ්ඣායනා කර ජනාධිපතිවරයාගේ ඉදිරි කටයුතු වෙනුවෙන් ආශිර්වාද පළ කළහ.
ප්රවාහන හා මහා මාර්ග නියෝජ්ය අමාත්ය වෛද්ය ප්රසන්න ගුණසේන, පාර්ලිමේන්තු මන්ත්රී තනුර දිසානායක යන මහත්වරුද ජනාධිපතිවරයා සමඟ මෙම අවස්ථාවට එක්ව සිටියහ.
ඉන් අනතුරුව ජනාධිපතිවරයා මාධ්ය හමුවේ ප්රකාශ කර සිටියේ පළාත් පාලන මැතිවරණය සඳහා 2020 -23ට අදාලව ලබා දී ඇති නාම යෝජනා ඉදිරිපත් කළ පුද්ගලයින් මෙන්ම පක්ෂ ද සොයා ගත නොහැකි වී ඇති බවය.
මේ තත්ත්වය තුළ නැවත නාම යෝජනා ලබා ගන්න අවශ්ය පනත් කෙටුම්පත් සකස් කරන බව කී ජනාධිපතිවරයා . ජනවාරි මස මැද වනවිට නව නාමයෝජනා ලයිස්තු සකස් කරගැනීමට අවශ්ය පනත් කෙටුම්පත් පාර්ලිමේන්තුවේ දී සම්මත කරගැනීමට අවශ්ය ක්රියාමාර්ග ගන්නවා බව කීවේය.
අවුරුද්දට කලින් පළාත් පාලන පනත සම්මත කරගෙන නාම යෝජනා ලබාගෙන පළාත් පාලන මැතිවරණය පවත්වා පළාත් සභා මැතිවරණය ද ලබන වසර තුළ පවත්වා නිම කරන බව ජනාධිපතිවරයා පැවසුවේය.
