කොළඹ ජාතික රෝහලේ බාහිර රෝගී අංශ ගොඩනැගිල්ලේ ස්ථාපනය කර තිබෙන MRI scan යන්ත්රයේ පරීක්ෂණ කටයුතු විශේෂඥ වෛද්යවරයෙකුගේ බලපෑම මත පසුගිය 03 දා සිට නවතා දමා ඇති බව වාර්තාවේ.
මේ හේතුවෙන් දිනකට MRI scan පරික්ෂණයන් සිදුකළ යුතු රෝගීන් දැඩි අසීරුතාවකට පත්ව ඇති බව ලංකාසර වෙත අදහස් දක්වමින් රෝහල් ප්රකාශකයෙක් පැවසුවේය.
මෙම ස්කෑන් යන්ත්රය හදිසි අනතුරුවලට ලක්ව හෝ සැත්කම්වලට හෝ ස්නායු සැත්කම්වලට භාජනය වීමට නියමිතව සිටින රෝගීන්ගේ පරීක්ෂණ සඳහා වෙන්කර තිබී එකක් බවද එම ප්රකාශකයා පැවසුවේය.
මෙම ස්කෑන් යන්ත්රය මගින් දිනකට රෝගීන් 25 ට වැඩි ප්රමාණයකගේ MRI පරීක්ෂණ සිදුකර අතර පසුගිය 3 වනදා සිට ඊයේ (06) දිනය තෙක් රෝගීන් 75කට අධික පිරිසකට MRI scan පරික්ෂණයන් සිදුකර ගැනීමට නොහැකි තත්වයක් උදාවී ඇති බවද පැවසේ.
MRI scan පරීක්ෂණ සිදු කිරීම සඳහා සූදානම් කර සිටින රෝගීන් මේ වනවිට පරීක්ෂණ සිදු කිරීමට නොහැකි වීම හේතුවෙන් රෝහලින් පිටත්කර හරින බවත් එම රෝගීන්ට පවසා තිබෙන්නේ යන්ත්රය බිඳ වැටීම හේතුවෙන් පරීක්ෂණ සිදු නොකරන බවත් යැයි ද සඳහන් කර ඇතැයි එම ප්රකාශකයා කීය.
MRI පරීක්ෂණ මෙලෙස සිදු නොකිරීම හේතුවෙන් රෝගීන්ට පුද්ගලික රෝහල්වලින් පරීක්ෂණ සිදු කර ගැනීමට සිදුව තිබෙන අතර පරීක්ෂණයක් සඳහා රුපියල් 30000 ත් 120000 ත් අතර මුදලක් වැය කිරීමට සිදුව ඇත.
මේ පිළිබඳව අදාළ බලධාරීන් කඩිනමින් අවධානය යොමු කොට රෝගීන්ගේ පරීක්ෂණ සිදු කිරීම සඳහා මැදිහත්වීම වැදගත් බව රෝහල් ආරංචි මාර්ග පෙන්වා දෙයි.
