අසේල කුරුළුවංශ –
ප්රචන්ඩත්වයට ගොදුරු වන දරුවන්ට චූදිතයින්ගේ නෙත නොගැටී අධිකරණ කටයුතු වලට සම්බන්ධ වීමට අවස්ථාව උදා කරමින් මෙරට අධිකරණ ඉතිහාසයේ ප්රථම වරට ශ්රව්ය දෘශ්ය පටිගත කිරීමේ පහසුකම් වලින් සමන්විත ළමා හිතකාමි අධිකරණ කාමරයක් මහනුවර මහාධිකරණ පරිශ්රයේ දී ඊයේ (17) ළමා හා කාන්තා කටයුතු අමාත්ය සරෝජා පෝල්රාජ් අතින් විවෘත වූයේය.
විවෘත අධිකරයෙන් බැහැරව විශේෂ කාමරයක් තුළ දරුවන් නඩු කටයුතු වලට සම්බන්ධ කිරීම මගින් මහාධිකරණ ක්රියාවලිය ළමා හිතකාමි කිරීම රජයේ අරමුණ වී තිබේ. අදාළ කාමරයේ සිට ඩිජිටල් තිරයක් ඔස්සේ අධිකරණ කටයුතු වලට සම්බන්ධ වෙමින් සාක්කි ලබාදීම එහි සිටම සිදු කිරීමට මෙමගින් දරුවාට අවස්ථාව උදාකර ඇත.
ප්රචන්ඩත්වයට පත්වන දරුවන් වෙනුවෙන් විමර්ශන ක්රියාත්මක කරන ආයතන ගණනාවක් තිබෙන බවත් එම එක් එක් ආයතන හුදකලාව ක්රියාත්මක වීම මගින් දරුවන්ට සිදුවන අගතිය වලක්වා ගැනීම සඳහා ඒවා ඒකාබද්ධ යාන්ත්රණයක් තුළට ගෙන ඒමට පියවර ගෙන තිබෙන බවත් එම අධිකරණ කාමරය විවෘත කරමින් අමාත්යවරිය ප්රකාශ කළාය.
දරුවන්ට එරෙහි ප්රචණ්ඩත්වය අවසන් කිරීම පිළිබඳ මොංගෝලියාවේ බොගෝටාවල 2024 දී පැවැති සමුළුවේ දී ශ්රී ලංකා රජය පොරොන්දු හතරක් ලබාදුන් බවත් නව ළමා හිතකාමි කාමරය විවෘත කිරීමට අදාළ වැඩපිළවෙළ ඔස්සේ ඉන් පොරොන්දු දෙකක් ඉටු කිරීමට ශ්රී ලංකාවට අවස්ථාව ලැබී තිබෙන බවත් අමාත්ය සරෝජා පෝල්රාජ් කීවාය.
ප්රථම වරට මහනුවර මහාධිකරණයේ ස්ථාපිත කළ මෙම ළමා හිතකාමි අධිකරණ ක්රියාවලියේ අඩුපාඩු හඳුනා ගනිමින් දිවයිනේ සෙසු අධිකරණවල ද මේ ආකාර කාමර ඇති කිරීමට අපේක්ෂා කරන බව ඇමතිවරිය ප්රකාශ කළාය.
අධිකරණ හා ජාතික ඒකාබද්ධතා අමාත්යාංශය හා කාන්තා හා ළමා කටයුතු අමාත්යාංශය එක්ව යුනිසෙෆ් සහ යුරෝපා සංගමයේ සහයෝගය ඇතිව ක්රියාත්මක කරන ප්රචන්ඩත්වයට මුහුණ දුන් දරුවන්ට සහය දැක්වීමේ වැඩපිළිවෙළේ එක් පියවරක් ලෙස මෙම විශේෂ කාමරය විවෘත කිරීම සිදුවිය.
කාන්තා හා ළමා කටයුතු අමාත්ය සරෝජා පෝල්රාජ්, මධ්යම පළාත් ආණ්ඩුකාර මහාචාර්ය සරත් අබේකෝන්, පාර්ලිමේන්තු මන්ත්රී තුෂාරි ජයසිංහ, නීතිපති පාරින්ද රණසිංහ, මධ්යම පළාත් ප්රධාන ලේකම් අජිත් ප්රේමසිංහ, ශ්රී ලංකාවේ යුනිසෙෆ් නියෝජිත එමා බ්රිගම් සහ යුනිසෙෆ් හා යුරෝපා සංගමයේ නියෝජිතයින් මෙම අවස්ථාවට සහභාගි වූහ.
