අනුරාධපුර ගලෙන්බිඳුණුවැව ප්රදේශයේ නිවසක ඇති වූ ගින්නකින් පියෙකු සහ දියණියක් මිය ගොස් තවත් පවුලේ සාමාජිකයින් සිව් දෙනෙකු පිළිස්සුම් තුවාල ලබා රෝහල් ගත කර ඇති බව පොලිසිය පවසයි.
මෙම සිද්ධිය වාර්තා වන්නේ අද (06) අළුයම දෙකට පමණ ගලෙන්බිඳුනුවැව පොලිස් වසමේ නුවරගම් ජනපදයේ පඩිකාර මඩුව ප්රදේශයෙනි. පොලිසිය පවසන්නේ පවුල් ආරවුලක් හේතුවෙන් පියා පෙට්රල් යොදාගෙන තම නිවසට ගිනි තබා ඇති බවය. පියා (43) සහ දියණියක් (13) එම ස්ථානයේම මිය ගොස් ඇත්තේ ඒ ගින්නට හසුවීමෙනි.
මේ වනවිට අනුරාධපුර ශික්ෂණ රෝහලේ ප්රතිකාර ලබමින් ඉන්නේ එම පුද්ගලයාගේ 36 හැවිරිදි බිරිය, වයස අවුරුදු 20ක් වූ වැඩිමහල් පුතා, වයස අවුරුදු 15ක් වූ දියණිය සහ වයස අවුරුදු 66ක් වන බිරියගේ මව යන සිවු දෙනාය.
නිවස ගිනි ගන්නා අවස්ථාවේ නිවස තුළ සිටියේ බිරිඳ, දියණියන් දෙදෙනා සහ බිරිඳගේ මව පමණක් බවත් සිද්ධිය දැනගත් පසු එම ස්ථානයට පැමිණි පුතා ගිනි ගන්නා නිවසේ සිටි පිරිස බේරා ගැනීමට උත්සාහ කරද්දී පිළිස්සුම් තුවාල ලබා ඇති බවත් පොලිසිය පැවසීය.
වැඩිදුර පරීක්ෂණවලින් හෙළි වී ඇත්තේ මෙම පුද්ගලයා තම බිරිඳට නිතර නිතර පහර දෙන පුරුද්දක් ලෙස මත්පැන් පානය කරන්නෙකු බවයි. නිවස තුළ ආරවුල් හේතුවෙන්, ගලෙන්බිඳුණුවැව පොලිසියට අවස්ථා කිහිපයකදී පැමිණිලි කර ඇති අතර, එම අවස්ථාවේදී දෙපාර්ශවය ම කැඳවා අවවාද කර ඇති බව පොලිසිය පවසයි.
සිද්ධිය සම්බන්ධයෙන් පොලිසිය අඛණ්ඩව පරීක්ෂණ පවත්වයි.
