පසුගිය සති දෙකක කාලය තුළ ඉන්දියාවේ ඉන්ධන මිල සිවුවන වතාවටත් ඉහළ දමා තිබේ.
ගෝලීය වෙළෙඳපොළේ බොරතෙල් මිල අඛණ්ඩව ඉහළ ගියද, ඉන්දියාව තුළ ඉන්ධන මිල සංශෝධනය නොකර ස්ථාවරව පවත්වාගෙන යාම හේතුවෙන් එරට රජය සතු තෙල් සමාගම්වලට සිදු වූ පාඩුව පියවා ගැනීම සඳහා මෙම මිල ඉහළ දැමීම සිදු කර ඇතැයි ඉන්දියා ටු ඩේ වාර්තා කරයි.
ඒ අනුව සමස්ථයක් ලෙස ලීටරයක මිල රුපියල් 7.5කින් පමණ ඉහළ ගොස් ඇත. මෙම මිල ඉහළ යාමට ප්රධානතම හේතුව වී ඇත්තේ ඇමරිකා එක්සත් ජනපදය සහ ඉරානය අතර මැදපෙරදිග කලාපයේ පවතින ගැටුම්කාරී තත්ත්වය හේතුවෙන් හෝමුස් සමුද්ර සන්ධිය (Strait of Hormuz) වසා දැමීමය.
පවතින මැදපෙරදිග අර්බුදයේ බලපෑම පිළිබඳව අදහස් දක්වමින්, ඉන්දියාවේ ONGC (Oil and Natural Gas Corporation) ආයතනයේ ගවේෂණ අංශයේ අධ්යක්ෂිකා සුෂ්මා රාවත් ප්රකාශ කර සිටියේ, පවතින අවිනිශ්චිත තත්ත්වය හේතුවෙන් ගෝලීය බොරතෙල් මිල දැඩි ලෙස උච්චාවචනය වෙමින් පවතින බවය.
ජාත්යන්තර බොරතෙල් වෙළෙඳපොළේ පවතින මෙම අස්ථාවරත්වය හමුවේ වුවද, ගෝලීය බලශක්ති මිල ඉහළ යාමේ සම්පූර්ණ බලපෑමෙන් ඉන්දීය පාරිභෝගිකයන් ආරක්ෂා කිරීමට ඉන්ධන අලෙවි කරන සමාගම්වලට (OMCs) දිනකට රුපියල් කෝටි 1,000ක පමණ පාඩුවක් දරන්නට සිදුවූ බව ඇය හෙළිදරවු කළාය.
“ අපිට කොපමණ කාලයක් එය පවත්වාගෙන යා හැකිද?” ඇය විමසා සිටියාය.
මෙම නවතම ඉන්ධන මිල ඉහළ යාම හේතුවෙන් දිනපතා ගමන් බිමන් යන මහජනතාව, ප්රවාහන ක්රියාකරුවන් සහ විවිධ ක්ෂේත්රවල ව්යාපාරිකයන් මත දැඩි මූල්ය බරක් පැටවෙනු ඇතැයි අපේක්ෂා කෙරේ.
2022 අප්රේල් මාසයේ සිට ඉන්ධන මිල බොහෝ දුරට ස්ථාවරව පැවති අතර, 2024 ලෝක් සභා මැතිවරණයට පෙර මාර්තු මාසයේදී පමණක් ලීටරයක මිල රුපියල් 2කින් අඩු කෙරුණි. එලෙස දිගු කලක් ස්ථාවරව පැවතීමෙන් පසු, මැයි 16 වනදා පෙට්රල් සහ ඩීසල් මිල රුපියල් 3කින් ඉහළ දැමීම බොහෝ දෙනෙකුට පුදුමයක් ගෙන දුන් කරුණක් විය.
ආර්ථික විශ්ලේෂකයින් අනතුරු අඟවන්නේ පෙට්රල් සහ ඩීසල් මිල මෙලෙස අඛණ්ඩව ඉහළ යාමෙන් ප්රවාහන හා සැපයුම් දාම (Logistics) වියදම් ඉහළ යා හැකි බවය. එහි ප්රතිඵලයක් ලෙස අවසානයේදී අත්යවශ්ය භාණ්ඩ හා ආහාර ද්රව්යවල මිල ගණන් ද ඉහළ යා හැකි බව ඔවුහු පෙන්වා දෙති.
කෙසේ වෙතත්, රජයේ නිලධාරීන් මීට පෙර ප්රකාශ කර තිබුණේ පවතින භූ-දේශපාලනික ආතතීන් සහ ගෝලීය බලශක්ති වෙළෙඳපොළේ අස්ථාවරත්වය හමුවේ, ඉහළ යන ආනයන වියදම් කළමනාකරණය කර ගැනීමට සහ ඉන්ධන සැපයුමේ ස්ථාවරත්වය පවත්වා ගැනීමට මෙම මිල සංශෝධන අත්යවශ්ය වූ බවයි.
