ලංකා විදුලිබල මණ්ඩලයේ වගකීම් සහ කාර්යභාරයන් පවරාදීම සඳහා නව අනුප්රාප්තික සමාගම් හයක් පිහිටුවීමේ තීරණාත්මක පියවරක් තැබීම නිකුත් කළ යුතුව තිබු අතිවිශේෂ ගැසට් නිවේදනය විදුලි බල හා බලශක්ති අමාත්ය කුමාර ජයකොඩිගේ අත්සනින් යුතුව නිකුත් කර තිබේ.
මෙම නිවේදනය නිකුත් වීමත් සමඟ, මණ්ඩලයේ අනාගතය පිළිබඳව අවිනිශ්චිතතාවයකින් පසුවූ සේවක ප්රජාවට සහ මහජනතාවට ඒ පිළිබඳ නිල තත්ත්වය පැහැදිලි වී ඇත.
මෙම ගැසට් නිවේදනය 2026 මාර්තු 9 වන දින සිට ක්රියාත්මක වේ.
ඒ අනුව ලංකා විදුලිබල මණ්ඩලය විසුරවා හැරේ. එම මණ්ඩලය සතු බලතල උත්පාදනය, සම්ප්රේෂණය, බෙදාහැරීම සහ පද්ධති මෙහෙයුම් යන ප්රධාන අංශ ආවරණය වන පරිදි අලුතින් පිහිටුවන ලද අනුප්රාප්තික සමාගම් 6ක් වෙත පවරනු ලැබේ.
2024 අංක 36 දරන ශ්රී ලංකා විදුලිබල පනතේ (නිශ්චිත වගන්ති කිහිපයක් හැර) සෙසු සියලු ප්රතිපාදන මෙදින සිට බලාත්මක වන අතර, එමඟින් මණ්ඩලය විසුරුවා හැරීමේ සහ ප්රතිව්යුහගත කිරීමේ ක්රියාවලියට නීතිමය වලංගුතාවය හිමි වේ.
විදුලිබල මණ්ඩලය ප්රතිව්යුහගත කිරීමේ ක්රියාවලිය ආරම්භ වීමත් සමඟ, මීට පෙර ස්වේච්ඡාවෙන් සේවයෙන් ඉවත් වීමට තීරණය කළ සේවක පිරිස් දැඩි දෙගිඩියාවකින් පසුවූයේ මේ සම්බන්ධ නිල නිවේදනය ප්රමාද වීම හේතුවෙනි. මෙම ගැසට් නිවේදනය නිකුත් වීමත් සමඟ මණ්ඩලය විසුරුවා හැරීමේ නිල කාලරාමුව තීරණය වී ඇත.
එමෙන්ම සේවකයන්ගේ වගකීම් නව සමාගම් වෙත පැවරීම හෝ විශ්රාම ගැන්වීමේ ක්රියාවලිය විධිමත්ව තිබේ. ආයතනික ව්යුහයේ වෙනස නිසා ඇතිවිය හැකි වෘත්තීය ගැටලුවලට නීතිමය විසඳුම් ලැබීමට මඟ පෑදේ.
මෙම ප්රතිසංස්කරණ හරහා මෙරට විදුලිබල ක්ෂේත්රයේ කාර්යක්ෂමතාව ඉහළ නැංවීම රජයේ අපේක්ෂාව වුවද, සේවක අයිතිවාසිකම් සුරක්ෂිත කිරීම සහ විදුලි ගාස්තු කෙරෙහි මෙහි බලපෑම පිළිබඳව ඉදිරියේදී දැඩි අවධානයක් යොමු වනු ඇත.
