අසේල කුරුළුවංශ –
-
ශාසන විරෝධී මෙන්ම නීති විරෝධී කටයුත්තට සම්බන්ධ සියලු භික්ෂු ප්රතිරූපකයින් සම්බන්ධයෙන් කරුණු සොයා බලා ශාසනයෙන් නෙරපීමට කටයුතු කරන බව මහානායක හිමිවරු දන්වති…
-
තරුණ භික්ෂූන්වහන්සේ මත්ද්රව්ය ජාලයට සම්බන්ධ ඉත්තන් කරගත් ජාවාරම් කරුවන් සම්බන්ධව දැඩිව සොයා බලන්න… මහානායක හිමිවරු රජයට අවධාරණය කරති…
බුද්ධ චීවරය අවභාවිත කරමින් මත්ද්රව්ය ප්රවාහනයේ යෙදමින් භික්ෂු ප්රතිරූපකයින් පිරිසක් විසින් සිදුකරන ලද ශාසන විරෝධී හා නීති විරෝධී ක්රියාව තරයේ හෙළා දකිමින් ත්රෛනිකායික මහා සංඝයා වහන්සේ නිවේදනයක් නිකුත් කර සිටිති.
උතුම් බුද්ධ චීවරය අවභාවිත කරමින් භික්ෂු ශාසනයත් ශ්රී ලාංකේය ඓතිහාසික භික්ෂු භුමිකාවත් සමස්ත ලෝකය ඉදිරියේ අවමානයට පත් කරමින් භික්ෂු ප්රතිරූපකයින් පිරිසක් විසින් මත්ද්රව්ය ප්රවාහනය කරමින් සිදු කරන ලද ශාසන විරෝධී. සමාජ විරෝධී මෙන්ම නීති විරෝධී ක්රියාව ත්රෛනිකායික මහානායක ස්වාමීන්ද්රයන් වහන්සේලා ලෙස තමන් වහන්සේලා තරයේ හෙළා දකින බව එම නිවේදනය නිකුත් කරමින් උන්වහන්සේලා පවසති.
ලාංකේය සමාජය තුළ භික්ෂුන් වහන්සේ නමක් වෙත උරුමව ඇති සාම්ප්රදායික ගෞරවය හා පිළිගැනීමත් උතුම් වූ බුද්ධ චීවරය පිළිබඳ බෞද්ධයන්ගේ ශ්රද්ධාධ්යාශයන් ද අවභාවිත කරමින් සිදුකරන ලද මෙම නිතී විරෝධි ක්රියාවට සම්බන්ධ සියලු භික්ෂු ප්රතිරූපකයින්ට නිසි දඬුවම් ලබා දීමට කටයුතු කළ යුතු බව උන්වහන්සේලා අවධාරණයෙන් යුතුව රජයට දන්වති.
බුද්ධ චීවරයත් ශාසනික අනන්යතාවක් අවභාවිත කරමින් මෙවැනි නීති විරෝධී කටයුතු කරන භික්ෂු ප්රතිරූපකයින් පිළිබඳ ඉදිරියේ දී කරුණු විභාග කොට සසුනෙන් නෙරපීමට නිසි යාන්ත්රණයක් සකස් කිරීමේ අවශ්යතා යළිත් ප්රකට වන මෙම අවස්ථාවේ දී ඒ සඳහා අවශ්ය කරන නෛතික ප්රතිපාදන සම්පාදනය කරලීමට රාජ්ය යාන්ත්රණය කඩිනමින් මැදිහක් වීම අත්යාවශ්ය බව ද නැවත නැවතත් උන්වහන්සේලා පෙන්වා දෙති.
ඒ අනුව අදාළ නිකාය පාර්ශ්වයන් මගින් ඉදිරියේ දී මෙම ශාසන විරෝධී මෙන්ම නීති විරෝධී කටයුත්තට සම්බන්ධ සියලු භික්ෂු ප්රතිරූපකයින් සම්බන්ධයෙන් කරුණු සොයා බලා ශාසනයෙන් නෙරපීමට කටයුතු කරන බව ද මහානායක හිමිවරු එම නිවේදනයෙන් දන්වා සිටිති.
තව ද උපක්රම ශීලීව මෙන්ම සංවිධානාත්මකව තරුණ භික්ෂුන් වහන්සේලා මෙබඳු නීති විරෝධී කටයුතු සඳහා පොළඹවාගන්නා මත්ද්රව්ය ජාල හා මත්ද්රව්ය බෙදාහරින්නන් සම්බන්ධයෙන් කඩි නම් විමර්ශන සිදු කොට නෛතික ක්රියා මාර්ග ගැනීමට ද ආරක්ෂක අංශ යුහුසුළුව කටයුතු කළ යුතු බව මහානායකවරු බරපතල ලෙස අවධාරණය කරති.
එමෙන්ම සෑම තරුණ භික්ෂුවක් පිළිබඳව ම නිරන්තර අවධානයෙන් කටයුතු කරමින් ශාසන විරෝධී යම් කටයුත්තක නිරත වන බවට නිරීක්ෂණය වන්නේ නම් ඒ සම්බන්ධයෙන් කරුණු සොයා බලා එවැනි තරුණ භික්ෂූන් ආයති සංවරයෙහි පිහිටුවීමට සෑම ආචාර්යන් වහන්සේ නමක් ම නිරන්තරයෙන් ව්යාවෘත විය යුතු බවට ද උන්වහන්සේලා දැනුම් දෙති.
පහත දැක්වෙන්නේ එම නිවේදනයයි.
