වටිනාකමට අඩුවෙන් තක්සේරු කර රටට ගෙන්වූ සුඛෝපභෝගී සහ රීකන්ඩිෂන් වාහන තොගයක් එම වාහන ආනයනය කළ මුල් රටටම නැවත අපනයනය කිරීමට නියමිත බව රේගු ජ්යෙෂ්ඨ නිලධාරියෙක් උපුටා දක්වමින් සන්ඩේ ටයිම්ස් වාර්තා කරයි.
හොඳින් පරීක්ෂා කිරීමේ දී තෙවන රටක ලේඛන භාවිතා කරමින් වාහන ආනයනය කර ඇති බව නිශ්චිතව අනාවරණය වීමෙන් පසුව, රේගුව මෙම වාහන නිෂ්කාශනය කිරීම නවතා දමා ඇති බව එම වාර්තාවේ දැක්වේ.
මෙම වාහනවලින් බහුතරයක් ජපානයෙන් ආනයනය කර තිබුණද, අදාළ ණයවර ලිපි (LC) සිංගප්පූරුව සහ ඩුබායි වැනි ස්ථානවල විවෘත කර ඇති අතර එමඟින් වාහනයේ වටිනාකම අඩු තක්සේරුවකට ලක් කර ඇත.
පවත්නා නීතිය යටතේ, වාහන නැව්ගත කිරීමට පෙර එම වාහන සම්බන්ධව පරීක්ෂණ සහතික, මුල් රටේ බැංකුවක් විසින් අනුමත කළ යුතුව ඇත. නමුත් වැඩිදුර පරීක්ෂණ මගින් ජපන් බැංකු මෙම සහතික අනුමත කිරීම ප්රතික්ෂේප කර ඇති බව රේගුව අනාවරණය කරගෙන තිබිණි. වාහන වෙන්දේසියේ සඳහන් වටිනාකම ඉන්වොයිසිවල සඳහන් වටිනාකමට වඩා වෙනස් බැවින්, වාහන අවතක්සේරු කර ඇති බවට සැක මතු වී ඇති බව රේගු නිලධාරියා පැහැදිලි කළේය.
“මෙම වාහනවල සැබෑ වටිනාකම සලකුණු කර ඇති මිල ගණන්වලට වඩා බෙහෙවින් වැඩි බව අපි විශ්වාස කරනවා. මෙම වාහන සම්බන්ධයෙන් ඉදිරියට යා යුතු ආකාරය පිළිබඳව උපදෙස් අපි ආනයන පාලකවරයාගෙන් ඉල්ලා සිටියා. දැනට වාහන නිදහස් කිරීමට අපි අදහස් කරන්නේ නෑ. ඒ වගමේ අපට පවතින නීතියට අනුව ආනයනකරුවන්ට දඩ නියම කළ නොහැකියි. අපට ඇති එකම මාර්ගය වන්නේ මෙම වාහන නැවත එම වාහන ගෙන්වූ රටටම අපනයනය කිරීමයි,” නිලධාරියා පැවසීය.
ජ්යෙෂ්ඨ භාණ්ඩාගාර නිලධාරියෙකු උපුටා දක්වමින් සන්ඩේ ටයිම්ස් වාර්තා කර ඇත්තේ භාණ්ඩාගාරය විසින් රේගු සහ ආනයන පාලකවරයාට වාහන නැවත අපනයනය කරන ලෙස උපදෙස් දී ඇති බවය.
දඩයක් ගෙවීමෙන් පසු වාහන නිදහස් කිරීමට අවසර ඉල්ලා සමහර ආනයනකරුවන් මීට පෙර භාණ්ඩාගාර නිලධාරීන් හමුවී තිබුණද, ඉල්ලීම ප්රතික්ෂේප කර ඇත.
