මේ ප්‍රශ්නය මගෙන් කීප දෙනෙක්ම ඇහුවා. මමත් ඒ ප්‍රශ්නයම තවත් කීප දෙනෙක්ගෙන් ඇහුවා. තව තව අය වෙන වෙනත් අයගෙන් අහනවත් මට ඇහුණා.
මදි නොකියන්න මාස ගණනාවක් තිස්සේ නිවාඩු හින්දා කවුරුත් මේ නිවාඩුව ගණන් ගන්නේ හරිම අලස කමින්. ‘මොන රෙද්දකට නිවාඩු දුන්නද මන්දා’ කියලා මිනිස්සු හිතනවා. ඒත් වැඩි දෙනෙක් හේතුව හොයන්න තරම්වත් කරදර වෙන්නෙ නෑ. මම මගේ සියල්ල දත් මිතුරන් කීප දෙනෙකුට කතා කළා.
“ඕක අනිවාර්යයෙන් ඩඩ්ලිගේ වැඩක් වෙන්නැති. කැළණියට ආපු බුදුන් සමරන්න දවස් දෙකක් නිවාඩු දෙනවනම්, එයාලගෙ උතුරු මැද පළාතට ආපු මිහිදු සිහිකරන්න දින දෙකක් නොදීම අසාධාරණයි කියලා හාල් මෝල් හිමියන්ගේ සංගමේ කියන්නැති” මිතුරෙක් කීවා.
“මෝල් ද මිනිහෝ ඔහොමත් නිවාඩු දෙනවද?”
“ඒකත් ඇත්ත. ඩඩ්ලි ඉල්ලුව නම් මේ වෙලාවේ පොසොන් සතියක් ගන්න තිබ්බා. මෝල්වල සල්ලි නැතුව කොහොමද චන්ද මෝල කරකවන්නෙ?”
“ඕක වෙන හේතුවක් වෙන්න බැරිද?” එකෙක් විමසුවා.
“ඔව් පෝය දවසට ඉස්සෙරින් දා මිනිස්සු වන්දනාවේ ගිහින් ගල සෝදලා කැලේ පිරිසිදු කරයි කියලා වෙන්නැති. අනික මිනිස්සු පිරුනොත් මිහිදුට තිස්සවයි, තිස්සට මුවාවයි පේන්නෙ නැතුව යනවනේ. ඒ හින්දා කර්ෆියු පාස් දීලා තියෙන්නේ මිහිදුටයි තිස්සටයි මුවාටයි විතරයි”
මුවා පසු පස යෑමෙන් අපේ අරමුණ ද ඉටු නොවන වග මම මතක් කළා.
“සමහර විට සෑම පෝයකට පෙර දිනම නිවාඩු දෙන්න හිතන් ඉන්නවද කවුද දන්නේ? හැටේ දශකෙ අගත් මෙහෙම විගඩමක් තිබ්බ. සැදැහැවතුන් සනසන්න හතර පෝයටයි, පෝයට පෙර දිනයි නිවාඩු දෙන. අන්තිමට යූ.එන්. පී. ආණ්ඩුවට ඒ පිනේ ආනිශංස ඊළග චන්දෙදිම ලැබුණා”
වල්පල් මිසක් අද නිවාඩුවට හේතුව කිසිවෙකුට කියා ගත නොහැකියි.
“ඕක ගැන අපි කතා කරලා වැඩක් නෑ. මිහිදු හාමුදුරුවො හෙට වැඩිය නම් අහන්නෙත් ඔය ප්‍රශ්නේම තමයි” මිතුරෙක් කියනවා.
*
“තිස්ස, මේ රටේ තොපේ ආණ්ඩුව හැර වෙනත් ආණ්ඩුවකුත් තිබේද?”
දුවන මුවන් දැක නෙලූ පලා බිම දැමූ තිස්ස මදක් නතර විය.
“මිනිස්සු නම් හිතන්නේ මම තමයි රජු කියලා. කාටවත් කියන්න එපා, මටත් පොඩී ඩවුට් එකක් තියෙනවා” තිස්ස වටපිට බලා කීය.
“තිස්ස, අද ඇදිරි නීතිය හැර වෙනත් ඇදිරි නීති දිනත් තිබිණිද?”
ස්වයංක්‍රීය ගිණි අවිය පසෙක තැබූ තිස්ස හති අරින්නට විය.
“එසේය. මින් පෙර මාස දෙකක් එක දිගටම ඇදිරි නීතිය විය”
ඔහු ප්‍රශ්නයෙන් මුවාවී පළා යෑමට මගක් සෙවීය.
“තිස්ස, මේ ඇදිරි නීතියත් ඒ ඇදිරි නීතියත් හැර, වෙනත් ඇදිරි නීති දිනයන්ද තිබිණිද?”
ගැලවීමට මගක් නැති බව තිස්සට පසක් විය.
“එසේ…..ය. ඊයේත්…. කර්ෆිව් ය”
ඔහු ඇද පැද පිළිතුරු බැන්දේ ය.
“තිස්ස, මම එන්නේ අද කියා දැනගෙන ඊයේ කර්ෆිව් දැම්ම එකා කවුද?”
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
“ඌව තමයි මේ මාත් හොයන්නේ!”