තණමල්විල ප්රදේශයේ 2023 වසරේ සිට 16 හැවිරිදි දැරියක් සමූහ දූෂණයට ලක් කිරීමේ අමානුෂික සිදුවීම් මාලාව සහ වින්දිතයාගේ මව විසින් චෝදනා කරන පරිදි අදාළ අධිකරණ වෛද්ය නිලධාරියා විසින් වින්දිත දැරියට වාචික හා මානසික හිරිහැර කිරීම දැඩි ලෙස හෙළා දකිමින් පාර්ලිමේන්තු මන්ත්රීවරියන්ගේ සංසදය නිවේදනයක් නිකුත් කර තිබේ.
පාර්ලිමේන්තු මන්ත්රීවරියන්ගේ සංසදයේ සභාපති වෛද්ය සුදර්ශිනී ප්රනාන්දුපුල්ලේගේ අත්සනින් යුතුව මෙම සිද්ධිය හෙළා දකිමින් නිකුත් කළ නිවේදනය මගින් පෙන්වා දෙන්නේ මෙම දැරියට මුහුණදීමට සිදුවූ අමානුෂික සිදුවීම් මාලාව තුළින් පෙන්නුම් කරන්නේ සිද්ධියට අදාලව ශ්රී ලංකාවේ සියලුම වගකිවයුතු බලධාරීන් සිය රාජකාරිය පැහැර හැර ඇති බවයි.
මෙවැනි අනීතික සිදුවීම්වලදී හෘද සාක්ෂියට එකඟව, වගකීමෙන් හා වගවීමෙන් කටයුතු කිරීමේ අවශ්යතාව ඇය අවධාරණය කරන සංසදය ළමා හා කාන්තා අපයෝජන වැළැක්වීමේ කාර්යාංශයයෙන් සහ ජාතික ළමා ආරක්ෂක අධිකාරියෙන් ඉල්ලා සිටින්නේ සිද්ධියට සම්බන්ධ සියලුම පාර්ශ්වයන් අධීක්ෂණය කර දරුවාට තවදුරටත් හිරිහැරවලින් තොරව ජීවත් වීමට අවශ්ය පරිසරය සකස් කරන ලෙසත්, සමස්ථ ක්රියාවලිය කළමනාකරණය කර උරිම සැලකිල්ලෙන් ඇයට සුවපත් සමාජ ජීවිතයක් සඳහා පිළියමක් ලබා දෙන ලෙසත්ය.
එවැනි අවස්ථාවන් ඇති වූ විට ඵලදායි ලෙස සහ සංවේදීව එම තත්ත්වයන් හැසිරවිය යුතු ආකාරය පිළිබඳව රටපුරා ගුරුවරුන් පුහුණු කිරීමට පියවර ගන්නා ලෙස අධ්යාපන අමාත්යාංශයෙන් කාන්තා මන්ත්රී සංසදය ඉල්ලා සිටී. පාසල්වල ප්රතිරූපයට වඩා දරුවාගේ ගරුත්වය ප්රමුඛ වන අතර ප්රමුඛත්වය දිය යුතු බව සංසදය අවධාරණයෙන් පෙන්වා දෙයි.
කාන්තා සහ ළමා අයිතිවාසිකම් මෙලෙස උල්ලංඝනය කිරීම් කිසිසේත්ම පිළිගත නොහැකි බවත් ඒ සඳහා කිසිදු ඉඩක් නොතැබිය යුතු බවත් පාර්ලිමේන්තු මන්ත්රීවරියන්ගේ සංසදය වැඩිදුරටත් පෙන්වා දෙයි. එවැනි සිදුවීම් වැළැක්වීමට සහ ශ්රී ලංකාවේ සෑම ගැහැණු දරුවකුගේම අයිතිවාසිකම් සහ ගෞරවය ආරක්ෂා කිරීමට අවශ්ය සියලු පියවරයන් තහවුරු කිරීම සදහා ඉදිරියටත් පාර්ලිමේන්තු මන්ත්රීවරියන්ගේ සංසදය පෙනී සිටින බවත් මෙම නිවේදනය මගින් වැඩිදුරටත් පෙන්වා දෙයි.
පාර්ලිමේන්තු මන්ත්රීවරියන්ගේ සංසදයේ සම්පූර්ණ නිවේදනය පහත දැක්වේ.
