නාමල් රාජපක්ෂ හරියට මාස 02කින් හදන බ්‍රොයිලර් කුකුලෙක් වගේ බවත් දිය හැකි සියලු ඉන්ජෙක්ෂන් දී කෙටිකලකින් උස් මහත් කොට පාර්ලිමේන්තු එවා ඇති බවත් ජාතික නිදහස් පෙරමුනේ නායක පාරලිමෙන්තු මන්ත්‍රී විමල් වීරවංශ පවසයි.
ඔහු ඒ තත්වයට පත් කිරීමත් බැසිල් රාජපක්ෂ ද්විත්ව රටවැසියා ආණ්ඩුක්‍රම ව්‍යවස්ථාව සංශෝධනය කොට පාර්ලිමේන්තු එවීමත් යන මහින්ද රාජපක්ෂ හිටපු ජනාධිපතිවරයා ගත් අමනෝඥ තීරණ දෙක නිසා රාජපක්ෂවරුන්ගේ දේශපාලනයට සදහටම අවසන් වී ඇති බව මන්ත්‍රිවරයා පැවසූයේ අම්බලන්තොට ජන හමුවක් අමතමිනි.
ෙපසුගියදා අම්බලන්තොට කමත හෝටල් පරිශ්‍රයේදී පැවැති නිදහස් ජනතා සන්ධානයේ හම්බන්තොට දිස්ත්‍රික් ක්‍රියාකාරී හමුව අමතමින් විමල් වීරවංශ මෙසේ කීවේය.
මහින්ද රාජපක්ෂ හිටපු ජනාධිපතිවරයාට මේ ඉරණමට ලක්වීමට වෙන්නේ නැහැ, එදා ඒ විදිහට නාමල් රාජපක්ෂ පාර්ලිමේන්තු එවීමේ ඒ ගොන් අමන තීරණය නොගත්තා නම් සහ බැසිල් රාජපක්ෂ ද්විත්ව පුරවැසියාට පාර්ලිමේන්තු එන්න පුළුවන් විදිහට ව්‍යවස්ථා සංශෝධන කරන්න නොගියා නම්.
එහෙම නම් මීට වඩා ප්‍රගතිශීලී, සංවාදශීලී ආණ්ඩු පාලනයක් ගෙනයාමට තිබුණා. රාජපක්ෂලා ඉවරෙටම ඉවර කර ගැනීමට බලපෑ ප්‍රධාන හේතු දෙක මා ඉහත කී හේතු දෙකයි. නමුත් එයාලා අදටත් මේක පිළිගන්නේ නැහැ.
2015දී පැරදුණාට පස්සේ අපි බොහොම අමාරුවෙන් කරේ තියාගෙන ඇවිත් ඔසවා තැබුවා. අපි හිතුවා වළකට වැටුණු නිසා මොළයට ලාභයක් කරගෙන ඇති කියා. 2015දී යන්න වුණේ පවුල් පාලන චෝදනාවට. එදා කැබිනට් මණ්ඩලයේ හිටියේ රාජපක්ෂවරුන් හතරයි. නමුත් 2019දී මේක බින්දුවට නැතත් එකට, දෙකට හෝ අඩු වෙයි, කියා අපි හිතුවා. නමුත් ජනාධිපති ගෝඨාභය රාජපක්ෂ, අගමැති මහින්ද රාජපක්ෂ, චමල් රාජපක්ෂ, බැසිල් රාජපක්ෂ, නාමල් රාජපක්ෂ යන ආකාරයට කැබිනට් ඇමතිවරු පහක් වුණා. ඊට අමතරව කෘෂිකර්ම රාජ්‍ය ඇමැති වෙලා ශෂීන්ද්‍ර රාජපක්ෂ හිටියා. බාල පොහොර ගොවියාට දීලා, ඔහුව පීඩාවට පත් කිරීමට මූලික වගකිවයුත්තා ශෂීන්ද්‍ර රාජපක්ෂ. මේ රාජපක්ෂවරුන්ගේ වරිග සභා දේශපාලනය තමයි ඔවුන් අද මේ තත්ත්වයට ඇදවැටීමටත් රට දේශපාලන වශයෙන් අරාජික වීමටත් මූලික හේතුව.
මේ විදියට ඉස්සරහට යන්න බැහැ කියලා අපි කියන්න ඕන හැම විදියකින්ම කිව්වා. ඒත් ඇහුවේ නැහැ ඉන්පසු අපි තීරණය කළා, මේ රටේ ජනතාව මේ වරිග සභා දේශපාලනයෙන් ගලවලා නිර්ප්‍රභූ පැලැන්තියට, අපේ සාමාන්‍ය අම්මා තාත්තාගේ දූ දරුවන්ට මේ රටේ දේශපාලන බලය මාරු කරන්න ඕනේ. ඒකට අවශ්‍ය නායකත්වය කවර අභියෝග, දුෂ්කරතා මැද වුවත් ලබා දිය යුතුයි කියලා.
මේ ආර්ථික අර්බුදය පැමිණෙන එක නතර කරගන්න අපටත් බැරිවුණානේ කියන පසුතැවීම අපටත් තිබෙනවා. ඒ පසුතැවීමෙන් නිදහස් වෙනවා කියන්නේ ‘මේ දීන දේශපාලන ක්‍රමය වෙනස් කරලා, අලුත් මාවතකට මේ රට රැගෙන යනවා‘ කියන එක. ඒක අපි කරනවා.
එදා 2015දී මහින්ද රාජපක්ෂ මහත්තයා පැරදිලා දිනකට හෝ දෙකකට පස්සෙ මම මැදමුලනට ගියා. ඔහු සමග එදා කෑම කමින් කතා කරනකොට මම කිව්වා රටේ ජනතාව තුළ තියෙනවා ඔබතුමාගේ පරාජය පිළිබඳව කම්පනයක්. අපි හැකි ඉක්මනින් ජනතාව ඒකරාශී කරන්න රැලියක් පවත්වමු!‘ කියලා. ‘පිස්සුද විමල් අපේ ශ්‍රී ලංකාකාරයා පැරදුනාම ලේසියෙන් නැගිට්ටවන්න බැහැ කියලා තමයි මහින්ද මහත්තයා එදා කීවේ.
‘අතීතයට අදාළව එහෙම වෙන්න ඇති. හැබැයි දැන් එහෙම නොවෙයි කියලා මම කීවා. ඉන්පසුව තමයි ‘විමල් – දිනේෂ් – වාසු – ගම්මන්පිල අපි හතරදෙනා එකතුවෙලා සාකච්ඡා කරලා 2015 පෙබරවාරි 18 වැනිදා නුගේගොඩ මහා රැලිය සංවිධානය කළේ. එහෙම දැවැන්ත රැලියක් කරන්න පුළුවන් කියලා මහින්ද මහත්තයාවත් විශ්වාස කළේ නැහැ. එතුමන්ගෙන් අපි ඉල්ලුවාම එදාට සිදු කරන ප්‍රකාශය විමල්ම ලියාගන්න කීවා. අපිම ලියාගෙන බැලුවාම ඒක කියවන්නවත් කෙනෙක් හිටියේ නැහැ. අපට බැහැනේ ඒක කියවන්න. ඒකට ශ්‍රී ලංකා නිදහස් පක්ෂයේ කෙනෙක් ඕනේ. ශ්‍රී ලංකා නිදහස් පක්ෂයේ හිටපු අය බය වුණා මන්ත්‍රී ධුරය අභියෝගයට ලක් කරලා අධිකරණ ක්‍රියාමාර්ග ගනී කියලා.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
අන්තිමේදී දයාන් ජයතිලක මහත්තයා කැමැති කරවාගෙන ඒක කියවාගත්තා. අපි එවැනි අභියෝගවලට කර ගහලා තමයි ‘මහින්ද සුළඟ‘ ජයග්‍රහණයෙන් කෙළවර කළේ. කවුරුහරි හිතනවා නම් අපි විවෘත කරන්නේ ජයග්‍රාහී නොවන මාවතක් කියලා, අපි ඔප්පු කරල පෙන්වනවා, මේක තමයි ජයග්‍රාහී මාවත කියලා.