කීර්ති ප්‍රනාන්දු –
සිදුවෙමින් ඇති බුද්ධි ගලනයේ බරපතලකම අනුව ඉදිරියේ දී ගල් අඟුරු, ජලය හෝ ඉන්ධන තිබුණ ද විදුලි පද්ධතිය ක්‍රියාත්මක කරගැනීමට නොහැකි වනු ඇතැයි විදුලි ඉංජිනේරු සංගමයේ සභාපති නිහාල් වීරරත්න පවසයි.
ඔහු පෙන්වා දෙන්නේ වෘත්තිකයින් පෙළා දමන බදු ප්‍රතිපත්තිය ඇතුළු රජයේ අදූරදර්ශී තීරණ මත මේ වනවිට 700ක විදුලි ඉංජිනේරුවන් සංඛ්‍යාවෙන් සියයකට ආසන්න ප්‍රමාණයක් රට හැර ගොස් ඇති බවත්, අවුරුදු 45ට අඩු සියලුම විදුලි ඉංජිනේරුවන් පාහේ වෙනත් රටවල පුරවැසි භාවය අයදුම් කර ඇති බවත්ය.
එමෙන්ම සරසවිවලින් පිටවන කිසිම නවක ඉංජිනේරුවරයෙක් බඳවා ගැනීමේ අවස්ථාව ද මේ වනවි අහිමි කර ඇති බව කී සභාපතිවරයා සරසවිවලින් පිටවන නවක ඉංජිනේරුවරුන්ටත් විදේශවල ආකර්ශනීය රැකියා අවස්ථා ඇති බවත්, විදුලි හා යාන්ත්‍රික අංශවල විදුලි ඉංජිනේරුවරුන් සඳහා ඔස්ට්‍රේලියාව, හොඳ වැටුප් සහ වෘත්තීය තත්ත්වයන් සමග රැකියා ලබා ගත හැකි බවත්ය.
නිහාල් වීරරත්න මෙසේ ද පැවසුවේය.
“ ඉංජිනේරුවො විතරක් නෙමෙයි, මේ වනවිට තාක්ෂණික අංශයේ වැඩ කරන සේවකයොත් ඉල්ලා අස්වීම් දීලා තියනවා. ඉංජිනේරුවො සියයකට වැඩි ගණනක් මේ වනවිට රට හැර ගිහින් තියනවා.”
“යන්න හේතු කීපයක් තියනවා. රට ආර්ථික වශයෙන් කඩා වැටීම නිසා ඩොලර් හොයන්න කියලා රජය වෘත්තිකයින්ට අවුරුදු පහක නිවාඩුවක් දුන්නා. ඒ නිසා ටිකක් ගියා. ඊට පස්සේ මේ අත්තනෝමතික බදු ප්‍රතිපත්තිය නිසා රට හැර යන ගමන සීඝ්‍ර වුනා. මොකද තමන්ගෙ වැටුප ණය තුරුස්වලට යොදවලා ජීවිතය සැලසුම්කළ ගොඩක් අයට මේ බදු ක්‍රමයත් එක්ක ජීවිතය ගෙනියන්න වැටුපක් නැති වුනා. “
“එහෙම තත්ත්වයට රට පත් වුනා. රටේ අනාතගතය වෙනුවෙන් අපට අවශ්‍ය වෙන්නේ තරුණ ඉංජිනේරුවො.. ඔවුන් අවශ්‍ය වෙනවා බලාගාර මෙහෙයුම් කටයුතුවලට, නඩත්තුවලට, සැලසුම් කටයුතුවලට. අය ක්‍රමය සකස් කරන තැන්වලට, තොරතුරු තාක්ෂණයට… එත් මේ රට හැර යන සියලු දෙනාම තරුණ ඉංජිනේරුවො.”
“විදේශවල හොඳ රැකියාවක් කරන්න පුලුවන් අය තමයි මෙහි රැඳිලා හිටියෙ. 1998ට කලින් ලංකාවේ මේ තත්ත්වය තිබුණා. 1998 දි වැටුප් විෂමතාවයන් ඉවත් කරලා සැලකිය යුතු වැටුපකට ඉංජිනේරුවරු ඇතුළු වෘත්තිකයො සේවයේ පිහිටෙව්වා. මේක රාජ්‍ය සේවාවක් නොවෙයි. මණ්ඩලයක්, පැය 24 පුරාම අනිවාර්යයෙන් රටට අවශ්‍ය සේවාවක් ලබා දෙන තැනක්.”
“මේ නිසා 1998 දී හොඳ වැටුප් ව්‍යුහයක් ක්‍රියාත්මක වුනා. එතැනදි බුද්ධි ගලනය නැවතුනා. වෛද්‍යවරුන්ගේ බුද්ධි ගලනය නැවතුනා පුද්ගලික ප්‍රතිකාර සේවාවන්ට ඉඩ දුන්නට පස්සේ. “
“ඉන් පස්සේ පළමු වරට නැවතත් බැරෑරුම් විදිහට මේ බුද්ධිගලනය සිදුවෙනවා. මේ වනවිට රජයේ ප්‍රතිපත්තිවලට අනුව විශ්වවිද්‍යාවලින් බඳවා ගැනිම් නවත්වලා තියනවා. ඒ නිසා ක්ෂේත්‍රයට එන්න ඉන්න ඉන්න තරුණ පිරිස මුලින්ම යනවා. “
පුලුවන් අය ගිහින් යන්න බැරිව ඉතිරිවෙන අයට හිතේ සතුටින් වැඩ කරන්න බැරි වෙනවා. 2021 ලෙඩ නිවාඩු දීමනාව දීලා නෑ. අනෙක් වරප්‍රසාද කප්පාදු කරලා. ඇගයීමක් හිතේ සතුටක් නෑ. තෘප්තිය නෑ. 2022 ප්‍රසාද දීමනා නෑ. ඒ අතරෙ වැඩ ධාරිතාව වැඩි වෙලා තියනවා. මිනිස්සු රැකියා තෘප්තියක් නැතිව වහල්ලු වගේ වැඩ කරන්න කැමති නෑ, මේ කඩාවැටීම ඇතුලෙ ඉන්ධන ගල් අඟුරු ජලය තිබුණත් විදුලි බලාගාර සහ සමස්ථ විදුලි බල පද්ධතිය බිඳ වැටීම වළක්වා ගන්න බැරිවේවි.
මේ සම්බන්ධව අවස්ථා ගණනාවක දි සභාපතිවරයා දැනුම්වත් කළා. සාමාන්‍යාධිකාරීවරයා දැනුම්වත් කරලා තියනවා. ඒ අය මේ සම්බන්ධව මණ්ඩලයේ ඉහළ බලධාරීන් අමාත්‍යාංශය දැනුම්වත් කරලා තියනවා. බඳවාගැනීම් කරන්න කියලා ඔවුන් අවස්ථා ගණනක දි කියලා තියනවා.
ඒත් ඇමතිවරයා කියන්නෙ 26000ක අනුමත විදුලි බල සේවකයින් අඩු කරලා 4500න් දුවන්න පුලුවන් කියලා.
ඔබ හිතනව ද මේ තත්ත්වයට මේ රට හැර යන අයට දොස් කියන්න පුලුවන් කියලා. මමත් කැනඩාවට ගිහින් හිටිය කෙනෙක්. යුද්ධයක් ඉවරවෙනකොට අපි හිතුවා රට හරි යයි කියලා. අපි මේ රටට ආවා. නමුත් අන්තිමට වුනේ මේකයි. පාලකයො තමන්ගේ තීරණ රට ගැන හිතලා වෙනස්වනතුරු මේ තත්ත්වය වෙනස් කරන්න බෑ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
විදුලි ඉංජිනේරු සංගමයේ සභාපති නිහාල් වීරරත්න පැවසුවේය.