අමායා උඩුවැරැල්ල –
පසුගිය සිකුරාදා දින රුසියාවේ මොස්කව් හි ප්‍රසංග ශාලාවකට එල්ල වූ ප්‍රහාරය සම්බන්ධව හා එහිදී පුද්ගලයන් 137 දෙනෙකු ඝාතනය කළ බවට පුද්ගලයින් සිව් දෙනෙකුට චෝදනා එල්ල කර තිබෙනවා. ඒ ත්‍රස්තවාදී ක්‍රියාවක් කළ බව දක්වමින්.
ඉස්ලාමීය රාජ්‍ය කණ්ඩායම නොහොත් IS සංවිධානය විසින් ප්‍රහාරයේ වගකීම භාරගත් නමුත් රුසියාව සාක්ෂි නොමැතිවත් දිගින් දිගටම පවසා සිටියේ ප්‍රහාරය ට යුක්රේන මැදිහත්වීමක් ඇති බවයි. යුක්රේනය එම සියලු ප්‍රකාශයන් ප්‍රතික්ෂේප කර තිබෙනවා.
කෙසේ වෙතත් චෝදනා එල්ලකර රුසියානු බලධාරීන් යටතට ගත් පුද්ගලයන් සිව්දෙනා ඩෙලෙර්ඩ්‍රොන් මිර්සෝයෙව්, සයිඩාක්‍රමි මුරොදාලි රීචබලිසෝදා, ෂම්සිදින් ෆරිදුනි සහ මුහම්මද්සොබීර් ෆයිසොව් ලෙස නම් කර තිබෙනවා.
විදෙස් මාධ්‍ය වාර්තා කරන ලෙස ඔවුන්ගෙන් තිදෙනෙකු රුසියානු අගනුවර බාස්මනි දිස්ත්‍රික් උසාවියට වෙස්මුහුණු පැළඳ පොලිසිය විසින් රැගෙන යන ආකාරයක් දක්නට ලැබී තිබෙනවා. එක් අයෙකු රැගෙන ගොස් තිබුනේ රෝද පුටුවක ආධාරයෙන්. ඔවුන් සියලු දෙනාටම පහර දී ඇති බවක් ද දක්නට ලැබී තිබෙනවා.
රුසියානු ආරක්ෂක අංශ විසින් සිදුකරන ලද කුරිරු ප්‍රශ්න කිරීම් සැසි පිලිබඳව ද විදෙස් මාධ්‍ය වාර්තා කරන අතර ඒ සඳහා විදුලි සැර යොදාගෙන ඇති බව වාර්තා කර තිබෙනවා. ඩෙලෙර්ඩ්‍රොන් මිර්සෝයෙව් සහ සයිඩාක්‍රමි මුරොදාලි රීචබලිසෝදා ලෙස අධිකරණය විසින් හඳුනාගෙන ඇති පුද්ගලයින්ගේ ඇස් කළු පැහැ ගැන්වී තිබූ බවත් ඩෙලෙර්ඩ්‍රොන් මිර්සෝයෙව් ගේ බෙල්ලේ ඉරා දැමූ ප්ලාස්ටික් බෑගයක් ඔතා ඇති බවක් පෙනෙන්නට තිබූ බවත් සඳහන් වනවා.
ෂම්සිදින් ෆරිදුනි නමැති පුද්ගලයාගේ මුහුණ දැඩි ලෙස ඉදිමී තිබූ අතර මුහම්මද්සොබීර් ෆයිසොව් නැමැති පුද්ගලයා සිහින් රෝහල් ඇඳුමකින් සැරසී රෝද පුටුවකින් උසාවියට ගෙන එන විට ඔහුට සිහිය නැති වී ඇති බවක් පෙනෙන්නට තිබූ බව වාර්තා වනවා. විදෙස් මාධ්‍ය වාර්තා කරන ලෙස එක් අයෙකුගේ ඇසක් නොමැති බවක් පෙනී තිබෙනවා.
ටෙලිග්‍රාම් පණිවුඩකරණ සේවාව පිළිබඳ අධිකරණ ප්‍රකාශයක දක්වා තිබුනේ ඩෙලෙර්ඩ්‍රොන් මිර්සෝයෙව් ඔහුගේ වරද සම්පූර්ණයෙන් පිළිගෙන අතර සයිඩාක්‍රමි මුරොදාලි රීචබලිසෝදා ද වරද පිළිගෙන ඇති බවයි.
රුසියානු රාජ්‍ය ප්‍රවෘත්ති ඒජන්සිය පවසන්නේ මෙම පුද්ගලයන් ටජිකිස්තානයේ පුරවැසියන් බව හඳුනාගෙන ඇති බවයි. සිව්දෙනාම අවම වශයෙන් ලබන මැයි 22 දක්වා පූර්ව නඩු විභාගයේ රඳවා තබා ගත යුතු බව අධිකරණය වැඩිදුරටත් පවසා තිබෙනවා.
රුසියානු රජයේ පාලිත ප්‍රවෘත්ති ඒජන්සියක්වන RUPTLY සැකකරුවන් අධිකරණයට ගෙන යන ආකාරය වාර්තා කර තිබූ අයුරු…
පසුගිය සිකුරාදා සිදු වූ ප්‍රහාරයට සම්බන්ධ වූ පුද්ගලයන් ප්‍රහාරයෙන් පැය 14 කට පමණ පසු බ්‍රයන්ස්ක් ප්‍රදේශයේදී අත්අඩංගුවට ගත් බවයි රුසියාවේ ෆෙඩරල් ආරක්ෂක සේවය (FSB) පවසන්නේ.
IS සංවිධානය ප්‍රහාරයේ වගකීම භාරගනිමින් ප්‍රකාශ කර තිබුණේ එය IS-K නම් ශාඛාවක් විසින් සිදු කරන ලද්දක් බවයි. නමුත් රුසියාව එම ප්‍රකාශය පිළිගෙන නොමැති අතර ඒ වෙනුවට සාක්ෂි නොමැතිව, ප්‍රහාරකයන්ට යුක්රේනය උදව් කර තිබෙන බවත්, කියෙව් දේශ සීමාව තරණය කර යුක්රේන භූමියට පැන යාමට ඉඩ සැලසීමට ඔවුන් කවුළුවක් සූදානම් කර බවත් පවසා තිබෙනවා.
යුක්රේනයේ ජනාධිපති සෙලෙන්ස්කි ඊයේ එනම් ඉරිදා එම ප්‍රකාශ ප්‍රතික්ෂේප කළ අතර, ඔහුගේ හමුදා බුද්ධි අධ්‍යක්ෂ මණ්ඩලය ද එම චෝදනා තරයේ හෙළා දැක තිබෙනවා. එක්සත් ජනපද ජාතික ආරක්ෂක කවුන්සිලයේ ප්‍රකාශිකා ඇඩ්‍රියන් වොට්සන් පවසන්නේ ද මෙම ප්‍රහාරයේ සම්පූර්ණ වගකීම IS සංවිධානය විසින් දරනු ලබන බවත් කිසිදු යුක්රේන මැදිහත්වීමක් ඊට නොතිබෙන බවත් ය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වෙතත් ප්‍රහාරයට ආධාර කළ බවට සැක කෙරෙන තවත් පුද්ගලයින් හත් දෙනෙකු ද රුසියාවේදී අත්අඩංගුවට ගෙන තිබෙනවා.