තමන් පාර්ලිමේන්තුවේ දී හෙළි කළ ගල් අඟුරු වංචාව සම්බන්ධව විවෘත විවාදයකට පැමිණෙන ලෙස පාර්ලමේන්තු මන්ත්රී ඩී.වී චානක බලශක්ති අමාත්ය කුමාර ජයකොඩිට අභියෝග කරයි.
මෙම දූෂිත ගල් අඟුරු වංචාව සම්බන්ධව ඕනෑම නාලිකාවක කෙරෙන විවාදයකට තමන් ඇමතිවරයාට අභියෝග කරන බවත් ඇමතිවරයාගේ ගල් අඟුරු ගනුදෙනුව සම්පූර්ණයෙන්ම දූෂිත බව ඒ ඕනෑම තැනක දී තමන් ඔප්පු කර පෙන්වන බවත් ඩී.වි චානක පවසයි.
දූෂිත ටෙන්ඩරයක් මගින් බාල ගල්අඟුරු මෙරටට ආනයනය කර පාඩු සිදුකර ඇති බව ශ්රී ලංකා පොදුජන පෙරමුණේ පාර්ලිමේන්තු මන්ත්රී ඩී.වී චානක පෙරේදා (07) පාර්ලිමේන්තුවේදී පැවසීය.
වත්මන් රජය සිය පාලන කාලයේ මුල් සතියේ සිටම දූෂණ සහ වංචාවල නිරත වන බවට චෝදනා කරමින්, මන්ත්රී ඩී.වී. චානක මෙම ගල්අඟුරු වංචාවේ තොරතුරු අනාවරණය කළේය.
ඔහු කීවේ සාමාන්යයෙන් අප්රේල් මාසයේ කැඳවිය යුතු ගල්අඟුරු ටෙන්ඩරය නිශ්චිත ආයතනයකට ලබා දිම සඳහා සැප්තැම්බර් මාසය දක්වා කල් දැමීමට රජය කටයුතු කර ඇති බවය.
ලංකාවට ගෙනා පළමු ගල්අඟුරු නැව් දෙකේ Calorific value 5600-5800 අතර පවතින බව ලක්විජය බලාගාරයේ පරීක්ෂණවලින් තහවුරු වී ඇති බවත්, ගල්අඟුරු ටෙන්ඩර් මාර්ගෝපදේශ අනුව මෙය අවම වශයෙන් එම අගය 5900 විය යුතු බවත් මන්ත්රීවරයා පාර්ලිමේන්තුවට පෙන්වා දුන්නේය.
මේ සම්බන්ධව විදුලි බල හා බලශක්ති ඇමති කුමාර ජයකොඩි පැවසුවේ තමන් ලක් විජය බාලාගාරයේ පර්යේෂණ වාර්තාව පිළිනොගන්නා බවය.
