පුද්ගල ආරක්ෂාව සඳහා ශ්රී ලංකා යුද හමුදාව සහ ශ්රී ලංකා පොලිසිය විසින් නිකුත් කර ඇති ගිනි අවි රජයේ නියමය පරිදි මේ මස 31 වැනි දිනට පෙර නැවත රජයට භාර දීමට අපොහොසත් වන සියලුම බලපත්ර ලාභී ගිනි අවි හිමිකරුවන් සම්බන්ධව 1916 අංක 33 දරන තුවක්කු ආඥා පනත යටතේ නීතිය ක්රියාත්මක කරන බව විශ්රාමික එයා වයිස් මාර්ෂල් සම්පත් තුයියකොන්තා නිවේදනය කරයි.
ආරක්ෂක ලේකම්වරයා මෙසේ පවසයි.
“සිවිල් පුරවැසියන්ට තම ජීවිත ආරක්ෂාව සඳහා ආරක්ෂක අමාත්යාංශය විසින් ලබා දී තිබූ සියලුම වර්ගයේ ගිනි අවි සහ පතොරොම් 2024 නොවැම්බර් 21 වැනි දිනට පෙර ප්රමාණාත්මකව සමාලෝචනය කිරීමේ පරමාර්ථයෙන් නැවත රජයට භාර දෙන ලෙස ආරක්ෂක අමාත්යාංශය විසින් සියලුම විද්යුත් සහ මුද්රිත මාධ්ය මගින් දැනුම් දෙනු ලැබුවා.
අදාල දැනුම් දීමට ප්රතිචාර දක්වමින් මේ දක්වා සියයට 85ක් පමණ බලපත්ර ලාභීන් විසින් එම ගිනි අවි නැවත භාර දීමට කටයුතු කර තිබෙනවා.
ජීවිතාරක්ෂාව සඳහා එක් පුද්ගලයෙකුට එක් ගිනි අවියක් පමණක් ලබා දීම ආරක්ෂක අමාත්යාංශයෙන් තීරණය වන අතර එය ද සිදුවන්නේ බුද්ධි වාර්තාවන්ට අනුගතවයි.
ගිනි අවි ඉල්ලා ඉදිරිපත් කරන ලද අභියාචනා සියල්ල සමාලෝචනය සහ ගිනි අවි පරීක්ෂාව 2025 ජනවාරි මස 20 වැනි දින අවසන් කරනු ලබනවා.
පසුගිය කාල වකවානුව තුළ ශ්රි ලංකා පොලිසිය සහ යුද හමුදාව විසින් සැලකිය යුතු ගිනි අවි සහ පතොරොම් ප්රමාණයක් නිකුත් කර ඇති බව නිරීක්ෂණය වී තිබෙනවා. ඒ නිසා එම ගිනි අවි සහ පතොරොම් ද 2024 දෙසැම්බර් මස 31 වැනි දිනට පෙර නැවත රජයට භාර දෙන ලෙස ආරක්ෂක අමාත්යාංශය දැනුම් දී තිබෙනවා.
එබැවින් ඒ උපදෙස්වලට අනුගත වී මෙම ගිනි අවි සහ පතොරොම් ලඟම ඇති පොලිසියට භාර දෙන ලෙසත් නියමිත දිනයට පෙර ගිනි අවි භාර දී ගිනි අවි සංගණනය සහ විගණනය සඳහා ඉදිරිපත් නොවන බලපත්ර ලාභින්ට එරෙහිව 1916 අංක 33 දරන තුවක්කු ආඥා පනත යටතේ නීතිමය ක්රියාමාර්ග ගැනීමට සිදුවන බව ද දැනුම් දෙනු ලබනවා…
ආරක්ෂක ලේකම්වරයා අවධාරණය කළේය.
