-
කවුරු අතිනුත් වැරදි වෙනවා… ඒ වැරදි නිවැරදි කරන් මේ දක්වා ජාතික ජන බලවේගය පැමිණි ගමන අගය කළ යුතුයි.. මල්වතු මහා නා හිමියෝ පවසති…
-
ජාතික ජන බලවේග ආණ්ඩුවක් යටතේ බුද්ධාගමට ලබා දී ඇති ප්රමුඛස්ථානය අහෝසි කිරීමට කටයුතු කරන බවට ගෙන යන ප්රචාරය සාහසික බොරුවක්… ජාතික ජන බලවේගයේ ජාතික විධායක සභික ලාල් කාන්ත නා මල්වතු මහා නා හිමියන්ට දන්වා සිටී…
ජාතික ජනබලවේගයේ නායකයින්ගේ කතා අහන්නට මැතිවරණ රැලි වලට පැමිණෙන වැඩි පිරිසක් පසුගිය මැතිවරණවල දී ඔවුන් ට ඡන්දය නොදුන් නමුත් මෙවර එම තත්ත්වයේ වෙනසක් පෙනෙන්නට ඇතැයි මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියෝ පවසති.
අතීතිය සැලකීමේ දී කොයි කා අතිනුත් වැරදි හා අඩුපාඩු සිදුව තිබෙන බවත් ජාතික ජනබලවේගය එම අඩුපාඩු නිවැරදි කර ගනිමින් මේ දක්වා පැමිණීම අගය කළ යුතු බවත් උන්වහන්සේ කීහ.
ජාතික ජනබලවේගයේ විධායක සභික කේ.ඩී ලාල්කාන්ත ඇතුළු කණ්ඩායමක් ඊයේ (17) මල්වතු මහා විහාරයට ගොස් එම පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියන් බැහැදැක ආශිර්වාද ලබාගත් අවස්ථාවේ උන්වහන්සේ මේ බව පැවසූහ.
ජාතික ජනබලවේගය මගින් මෙවර ජනපතිවරණය වෙනුවෙන් ඉදිරිපත් කළ ප්රතිපත්ති ප්රකාශනයේ පිටපතක් මල්වතු මහනායක ස්වාමින්ද්රයන් වහන්සේට පිළිගැන් වූ ලාල් කාන්ත ව්යවස්ථාවේ 09 වැනි වගන්තිය ප්රකාරව බෞද්ධාගමට ලබා දී තිබෙන ප්රමුඛස්ථානය අහෝසි කරන්නට ජාතික ජනබලවේගය කටයුතු කරන බවට ඇතැම් ජනපති අපේක්ෂකයින් හා ඔවුන්ට සහය දක්වන සංවිධාන ගෙන යන ප්රචාරයන් ගේ කිසිදු සත්යතාවක් නැතැයි පැවසුවේය.
බුදු දහම සම්බන්ධයෙන් ව්යවස්ථාවේ සඳහන් වගන්ති වෙනස් කිරීම සම්බන්ධව සාකච්ඡාවක් හෝ පවත්වා නොමැති පසුබිමක පරාජය අභිමුව සිටින අපේක්ෂකයින් හා ඔවුන් ගේ හිතවාදී කණ්ඩායම් ජනතාව නොමග යැවීමට පෙර මැතිවරණවල දී මෙන්ම මෙවරත් නොයෙකුත් අසත්ය ප්රචාර ගෙන යන බවත් ජනතාව මෙවර ඒවාට නොරැවටෙන බවත් කී ලාල්කාන්ත මේ අයට බලය දීම තබා ඡන්දය දීමද නුසුදුසු යැයි අවධාරණය කළේය.
මෙම අවස්ථාවට ජාතික ජනබලවේගයේ විධායක සභික චන්ද්රසිරි විජේනායක, මහචාර්ය තිලක් සුබසිංහ ඇතුළු පිරිසක් ද සහභාගි වූහ.
එම නියෝජිත පිරිස අස්ගිරි පාර්ශවයේ මහානායක අතිපූජ්ය වරකාගොඩ ශ්රී ඤාණරතන මහනායක ස්වාමින්ද්රයන් වහන්සේද බැහැදැක ආශිර්වාද ලබා ගත්තේය.
