දිනසේන රතුගමගේ –
මව්කිරි හිරවීමෙන් මියගිය බව ප්රකාශ වුණු යාපනයේ දින හතලිස් පහක බිළිදා මියගොස් ඇත්තේ මව විසින් පහර දීමෙන් බව හෙළිවීමත් සමගම තෙලිප්පලේ පොලීසිය විසින් එම කාන්තාව ඊයේ ( 4 ) අත් අඩංගුවට ගෙන තිබේ.
යාපනයේ අලවෙඩ්ඩි ප්රදේශයේ කාන්තාවක් සිය දරුවා රෝහල් ගත කොට තිබුණේ කිරි උගුරේ හිරවීමෙන් පසුව දරුවා නිසොල්මන් වී ඇති බව සඳහන් කරමිනි.
වෛද්යවරු වහාම එම දරුවාට ප්රථමාධාර ලබා දී තෙලිප්පලෙයි රෝහල වෙත මාරු කොට යැවීමෙන් පසුව දරුවා රෝහලේදී මියගොස් තිබුණි.
මෙසේ මියගොස් තිබුණේ යාපනය අලවෙඩ්ඩි ප්රදේශයේ දින හතලිස් පහක සසිරුබන් නිකලස් නැමති දරුවෙකි.
දරුවාගේ ශරීරයේ තුවාල කීපයක් තිබූ නිසා මරණය පිළිබඳව විශාල සැකයක් පවතින බව වෛද්යවරු තෙලිප්පලෙයි පොලීසියට දැනුම් දීමෙන් පසුව පොලීසිය අධිකරණ නියෝගයක් ලබා ගෙන දරුවාගේ මරණය සම්බන්ධයෙන් පශ්චාත් මරණ පරීක්ෂණයක් යාපනය ශීක්ෂණ රෝහලේ අධිකරණ වෛද්යවරයා ලවා පවත්වනු ලැබීය.
එහිදී අනාවරණය වී ඇත්තේ දරුවාගේ හිසට තදින් පහර කීපයක් එල්ල වීම නිසා දරුවා මියගොස් ඇති බවටය.
තවද දරුවාගේ අත් හා කකුල් වල අස්ති බිදීමක්ද සිදුව ඇති බව නිගමනය වී තිබුණි.
ඒ අනුව දරුවාගේ මව තෙලිප්පලෙයි පොලීසිය විසින් අත් අඩංගුවට ගෙන ප්රශ්න කරගෙන යයි.
කාන්තාව පොලීසියට ප්රකාශ කොට තිබුණේ කිරි පානය නොකල නිසා තමන් දරුවාගේ හිසට තට්ටු කල බවයි.
සැකකටයුතු මව මල්ලාකම් අධිකරණය වෙත ඉදිරිපත් කිරීමට තෙලිප්පලෙයි පොලිසිය පියවර ගෙන තිබේ.
