වියට්නාමයේ පන්නාකර ස්වාමීන් වහන්සේ ප්රමුඛ මහා සංඝරත්නය මෙහෙයවන “Island of Peace” සාම පා ගමන අද (27) සිය හයවැනි දිනයට ආරම්භ වූයේය. සාමයේ පණිවුඩය රැගෙන යන මෙම පා ගමන අද උදෑසන යක්කල අභයසේකරාරාමයෙන් ආරම්භ වූ අතර, මේ වන විට කැලණිය රජමහා විහාරය බලා ගමන් කරමින් පවතී.
ඊයේ දිනයේදී තොලංගමුව මධ්ය මහා විද්යාලයේ සිට කිලෝමීටර් 33ක දුරක් ගෙවා පස්යාල, නිට්ටඹුව, තිහාරිය සහ කලගෙඩිහේන පසුකරමින් පැමිණි මහා සංඝරත්නය යක්කල අභයසේකරාරාමයට වැඩම කළහ. එහිදී මාර්ගය දෙපස රැස්ව සිටි දහස් සංඛ්යාත ජනතාව මහා සංඝරත්නයට තම ගෞරවාදරය පුද කළ අයුරු දැකගත හැකි විය.
සමාප්ති උළෙල සහ විශේෂ රථවාහන සැලැස්ම
මෙම ලෝක සාම පා ගමන හෙට (28) උත්කර්ෂවත් අන්දමින් නිමාවට පත්වීමට නියමිතය. හෙට දින කැලණියෙන් ආරම්භ වන පා ගමන පස්වරු 4:00 වන විට කොළඹ නිදහස් චතුරස්රය වෙත ළඟා වීමට අපේක්ෂිතය. එහිදී පැවැත්වෙන විශේෂ රාජ්ය තාන්ත්රික උත්සවයකදී ජනාධිපති අනුර කුමාර දිසානායක විසින් ශ්රී මහා බෝධීන් වහන්සේගේ පූජනීය බෝධි අංකුරයක්, මෙම පා ගමනට එක්වූ ඇමරිකා එක්සත් ජනපදයේ සිට වැඩම කළ මහා සංඝරත්නය වෙත නිල වශයෙන් පූජා කරනු ඇත.
අනතුරුව නිදහස් චතුරස්රයේ සිට අලංකාර පෙරහැරකින් හුනුපිටිය ගංගාරාම විහාරස්ථානය වෙත වැඩම කිරීමෙන් පසු පා ගමනේ නිල කටයුතු නිමාවට පත්වේ.
මෙම වැඩසටහන නිමිත්තෙන් කොළඹ නගරය තුළ විශේෂ රථවාහන සැලැස්මක් ක්රියාත්මක කරන බව රථවාහන පාලන හා මාර්ග ආරක්ෂාව පිළිබඳ නියෝජ්ය පොලිස්පති ඩබ්ලිව්.පී.ජේ. සේනාධීර තහවුරු කළේය.
