රාජ්ය සේවය විධිමත් ලෙස පවත්වාගෙන යාම සඳහා පත් කරන ලද අමාත්ය මණ්ඩල අනු කමිටුවේ දෙවැනි රැස්වීම අග්රාමාත්ය ආචාර්ය හරිනි අමරසූරියගේ ප්රධානත්වයෙන් ජනාධිපති කාර්යාලයේදී ඊයේ (24) පස්වරුවේ සිදුවිය.
මහජනතාවට රජයේ සේවා බාධාවකින් තොරව ලබා දීම සහ රාජ්ය සේවකයන් මුහුණ දෙන ගැටලු මඟහරවා ගැනීමට ගත යුතු කඩිනම් ක්රියාමාර්ග පිළිබඳව මෙහිදී දීර්ඝ ලෙස සාකච්ඡා කෙරිණි.
රාජ්ය පරිපාලන, පළාත් සභා සහ පළාත් පාලන, සෞඛ්ය, අධ්යාපන, අධිකරණ යන අමාත්යාංශවල සේවාවන් අඛණ්ඩව පවත්වාගෙන යාම සම්බන්ධව මෙහිදී අවධානය යොමු වූ අතර, ඒ අනුව නියමිත පරිදි විභාග පැවැත්වීම සහ රෝහල් සඳහා අවශ්ය ඖෂධ බාධාවකින් තොරව සැපයීම සහතික කිරීමට තීරණය විය.
මගී ප්රවාහන සේවා සහ දුම්රිය ප්රවාහන පද්ධතියේ අභියෝග සහ ඉදිරි ක්රියාමාර්ග පිළිබඳවද මෙහිදී පුළුල් ලෙස සාකච්ඡා කෙරුණු අතර අත්යවශ්ය ද්රව්ය ප්රවාහනය සම්බන්ධයෙන් ඉදිරියේදී ගත යුතු ක්රියාමාර්ග පිළිබඳවද අවධානය යොමු විය. මීට අමතරව සේවාවන් වඩාත් වේගවත් කිරීම සඳහා ඩිජිටල් සේවා පද්ධති හඳුන්වා දීමටත්, ඩිජිටල් ආර්ථික අමාත්යාංශය යටතේ එම කටයුතු අධීක්ෂණය කිරීමටත් මෙහිදී තීරණය විය.
සියලුම අමාත්යාංශවල සහ දෙපාර්තමේන්තුවල වත්මන් බලශක්ති කළමනාකරණ කටයුතු පිළිබඳ සොයා බලා අවශ්ය ප්රතිපත්තිමය වෙනස්කම් සිදු කිරීමට පියවර ගන්නා ලෙසද මෙහිදී උපදෙස් දෙන ලදී.
මෙම අවස්ථාවට රාජ්ය පරිපාලන, පළාත් සභා සහ පළාත් පාලන අමාත්ය ඒ. එච්. එම්. එම්. එච්. අබයරත්න, අග්රාමාත්ය ලේකම් ප්රදීප් සපුතන්ත්රී, ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති, රාජ්ය පරිපාලන, පළාත් සභා සහ පළාත් පාලන අමාත්යාංශයේ ලේකම් එස්. ආලෝක බණ්ඩාර, සෞඛ්ය හා ජනමාධ්ය අමාත්යාංශයේ ලේකම් වෛද්ය අනිල් ජාසිංහ, බලශක්ති අමාත්යාංශයේ ලේකම් මහාචාර්ය ටී. එම්. උදයංග හේමපාල, අධිකරණ සහ ජාතික ඒකාබද්ධතා අමාත්යාංශයේ ලේකම් අයේෂා ජිනසේන, ඩිජිටල් ආර්ථික අමාත්යාංශයේ ලේකම් ටී. ආර්. ඩබ්. එස්. ධනපාල, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, ඛනිජ තෙල් නීතිගත සංස්ථාවේ සභාපති ඩී. ජේ. ඒ. එස්. එස්. රාජකරුණා ඇතුළු කමිටු සාමාජිකයෝ එක්ව සිටියහ.
