මහනුවර සිංහල වෙළෙඳ පෙරමුණට අනුබද්ධිතව පවත්වාගෙන යන මූල්ය සමාගමකට ව්යාජ ලේඛන ඉදිරිපත් කර රුපියල් කෝටි 02 ක ණය මුදලක් ලබාගෙන එම මුදල් නොගෙවා පැහැර හැර සිටි මහනුවර ව්යාපාරිකයෙකු අපරාධ පරීක්ෂණ දෙපාර්තමේන්තුව මගින් සැකපිට අත්අඩංගුවට ගෙන තිබේ.
මෙම පුද්ගලයා වාහන ආනයනය කිරීම සඳහා අදාළ ණය මුදල ලබාගෙන ඇත්තේ ඇපකර ලෙස වාහන වලට අදාළ ලියකියවිලි කිහිපයක් මූල්ය සමාගමට ලබා දිමෙනි. ණය මුදල් පැහැර හැරීමෙන් අනතුරුව කළ සොයා බැලීමේ දි අනාවරණය වන්නේ මෙම තැනැත්තා ඇපකර ලෙස තැන්පත් කළ වාහන ඔහු විසින් විකුණා ඇති බවය.
මහනුවර සිංහල වෙළෙඳ පෙරමුණේ සභාපති යසස් චන්ද්රසේකර ප්රකාශ කරන්නේ වෙළෙඳ පෙරමුණේ සමාජිකයින්ගේ මුදල් යොදවා අදාළ මූල්ය සමාගම පවත්වාගෙන යන්නේ සාමාජිකයින් ගේ ව්යාපාර කටයුතු ප්රවර්ධනය වෙනුවෙන් සහන පොලියක් යටතේ ණය මුදල් ලබා දීමට බවය.
සභාපතිවරයා පවසන්නේ මෙම ව්යාපාරිකයා මීට පෙර වාහන ආනයනයට ණය මුදල් ලබාගෙන එම ණය මුදල කලට වේලාවට නිසි අයුරින් පියවා විශ්වාසය තහවරු කරගැනීමෙන් අනතුරුව මෙම වංචාව සිදුකර ඇති බවය.
අපරාධ පරීක්ෂණ දෙපාර්තමේන්තුවට පැමිණිලි කිරීමෙන් පසු ඔවුන් මෝටර් රථ ලියාපදිංචි කිරීමේ දෙපාර්තමේන්තුවට සැකකරු ලබා දී තිබූ ලියකියවිලි සහ මූල්ය සමාගමට ලබා දී තිබූ ලියකියවිලි ඔවුන් භාරයට ගෙන රස පරීක්ෂක වෙත යොමුකර වාර්තාවක් ලබා ගැනීමෙන් අනතුරුව තහවුරු වී ඇත්තේ සැකකරු මූල්ය සමාගමට ලබා දී තිබූ ලියකියවිලි ව්යාජ ඒවා බවය.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර විමර්ශන සිදුකරයි
