මේ වනවිට රටේ ආන්දෝලනයට ලක් වී සිටින සැකකටයුතු අපරාධකරුවෙක් වූ සම්පත් මනම්පේරි විසින් වළ දැමූ ආයුධ සහ උණ්ඩ තොගයක් මිද්දෙණියේ නිවසක තිබී සොයාගෙන ඇති බව පොලිසිය පවසයි.
මත්ද්රව්ය නාශක කාර්යාංශයේ අත් අඩංගුවේ සිටිය දී ඊයේ ඔහුව බස්නාහිර උතුර අපරාධ කොට්ඨාසයට රැගෙන විත් සිදුකළ ප්රශ්න කිරීම්වලදී ලබා දුන් තොරතුරු මත අදාල ඉඩමේ කළ සෝදිසි මෙහෙයුමක දී මෙම ආයුධ සොයා ගෙන තිබේ.
රන් පැහැති ටී -56 මැගසින් දෙකක්, ටී 56 උණ්ඩ 115ක්, අත් බෝම්බයක් සහ මිලි මීටර 9 වර්ගයේ පිස්තෝලයක් මේ සෝදිසි මෙහෙයුමේ දී සොයා ගෙන ඇත.
සැකකරු විසින් මෙම ආයුධ පසුගිය 03 වැනිදා සිය අනියම් බිරියගේ නිවස පහිටි ඉඩමේ වළ දමා ගොස් ඇතැයි විමර්ශනවලදී ආනාවරණය වී තිබේ.
තමන්ට අයත් මිද්දෙනිය ඉඩමක අයිස් මත්ද්රව්ය මිශ්ර ආගන්තුක ද්රව්ය කන්ටේනර් දෙකක් වළ දමා තිබිය දී සොයා ගැනීමෙන් අනතුරුව පොලිසිය මග හැර සැඟවී සිටි මෙම පුද්ගලයා පසුගිය 17 වැනිදා වලස්මුල්ල මහේස්ත්රාත් අධිකරණයට නීතිඥයෙක් මාර්ගයෙන් භාර වූයේය.
වලස් කටා, බැකෝ සමන් සහ කෙහෙල්බද්දර පද්මේ ඇතුළු පාතාලයින් විසින් ලබා දී තිබුණු තොරතුරු මත අත් අඩංගුවට ගනු ලැබුව ද සම්පත් මනම්පේරි රැඳවුම් නියෝග සහිතව රඳවා ගන්නේ බස්නාහිර උතුර අපරාධ කොට්ඨාසයේ නොව, මත්ද්රව්ය නාශක කාර්යාංශයේ ය.
මිද්දෙණියේ කජ්ජා ඝාතනය සම්බන්ධව සැකකටයුතු පුද්ගලයෙක් ලෙස සම්පත් මනම්පේරි ද සිටී.
