වාර්ෂික ඇසළ පෙරහර මංගල්‍ය නැරඹීම සඳහා සාමාන්‍ය ජනතාවට ඇති අයිතිය උදුරාගැනීමට නගර සභාව පොලිසිය යුද හමුදාව දැඩි වෑයමක නිරත වන බව පෙනෙන්නට තිබේ.
දින පහක් පවතින කුඹල් පෙරහැර සමයේ මෙම තත්වය දක්නට නොලැබුණු අතර රන්දෝලි පෙරහර ආරම්භයේ සිට රන්දෝලි පෙරහර පැවැත්වෙන අද මෙම තත්ත්වය වර්ධනය වීමක් දක්නට ඇත.
අද සවස් වන විට පෙරහර මාර්ගය හෙවත් මහමළුව අවසානයේ සිට වැවරවුම දළදා වීදිය යටිනුවර වීදිය දෙසට වන්නට වූ පදිකවේදිකාවල කාඩ්බෝඩ් සහ පොලිතීන් එලා ඒවායෙහි ගල් අතුරා පදිකවේදිකාවේ ඉඩ වෙන් කර තැබීමට නගර සභාව සහ පොලිසිය කටයුතු කර තිබෙනු දක්නට ලැබිණි.
එම අවස්ථාවේ අසල පිරිස් විසින් මෙම ඉඩ කාගේ දැයි අසන විට ඔවුන් කියා සිටියේ නගර සභාවේ නිලධාරීන් පැමිණ ඉඩ වෙන්කර තබා ගිය බවය.
තවත් ඉඩක් පොලිස් නිලධාරීන් විසින් පැමිණ අල්ලා ගනු ලැබූ අතර ඒවායෙහිද කොළ එළ ගල් තැබූ බව අවට පිරිස් කියා සිටියහ. ඒවනවිටත් නන් දෙසින් පැමිණි සාමාන්‍ය ජනතාව එම ඉඩ ද මගහැර පෙරහැර මාර්ගයට ඈතට වන්නට තිබූ ඉඩකඩ වෙන් කර තබා ගන්නා බවක් පෙනෙන්නට තිබිණි.
මෙම සිදුවීම් සම්බන්ධයෙන් මහනුවර ජ්‍යෙෂ්ඨ පොලිස් අධිකාරී චමිල් රත්නායක දැනුවත් කිරීමෙන් අනතුරුව ඔහු විසින් මහනුවර පොලිසියේ පරිසර ඒකකයේ නිලධාරීන් ලවා එම ඉඩකඩ වෙන් කර තැබූ පොලිතීන් සහ කාඩ්බෝඩ් ඉවත් කිරීමට කටයුතු යොදා තිබිණි. රාජ්‍ය නිලධාරින් විසින් එලෙස ඉඩකඩ වෙන් කර තැබීම මහජනතාවට කරන දැඩි අසාධාරණයක් බවද හෙතෙම කියා සිටියේය.
මහනුවර ඇසළ පෙරහැර දළදා මාළිගාවේ පෙරහැර විෂ්ණු නාථ පත්තිනි කතරගම යන සිව් මහා දේවාල පෙරහැර මීටර් දෙදහස් පන්සියයක් අතර දුරක විචිත්‍රවත් අයුරින් ගමන් කරනු ලබයි.
මෙවර අවසන් රන්දෝලි පෙරහැර දෙක හෙවත් අද සහ හෙට පෙරහර විචිත්‍රවත් කිරීම සඳහා අලි ඇතුන් හැටකට ආසන්න සංඛ්‍යාවක් පෙරහැරේ ගමන් කරනු ලබයි.
රටටත් ජනතාවටත් සෞභාග්‍ය උදා කරලීම පිණිස පවත්වනු ලබන මෙම පෙරහර මංගල්‍යය උතුම් පින්කමක් සේ සලකා ඉතිහාසයේ පටන් මේ තාක් පැවත ආවද මේ වන විට පෙරහර මංගල්‍යය ව්‍යාපාරිකයින්ගේ තෝතැන්නක් බවට පරිවර්තනය වී තිබේ.
සාමාන්‍ය ජනතාව රටේ නන් දෙසින් පැමිණ මේ අසිරිමත් මංගල්‍යය දැක බලා ගැනීමට පෙරුම් පිරුවද මේ මහනුවර නගරයේ සිටින ඇ.තැම් ව්‍යාපාරික ආයතන ප්‍රධානීන් පෙරහර සරණ වීදි වල පදිකවේදිකාවේ සිට වෙළඳසැල් අසල ඉඩකඩ රු.2500 සිට ඉහලට විකිණීමට පුරුදු වී සිටිති.
අද වන විට එය ඉටි කොළයක ඉඩ රුපියල් දහසක සිට ඉහළ මුදලක්කට විකිණීමට තරම් පහත් තැනට වැටී තිබේ
පෙරහර නරඹා දළදා කරඬුවට සාදු කාර දී ආශිර්වාද ලබාගැනීමට වීදියක සිට ගැනීමට පවා ජනතාවට සිදුව ඇත්තේ කාසි මුදල් විසි කිරීමෙන් අනතුරුවය
අතීතයේ දළදා මාළිගා පරිශ්‍රයේ මහ වාහල්කඩ දෙපස දිය අගලේ වලාකුළු බැම්මේ පවා මිනිසුන් රැඳී පෙරහැර නැරඹූ බවට ඡායාරූප සාක්ෂි දරයි.
එපමණක් නොව එතැන් සිට මහමළුව දෙපස සෙසු වීථිවල අස්සක් මුල්ලක් වහලයක් ගහක් නෑර ජනතාවගෙන් පිරී ඉතිරී තිබෙනු ද වාර්තා වී ඇත. ඒ බිම අද වෙන්දේසියේය. ඒ පොදු අවකාශය කාලකණ්ණි පිරිසක් විසින් අලෙවි කරති.
මේ අධමකමට වගකිවයුත්තේ මහනුවර පාලනය කරන බලධාරීන් ය. මධ්‍යම පළාත භාර ආණ්ඩුකාර වරයාගේ සිට මහ නගර සභාව පොලිසිය යුද හමුදාව දිස්ත්‍රික් ලේකම් කාරයාල ඇතුළු බලධාරීන් නගරයට පැමිණෙන සාමාන්‍ය ජනතාවට පහසුකම් සලස්වමින් ඔවුන්ගේ අයිතිය වෙනුවෙන් පෙනී සිටිය යුතුය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
එහෙත් සිදුවන්නේ ඊට හාත්පසින්ම වෙනස් කාරණයකි. මේ පෙරහර මංගල්‍ය සමයේ පය තබන අඩියකින් පවා රුපියල් සත සෙවීමට මේ තුච්ඡ බලධාරීන් විවිධ උපක්‍රම යොදා තිබේ එය කනගාටුවට කරුණකි.