-
මාස 08ක් තුළ දෙවන නැව ගිනි ගන්නා තුරුත් ආපදාවකට මුහුණ දිය හැකි සේ යාත්රා දියුණු කර නෑ…
මාස අටක් තුළ ලංකාවේ මුහුදු කලාපයේ දෙවැනි නැවත් ගිනි ගෙන විනාශ වන තෙක් සමුද්රීය ආපදා අවස්ථාවක් කළමනාකරණය කරගත හැකි ආකාරයට ඊට මුහුණ දිය හැකි පහසුකම් වැඩි දියුණු කිරීම ශ්රී ලංකා සමුද්රීය ආරක්ෂාව භාර අංශ විසින් පැහැර හැර ඇතැයි නාවුක ක්ෂේත්රයේ විශේෂඥ ආරංචි මාර්ග පෙන්වා දෙයි.
නැවක ගින්නක් පාලනය කරගත හැකි සේ වැඩි දියුණු කළ හැකි නෞකා හයක් නාවික හමුදාව සතුව පවතින බවත්, ඉන් හතරක්ම එක්ස්ප්රස් පර්ල් නැවේ ගින්න නිවා දැමීම සඳහා ඉන්දියාවෙන් ගෙන්වා ගත් නෞකා දෙක අයත් ඛාණ්ඩයටම අයත් බවත් එම ආරංචි මාර්ග තහවුරු කරයි.
වර්ෂ 2020 සැප්තැම්බර් 3 වැනි දින ලංකාවේ බටහිර වෙරළේ දී ගිනි ගත් දැවැන්ත බොර තෙල් ප්රවාහන නෞකාවක් වූ නිව් ඩයමන්ඩ් නෞකාව ගිනිගෙන ගිනිය නොහැකි තරම් බරපතල පරිසර හානියක් කළ බවත්, සැප්තැම්බර් 11 වන විට ගින්න නිවා දැමීමට හැකි වූයේ ද ඉන්දීය සහාය ලබාගෙන බවත් පවසන එම ආරංචි මාර්ග එම අත්දැකීමෙන් පසුව හෝ මේ නෞකාවල අවශ්ය වැඩි දියුණු කිරීම් කර ආපදාවට මුහුණ දිය හැකි තත්වයට පත් කළේ නැති බව පෙන්වා දෙයි
“ මේ සඳහා විශාල මුදලක් වැය වන්නෙ නෑ. අවශ්ය සැලසුම් සහගත ප්රමුඛතාවයන් පමණයි.“ එම ආරංචි මාර්ග කියයි.
ජාත්යාන්තර සම්මුතීන්ට අනුව ලංකාව අවට කලාපයේ සමුද්රීය ගලවා ගැනීමේ මෙහෙයුම් සඳහා මැදිහත් වීමට ලංකාව බැඳී සිටින බවත් ඒ සඳහා ඇති ජාත්යාන්තර ප්රමිතීන් මගහරිමින්, ආපදාවක් කළමනාකරණය සඳහා අවශ්ය මූලිකාංග සම්පාදනය කරගන්නේ නැතිව කෙරෙන පැහැර හැරීම් අවසානයේ රටට විශාල හානියක් සිදු කරන බවත් එම විශේෂඥවරු පෙන්වා දෙති.