2024 මහ මැතිවරණය පැවැත්වීම අභියෝගයට ලක්කරමින් ගොනුකර තිබූ මූලික අයිතිවාසිකම් පෙත්සම ශ්රේෂ්ඨාධිකරණය විසින් අද (04) විභාගයට නොගෙන නිෂ්ප්රභ කරනු ලැබුවේය. ඒ අද ත්රි පුද්ගල ශ්රේෂ්ඨාධිකරණ විනිසුරු මණ්ඩලයක් ඉදිරියේ එම පෙත්සම කැඳවූ අවස්ථාවේ දී ය.
පෙත්සම පිළිබඳ දීර්ඝ කරුණු සලකා බැලීමකින් අනතුරුව ප්රීති පද්මන් සූරසේන, ශිරාන් ගුණරත්න සහ ප්රියන්ත ප්රනාන්දු යන ත්රිපුද්ගල ශ්රේෂ්ඨාධිකරණ විනිසුරු මඩුල්ලක් විසින් මෙම නියෝගය නිකුත් කළේය.
මෙම පෙත්සම ගොනු කර තිබුණේ අපි ශ්රී ලංකා ජාතික සංවිධානයේ ලේකම් සහ සිවිල් ක්රියාකාරිකයෙකු වන එච්.එම්. ප්රියන්ත හේරත් විසිනි. 2024 මහ මැතිවරණය නොවැම්බර් 14 වැනිදා පැවැත්වීමට ගත් තීරණය අභියෝගයට ලක්කරමින් ගොනුකර ඇති මූලික අයිතිවාසිකම් පෙත්සමක් ඔක්තෝබර් 21 වැනිදා ශ්රේෂ්ඨාධිකරණය හමුවේ ගොනුකරමින් මෙම තීන්දුව ව්යවස්ථා විරෝධී බවට තීන්දුවක් ලබාදෙන ලෙස ඔහු ඉල්ලා සිටියේය. නාමයෝජනා කැඳවීම සහ 2024 මහ මැතිවරණය සඳහා දිනය ප්රකාශයට පත් කිරීම ශ්රී ලංකාවේ මැතිවරණ පනතේ විධිවිධාන උල්ලංඝනය කරන බව පෙත්සමෙන් තර්ක කළේය.
පෙත්සමින් පෙන්වා දී තිබුණේ, පාර්ලිමේන්තු ඡන්ද විමසීම් පනතේ 10 වැනි වගන්තිය අනුව නාමයෝජනා කැඳවීමට ඔක්තෝබර් මස 04 වැනිදා සිට ඔක්තෝබර් 11 වැනිදා දක්වා දින නියම වූ බවය. මැතිවරණ පනත ප්රකාරව නාමයෝජනා භාරගැනීම අවසන් වූ දින සිට සති පහකට නොඅඩු කාලයක් සහ සති හතකට නොවැඩි කාලයක් තුළ ඡන්ද විමසීම සඳහා දින නියම කළ යුතු බව ද පෙත්සම්කරු දක්වා තිබුනේය. ඒ අනුව නාම යෝජනා භාරගැනීම අවසන් වූ ඔක්තෝබර් 11 වැනිදා සිට සති 5ක කාලය, නොවැම්බර් මස 15 වැනිදා අවසන් වන අතර, සති 07 කාලය නොවැම්බර් මස 29 වැනිදා සම්පූර්ණ වන බව පෙත්සම්කරු පෙන්වා දුන්නේය.
මේ සම්බන්ධව අධිකරණයට කරුණු දක්වමින් මැතිවරණ පැවැත්වෙන දිනය ජනාධිපතිවරයා විසින් මැතිවරණ පනතට අනුකූලව නිවැරදි ලෙස නියම කර ඇති බවත් මේ වනවිට මැතිවරණයට අදාළ කටයුතු බොහෝ දුරට අවසන් වී ඇති බවත් නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් විරාජ් දයාරත්න පෙන්වා දුන්නේය. සියලු කරුණු සලකා බැලීමෙන් අනතුරුව ශ්රේෂ්ඨාධිකරණය මෙම මූලික අයිතිවාසිකම් පෙත්සම විභාගයට නොගෙන ප්රතික්ෂේප කිරීමට නියෝග කළේය.
